ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންއަށް ނުފޫޒު ފޯރުވަން އުޅޭ ކަމަށް ތުހުމަތުކޮށް އިލެކްޝަން ކޮމިޝަން (އީސީ)އަށް މައްސަލަ ހުށަހަޅައިފިއެވެ.

ރާއްޖެއެމްވީއަށް ވަނީ މައްސަލަ ހުށަހެޅި ފޯމުގެ ކޮޕީއެއް ލިބިފައެވެ.

މައްސަލާގައި ބުނެފައިވަނީ އިއްޔެ މާލެއަށް ކުރި ވިއްސާރައާ ގުޅިގެން ކަމަށް ބުނެ މިއަދުގެ މެންދުރު ފަހުގެ ވަގުތެއްގައި ސަރުކާރުގެ ފަރާތުން ނޭޝަނަލް ޑިސާސްޓަރ މެނޭޖްމަންޓް އިސްވެ އޮވެ ދުރާލާ ތައްޔާރުވެގެން ސަރުކާރުގެ 5 ކުންފުންޏެއްގެ އޮފިޝަލުން ހިމެނޭ ގޮތަށް ހާލު ބެލުމުގެ ނަމުގައި މާލޭގެ 400 އެއްހާ ގޭގެއަށް ވަދެ ފުޅާ ދާއިރާއެއްގައި ކެންޕޭއިން ހަރަކާތްތެއް ހިންގުމަށް ރާވަމުންދާ ކަމުގެ މައުލޫމާތު ލިބިފައިވާ ކަމަށެވެ.

މިއަދުގެ މިހަރަކާތަކީ އިންތިޚާބަށް ނުފޫޒު ފޯރުވުމަށް ރައްޔިތުންނާއި ބައްދަލުކޮށް ތަފާތު ކަންކަން ކޮށްދޭން ވައުދުވެ ހޯދާ ފުރުސަތެއްގެ ގޮތުގައި އަދި ސަރުކާރަށް ތާއީދުކޮށް ވޯލުމަށް މީހުން ނެރުމަށް ހިންގާ ހަރަކާތެއް ކަމަށް ތުހުމަތުކުރެވޭ ކަމަށެވެ.

އެހެންކަމުން މިކަން ހިންގުމުގެކުރިން މިކަން ސަމާލުކަމަށް ގެނައުމަށާއި، މިކަން ފެށިއްޖެނަމަ ހުއްޓުވުމަށާއި، މިމައްސަލަ ބަލައިދިނުމަށް ވަނީ އެދިފައެވެ.

އެންޑީއެމްއޭއިން އިންތިޚާބަށް ނުފޫޒު ފޯރުވަން އުޅޭ ކަމަށް ތުހުމަތުކޮށް މައްސަލަ ހުށަހަޅާފައިވާއިރު، ސޯޝަލް ސެންޓަރގައި ސިޔާސީ ޕާޓީއަކުން ކޯލްސެންޓަރ ހިންގާ ކަމަށް ބުނެ ރަސްމީކޮށް އީސީ އަށް ވަނީ ޝަކުވާ ހުށަހަޅާފައެވެ. އަދި މިހާތަނަށް ބެލި ބެލުމުން އެތަނުގައި ތިބީ އިދާރީ މުވައްޒަފުންތަކެއް ކަމަށް އެނގިފައިވާ ކަމަށް ކޮމިޝަނުން ބުނެއެވެ.