ގުޅީފަޅު ހިއްކަމުންދާތީ އެ ހިސާބުން ދަތުރުކުރާއިރު ސަމާލުވުމަށް އަންގައިފި
9 އޯގަސްޓު 2023 | ބުދަ 13:38ގުޅީފަޅު ހިއްކުމުގެ ދެވަނަ ފިޔަވަހީގެ މަސައްކަތްކުރުމަށް ހަވާލުކޮށްފައިވަނީ ނެދަލޭންޑްސްގެ ބޮސްކާލިސް ކުންފުންޏާ
ގުޅީފަޅާއި ތިލަފުށި
ކ. ގުޅީފަޅު ބިން ހިއްކުމުގެ މަޝްރޫއު ފޭސް 2އާ ގުޅިގެން، ގުޅީފަޅު ސަރަހައްދުން ދަތުރުކުރާ އުޅަނދުފަހަރު ސަމާލުވުމަށް އަންގައިފިއެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ބުނީ، ގުޅީފަޅު ދެކުނު ފަރާތުގެ ބިން ހިއްކުމުގެ މަސައްކަތް 05 އޮގަސްޓް 2023ން ފެށިގެން ކުރިއަށްދާނެތީ، އެ ސަރަހައްދުން ދަތުރުކުރާ ކަނޑު އުޅަނދުފަހަރުގެ ކެޕްޓަނުން މިކަމަށް ސަމާލުކަންދީގެން ދަތުރުކުރުމުގެ ކަންކަން ކުރިޔަށް ގެންދިއުމަށް އެދޭކަމަށެވެ.
ބުދަ ދުވަހު މިކަން އަންގާފައިވާއިރު، ޖޫން މަހުގެ ތެރޭގައިވެސް ސަމާލުވުމަށް އަންގައި ބަޔާނެއް ނެރެފައިވެއެވެ.
ގުޅީފަޅު ހިއްކުމުގެ ދެވަނަ ފިޔަވަހީގެ މަސައްކަތް ކުރުމަށް ހަވާލުކޮށްފައިވަނީ ނެދަލޭންޑްސްގެ ބޮސްކާލިސް ކުންފުންޏާއެވެ. ގާތްގަނޑަކަށް 120 މިލިއަން ޔޫރޯގެ މި މަޝްރޫއުގެ ދަށުން، ގުޅީފަޅު ތަރައްގީކުރުމަށް އެ ކުންފުންޏާ ހަވާލުކޮށްފައިވާއިރު، ގުޅީފަޅުގެ ފުރަތަަމަ ފިޔަވަހީގެ މަސައްކަތްވެސް ކޮށްފައިވަނީ އެ ކުންފުނިންނެވެ. މާލެއާ ގާތްގަނޑަކަށް ހަތަރު ވަރަކަށް ކިލޯމީޓަރު ދުރުގައި އޮތް ގުޅީފަޅު ތަރައްގީކުރުމުގެ މަސައްކަތަކީ ސަރުކާރުގެ ސްޓްރެޓީޖިކް ޕްލޭނުގެ ތެރޭގައިވެސް ހިމެނޭ ކަމެކެވެ. އެގޮތުން އެތަނުގެ ޕޯޓްގެ މަސައްކަތާއި، ކްލައިމެޓް އެޑަޕްޓިވް ސިފަތަކާއެކު އެތަން ތަރައްގީކުރުމަށް ވަނީ ނިންމާފައެވެ. ގުޅީފަޅު ތަރަައްގީވެގެން ދާއިރު، އެތަން ވެގެންދާނީ ކަނޑުގެ ލޮނުގަނޑު އުފުލުމުން ލިބޭ ގެއްލުން ކުޑަވާގޮތަށް ތަރައްގީކޮށްފައިވާ ތަނަކަށެވެ.
ގުޅީފަޅު ބިން ހިއްކުމުގެ ދެވަނަ މަޝްރޫއު ރައީސް އިބްރާހީމް މުހައްމަދު ސާލިހު ފައްޓަވައިދެއްވީ ފައްޓަވައިދެއްވީ ޖުލައި މަހުގެ ދެވަނަ ދުވަހުއެވެ.
ގުޅީފަޅު ބިން ހިއްކުމުގެ މަޝްރޫއުގެ ފުރަތަމަ ފިޔަވަހީގެ ދަށުން، ބޮސްކާލިސްއާ ހަވާލުކޮށްގެން 192 ހެކްޓަރުގެ ބިން ވަނީ ހިއްކާފައެވެ. އެމްޓީސީސީއާ ހަވާލުކޮށްގެންވެސް ގުޅީފަޅުން ބިން ހިއްކާފައިވެއެވެ.
