އަލިފާނުގެ ހާދިސާއާއި ގުޅިގެން 50 މީހުން އެހީތެރިކަމަށް އެދިފައިވޭ - އެންޑީއެމްއޭ

އަލިފާނުގެ ހާދިސާއާއި ގުޅިގެން 50 މީހުން އެހީތެރިކަމަށް އެދިފައިވާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނެފިއެވެ.

ހައުސިންގ މިނިސްޓްރީއާއި، ކޮންސްޓްރަކްޝަން އަދި އެންވަޔަރަމަންޓް މިނިސްޓްރީގައި ހިނގި އަލިފާނުގެ ހާދިސާއާއި ގުޅިގެން އެ ސަރަހައްދުގައި ދިރިއުޅެމުންދިޔަ ގެތައް ވަނީ ހުސްކޮށްފައެވެ. އަދި ޑިޒާސްޓަރ މެނޭޖްމަންޓް އޮތޯރިޓީން ވަނީ އިވެކުއޭޝަން ސެންޓަރެއް ގާއިމްކޮށްފައެވެ.

ޑިޒާސްޓަރ މެނޭޖްމަންޓް އޮތޯރިޓީން ބުނީ އަލިފާނުގެ ހާދިސާއާއި ގުޅިގެން 50 މީހުން އެހީތެރިކަމަށް އެދި އެންޑީއެމްއޭއަށް ގުޅާފައިވާ ކަމަށާއި، އެފަރާތްތަކުގެ ރަޖިސްޓްރޭޝަން ހަދާފައިވާ ކަމަށެވެ. މިފަރާތްތަކަށް ބޭނުންވާނެ ޒަރޫރީ އެހީތެރިކަން ފޯރުކޮށްދިނުމަށް ސޯޝަލް ސެންޓަރުގައި ހެދިފައިވާ އިވޭކުއޭޝަން ސަންޓަރު ތައްޔާރުކުރެވިފައިވާ ކަމަށާއި، އެހެންނަމަވެސް އާއިލާތައް އެދުމުގެ މަތިން ވަގުތީގޮތުން އެފަރާތްތައް ތިމާގެ ގޭގެއަށް ބަދަލުކުރެވިފައިވާ ކަމަށް އެންޑީއެމްއޭއިން ބުނެއެވެ.

އެންޑީއެމްއޭއިން ބުނީ ގެއްލުން ލިބުނު އިމާރާތްތަކުގެ ރެޕިޑް އެސެސްމަންޓްއެއް ހަދަމުން އަންނަ ކަމަށެވެ. އަދި މިތަންތަނަށް މީހުން ބަދަލުވާން ރައްކާތެރިނަމަ އާއިލާތައް ބަދަލުކުރަން އެހީތެރިކަން ފޯރުކޮށްދޭނެ ކަމަށެވެ.

އެންޑީއެމްއޭއިން ވަނީ އަލިފާނުގެ ހާދިސާގައި އެއްވެސް ކަހަލަ އެހީތެރިކަމެއް ބޭނުންވާ ފަރާތެއް ހުރިނަމަ ލަސްނުކުރައްވާ 115 ނަމްބަރަށް ގުޅުމަށް އެދިފައެވެ.

3 މިނިސްޓްރީއެއްގައި ހިނގި އަލިފާނުގެ ހާދިސާއާއި ގުޅިގެން އެ މިނިސްޓްރީތަކުގެ މަސައްކަތް ވަނީ ހުއްޓިފައެވެ. އަދި އިމާރާތްތައް ވަނީ ބޭނުންނުކުރެވޭ ވަރުވެފައެވެ.