އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް ހޯދުމުގެ މަސައްކަތް ސައުދީ ޕްރޯ ލީގުގެ އަލް ހިލާލުން ފަށައިފި އެވެ.

ބޭރުގެ މީޑިއާ ތަކުގައި ބުނެފައިވާ ގޮތުން އުމުރުން 23 އަހަރުގެ ކުޅުންތެރިޔާ ހޯދުމަށް އަލް ހިލާލް އިން ޝައުޤުވެރިވެ އެވެ. އެގޮތުން އަލް ހިލާލް އިން އޮތީ ލޯނު އެއްބަސްވުމެއްގެ ދަށުން ނަމަވެސް، ފެލިކްސް ހޯދުމަށް ތައްޔާރަށް ކަމަށް ވަނީ ބުނެފަ އެވެ. ދާއިމީ އެއްބަސްވުމެއްގެ ދަށުން އޭނާ ހޯދޭނެ ހާލަތެއް މެދުވެރިވެއްޖެ ނަމަ، އެ ގޮތަކަށް ވެސް އެ ކުލަބުން ތައްޔާރު ކަމަށް މީޑިއާ ތަކުން ބުނެ އެވެ. ނަމަވެސް ދާއިމީ އެއްބަސްވުމެއްގެ ދަށުން އޭނާ ދޫކޮށްލަން މިހާތަނަށް އެތުލެޓިކޯ އިން ބޭނުން ނުވާނެ ކަމަށް ވެސް މީޑިއާތަކުން ބުނެ އެވެ. އަލް ހިލާލް އިން ފެލިކްސް ހޯދަން ބޭނުންވާކަން ކުޅުންތެރިޔާ އަށް ވެސް އިނގޭ ކަމަަށާއި، އެ ކުލަބުން މަޑު ކުރަނީ ފެލިކްސް ނިންމާ ގޮތެއް ބެލުމަށް ކަމަށް ވަނީ ބުނެފަ އެވެ.

ފެލިކްސް ގެނައުމަށް އެންމެ ބޮޑަށް ބޭނުން ވަނީ އަލް ހިލާލްގެ ކޯޗަކަށް މަސައްކަތް ކުރަމުން އަންނަ ޕޯޗުގަލްގެ ޖޯޖް ޖީސަސް އެވެ. އެކަމުގައި އޭނާ ވަނީ އެތައް ފަހަރަކު ފެލިކްސްއާ ވާހަކަ ދައްކާފައި ކަމަށާއި، މިހާތަނަށް ފެލިކްސް ވަކި ގޮތެެއް ނުނިންމާ ކަމަށް ވެސް މީޑިއާ ތަކުން ބުނެ އެވެ. ސައުދީ ލީގަށް ބަދަލުނުވެ، ފެލިކްސްގެ ވިސްނުން ހުރީ ޔޫރަޕުގައި ކުޅެން ކަމަށް ބުނެފައިވެ އެވެ. ޚާއްސަކޮށް އޭނާގެ ޝައުޤުވެރިކަން ސްޕެއިންގެ ބާސެލޯނާ އަށް އޮންނަ ކަމަށް މީޑިއާ ތަކުން ބުނެ އެވެ. މިހާތަނަށް އައިއިރު ޔަގީންވާ ކަމަކީ، އެތުލެޓިކޯގައި ހުންނަން ފެލިކްސް ބޭނުންނުވާ ކަމެވެ.

ފެލިކްސް އެންމެ ފަހުން ކުޅުނީ ލޯނު އެއްބަސްވުމެއްގެ ދަށުން ޗެލްސީ އަށެވެ. ނަމަވެސް ޗެލްސީގެ އައު ކޯޗު މައުރީސިއޯ ޕޮޗެޓީނޯގެ ލިސްޓުގައި ފެލިކްސް ނުހިމެނޭތީ، އެ ކުލަބުން ވަނީ އޭނާ ދޫކޮށްލައިފަ އެވެ. އެހެންކަމުން ފެލިކްސް ވަނީ އަނބުރާ އެތުލެޓިކޯ މެޑްރިޑަށް ގޮސްފަ އެވެ. އެތުލެޓިކޯ އަށް މިހާތަނަށް ކުޅެދިން 131 މެޗުގައި ފެލިކްސް ވަނީ 34 ލަނޑު ޖަހައިފަ އެވެ. 2019 ވަނަ އަހަރުން ފެށިގެން އޭނާ އަންނަނީ ޕޯޗުގަލް ޤައުމީ ޓީމުގައި ވެސް ހިމެނިގެން ކުޅެމުންނެވެ.