ޤާނޫނު ތަންފީޒުވެގެން ދިޔުމާއެކު މުއައްސަސާތަކާ ގުޅިގެން މަސައްކަތްކުރަން ފަސޭހަވެއްޖެ: އެންޑީއެމްއޭ
ރަށްރަށަށް ޚާއްސަކޮށްގެން ކޮމިޔުނިޓީ ޑިޒާސްޓަރ މެނޭޖްމަންޓް ޕްރޮގްރާމް ހިންގަމުންދޭ
އެންޑީއެމްއޭއިން ފަލަސުރުޚީ ޕްރޮގްރާމްގައި
ކާރިސާ އާ ބެހޭ ކަންކަން ބެލެހެއްޓުމުގެ ގާނޫނެއް ވުޖޫދުވެގެން އައުމާއެކު ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ގެ މަސައްކަތްތައް މުއައްސަސާތަކާއި ގުޅިގެން ކުރިޔަށްގެންދިޔުމަށް ފަސޭހަވެގެންދިޔަކަމަށް އެއޮތޯރިޓީގެ އިމަރޖެންސީ ޑިޕާޓްމަންޓްގެ ޑިރެކްޓަރ ފަރޫޝާ އަލީ ނަސީރު ވިދާޅުވެއްޖެއެވެ.
އެންޑީއެމްއޭގެ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފަރޫޝާ ވިދާޅުވީ އެންމެ ބޮޑު ތަފާތަކަށްވީ ގާނޫނު ތަސްދީގުވެގެންދިޔުމާއެކު އޮތޯރިޓީއަކަށް ބަދަލުވެގެންދިޔުން ކަމަށާއި އެހިސާބުން މަސައްކަތްތައް ރާވާލެވި ބަޖެޓުވެސް ލިބިގެންދިޔަކަމަށެވެ. އަދި ޑިފެންސް މިނިސްޓަރ ގެ ބެލުމުގެ ދަށުން ހުރިހާ ކަންކަން ރާވާލެވި ކާރިސާގެ ކަންކަމާއި އެހެން މުއައްސަސާތަކާއި ގުޅިގެން މަސައްކަތްތަކެއް ކުރެވޭ ކަމަށް ފަރޫޝާ ވިދާޅުވިއެވެ.
ޕްރޮގްރާމްގައި ވާހަކަދައްކަވަމުން އެއޮތޯރިޓީގެ ޕްރޮގްރާމް ރިސަރޗް އެންޑް އެޑްވޮކަސީ ޑިޕާޓްމަންޓްގެ ޑިރެކްޓަރ މަރިޔަމް ޝިޒްނާ ވިދާޅުވީ ރަށްރަށަށް ޚާއްސަކޮށްގެން ކޮމިޔުނިޓީ ޑިޒާސްޓަރ މެނޭޖްމަންޓް ޕްރޮގްރާމެއް ހިންގަމުން އަންނަކަމަށެވެ. ކާރިސާގެ ހިރާސް ކުޑަކުރުމަށް ކުރިޔަށްގެންދާ މި ޕްރޮގްރާމްތައް ކުރިޔަށް ގެންދަނީ އެކި ގޮތްގޮތުން ހޮވާލެވޭ ރަށްރަށުގައި ކަމަށާއި އެންމެ ބޮޑަށް އިސްކަންދެނީ އެކަމަށް އެދޭ ރަށްރަށަށް ކަމަށް ޝިޒްނާ ވިދާޅުވިއެވެ.
