ފެންބޮޑުވެ ގެންލުން ލިބުނު ގެތަކަށް އެހީގެ ގޮތުގައި ހަތްލައްކައަށް ވުރެ ގިނަ ރުފިޔާ ދިނުމަށް ނިންމައިފި

ރާއްޖެއަށް މިފަހުން ކުރި ވިއްސާރާގައި މާލޭގައި ފެންބޮޑުވެ ގެންލުން ލިބުނު ގެތަކަށް އިންސާނީ އެހީ ފޯރުކޮށްދިނުމުގެ އުސޫލުގެ ތެރެއިން އެހީގެ ގޮތުގައި ހަތްލައްކައަށް ވުރެ ގިނަ ރުފިޔާ ދިނުމަށް ނިންމައިފިއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނީ ފެންވަދެގެން 227 ތަނަކަށް އެކިވަރުގެ ގެއްލުން ލިބިފައިވާ ކަމަށާއި، 193 ތަނަކަށް އިޖާބަ ދެވުނު ކަމަށެވެ. ވަގުތުން އެހީތެރިކަން ބޭނުންވާ 43 ގޭބިސީއެއްގެ ރެޕިޑް އެސެސްމަންޓް ދިވެހި ރެޑްކްރެސެންޓްގެ އެހީތެރިކަމާއެކު ހެދިފައިވާ ކަމަށް ވެސް އެންޑީއެމްއޭއިން ބުނެއެވެ.

އެންޑީއެމްއޭއިން ބުނީ 18 ގޭބިސީއެއްގެ 110 މީހުންނަށް ދެ ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިން ހަމަޖައްސައި ދެވުނު ކަމަށާއި، މިފަރާތްތަކަށް ވަގުތީ ބޯހިޔާވަހިކަން ހަމަޖެއްސީ ކައްކައި ކައިބޮއި ހެދުމަށާއި، ނިދާ ފާހަނާ ކުރެވޭނެ ގޮތެއް ނެތުމާއި ވަގުތީ ގޮތުން އެތަންތަނުގައި ދިރިއުޅެވޭނެ ހާލަތެއް ނެތުމުގެ ސަބަބުން ކަމަށެވެ. އަދި އެފަރާތްތައް އެއްކޮށް އާއްމު ހާލަތަށް ގެނެވި އެފަރާތްތައް ދިރިއުޅެމުން ދިޔަ ގޭގެއަށް މިހާރު ބަދަލުކުރެވިފައިވާ ކަމަށެވެ.

ހާދިސާއާ ގުޅިގެން ޑެމޭޖް އެސެސްމަންޓް ހަދަންޖެހޭ ކަމަށް ނިންމުނީ 78 ތަނަކަށްކަން ފާހަގަކޮށް އެންޑީއެމްއޭއިން ބުނީ މިތަންތަނުގެ އެސެސްމަންޓް ހެދުމަށް ދިވެހި ރެޑްކްރެސެންޓް، ވެމްކޯ، ރީޖަނަލް އެއާޕޯޓްސްއާއި އެމްޓީސީސީގެ އިތުރުން ޓްރޭޑް ނެޓްގެ މުވައްޒަފުން އެހީތެރިކަން ލިބިފައިވާ ކަމަށެވެ.

މިހާތަނަށް 53 ގޭބިސީއެއްގެ އެސެސްމަންޓް ވަނީ ނިމިފައިވާ ކަމަށާއި، މީގެ ތެރެއިން 48 ގެއަކަށް އެހީދިނުމުގެ އުސޫލުގެ ތެރެއިން އެހީތެރިކަން ފޯރުކޮށްދެވޭނެ ކަމަށް އެންޑީއެމްއޭއިން ބުނެއެވެ.

އެންޑީއެމްއޭއިން ބުނީ 19 ތަނަކުން އެސެސްމަންޓް ހަދަން ބޭނުންވާ ނުވާ ކަމަށް ބުނެފައިވާ ކަމަށާއި، 6 ތަނަކަށް އެކި ސަބަބުތަކާ ހެދި ނުވަދެވުމުގެ ސަބަބުން އެސެސްމަންޓް ހެދިފައިނުވާ ކަމަށެވެ.

އެންޑީއެމްއޭއިން ބުނީ ޒަރޫރީ ހިފާގެން ގުޅޭ ތަކެއްޗަށާއި، ސްޓްރަކްޗަރަލް ގެއްލުންތަކަށް 1،111،842.50 ރުފިޔާގެ ގެއްލުން ލިބިފައިވާ ކަމަށެވެ. އެސެސްމެންޓް ހެދުނު ގެތަކަށް ކާރިސާތަކުގައި އިންސާނީ އެހީ ފޯރުކޮށްދިނުމުގެ އުސޫލުގެ ތެރެއިން އެހީގެ ގޮތުގައި 711،541.70 ރުފިޔާ ދިނުމަށް ވަނީ ހަމަޖެހިފައިވާ ކަމަށް އެންޑީއެމްއޭއިން ބުނެއެވެ. އެއީ ޒަރޫރީ ހިފާ ގެންގުޅޭ ތަކެއްޗަށް ޖުމްލަ ގެއްލުމުގެ 20 އިންސައްތަ އަށްވާ 100،075.20 ރުފިޔާ އެވެ. ސްޓްރަކްޗަރަލް ގެއްލުންތަކަށް ޖުމްލަ 611،466.50 ރުފިޔާ ދިނުމަށް ހަމަޖެހިފައިވެއެވެ.

އެންޑީއެމްއޭއިން ބުނީ ކައިރިކައިރީގައި ފެންބޮޑުވުމުގެ ދެ ހާދިސާ ހިނގާފައިވާތީ ގޭގެއަށް ލިބިފައިވާ ގެއްލުންތައް ބޮޑު ކަމަށެވެ. އަދި ސްޓްރަކްޗަރަލް ގެއްލުންތައް އެންމެ ބޮޑަށް ލިބިފައިވާ ގެތަކުގެ މައުލޫމާތުއެއްކޮށް، ކަމާބެހޭ މުއައްސަސާތަކަށް ހިއްސާ ކުރުމަށް ވަނީ ނިންމާފައެވެ.