އަންނަ މަހު ބާއްވަ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލާން ބޭނުންވާ ފަރާތްތަކަށް ރީ ރަޖިސްޓްރީވުމަށް ހުޅުވާލި ފުރުސަތުގައި މުއްދަތު އިތުރުނުކުރާނެ ކަމަށް އިލެކްޝަންސް ކޮމިޝަނުން ބުނެފިއެވެ.

ރީ ރަޖިސްޓްރީ ކުރުމަށް އީސީން ހުޅުވާލި މުއްދަތު ހޮނިހިރު ދުވަހުގެ ހަވީރު 4:00 އަށް ހަމަވާނެއެވެ. މި ފުރުސަތު 16 ޖުލައިގައި ހުޅުވާލިއިރު 31 ޖުލައިގެ ނިޔަލަށް އޮންލައިންކޮށް ރީ ރަޖިސްޓްރޭޝަން ފޯމު ހުށަހެޅުމުގެ ފުރުސަތު ހުޅުވާލިއެވެ. އެ މުއްދަތު 2 އޮގަސްޓާ ހަމައަށް އިތުރުކުރިއިރު އެ މުއްދަތު މިހާރު ވަނީ ހަމަވެފައެވެ. ދެން ރީ ރަޖިސްޓްރީކުރެވޭނީ ފޯމު ހުށަހަޅައިގެން އެކަންޏެވެ.

އީސީގެ ނާއިބު ރައީސް އިސްމާއީލް ހަބީބް ހުކުރު ދުވަހު ވިދާޅުވީ ހޮނިހިރު ދުވަހުގެ ނިޔަލަށް ރީ ރަޖިސްޓްރީ ކުރުމުގެ މުއްދަތު ހަމަވާއިރު ދެން އެ މުއްދަތު އިތުރުނުކުރާނެ ކަމަށެވެ. އަދި ވޯޓުލުމުގެ ޙައްގު ލިބިފައިވާ ކޮންމެ މީހަކުވެސް 1414 އަށް ގުޅައިގެން ނުވަތަ VR space ID ޖެހުމަށްފަހު 1414 އަށް މެސެޖުކޮށްގެން އެ މީހަކު މިހާރު ރަޖިސްޓަރީވެފައިވާ ތަން ޗެކުކުރުމަށް އޭނާ އެދިވަޑައިގެންނެވިއެވެ.

ހަބީބު ވަނީ މިހާރު ރަޖިސްޓަރީ ވެފައިވަނީ، ވޯޓުލާ ދުވަހު ހުންނަ ރަށުގައި ނޫންކަމަށްވާނަމަ، ވޯޓުލާން ބޭނުންވާ ތަނަކަށް، އަވަހަށް ރީ-ރަޖިސްޓްރީ ކުރުމަށް އިލްތިމާސްކުރައްފައެވެ. އަދި ދެވަނަ ފުރުސަތެއް ނުލިބޭނެ ކަމަށް ބެލުމަށް ވެސް އޭނާ ވިދާޅުވިއެވެ. ރީ-ރަޖިސްޓްރޭޝަނަށް، އިތުރު މުއްދަތު ދެވެން ނެތީ އިންތިޚާބުގެ މަސައްކަތްތަކުގެ އިންތިޒާމުތަކަށް، ބުރޫއަރާނެތީ ކަމަށް ވެސް ވިދާޅުވިއެވެ.

ރީ ރަޖިސްޓްރޭޝަނަށް އިތުރު މުއްދަތެއް ނުދިން ނަމަވެސް މިހާރު ރަޖިސްޓްރީކޮށްފައިވާ ތަނުގައި ވޯޓުފޮށްޓެއް ނުބެހެއްޓޭ ހާލަތުގައި، އެތަންތަނުގައި ރަޖިސްޓްރީ ކުރި މީހުންނަށް ދެވަނަ ފުރުސަތެއް ލިބޭނެ ކަމަށް ހަބީބު ވިދާޅުވިއެވެ. މިގޮތަށް ދިމާވާނީ، އެހެން ޤައުމުތަކާއި ރިސޯޓުތަކަށް ރީ ރަޖިސްޓްރީ ކުރާ މީހުންނަށެވެ.

ހަބީބު ވަނީ އެންމެ ފަހުވަގުތަށް މަޑުނުކޮށް، ރީ ރަޖިސްޓްރީގެ ކަންތައްތައް ނިންމުމަށް ހުރިހާ ކެންޑިޑޭޓުންނަށާއި، ސިޔާސީ ޕާޓީތަކަށާއި އާއްމުންނަށް އިލްތިމާސްކުރައްވާފައެވެ.

ރީ ރަޖިސްޓްރޭޝަންގެ ފުރުސަތު ހޮނިހިރު ދުވަހުގެ ނިޔަލަށް ހަމަވާއިރު މިދިޔަ ލޯކަލް ކައުންސިލް އިންތިޚާބުގައި މާލޭގައި ވޯޓުލުމަށް ރަޖިސްޓްރީ ކުރި އެހެން ރަށްތަކުގެ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ މާލޭގައެވެ. އެހެންކަމުން މި އިންތިޚާބުގައި ވެސް މާލެއަށް ވޯޓުލާ ފަރާތްތަކުން އަލުން ރަޖިސްޓްރީ ކުރަން ނުޖެހޭނެއެވެ. ނަމަވެސް މާލެ ނޫން އެހެން ރަށަކަށް މިފަހަރު ވޯޓުލާނަމަ އެ ފަރާތްތަކުން ވެސް އަލުން ރަޖިސްޓްރީވާން ޖެހޭނެއެވެ.

ލޯކަލް ކައުންސިލް އިންތިޚާބުގައި މާލެ ނޫން އެހެން ރަށްތަކުގައި ރަޖިސްޓްރީވެފައިވާ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ އެ މީހެއްގެ ދާއިމީ އެޑްރެހުގައެވެ.

ރީ ރަޖިސްޓްރޭޝަން ފޯމުތައް މާލޭ ފިޔަވައި މީހުން ދިރިއުޅޭ އެހެން ރަށްތަކުން ބަލައިގަންނާނީ އެރަށެއްގެ ކައުންސިލް އިދާރާއަށް އަދި އައްޑޫ ސިޓީ އާއި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއަށެވެ. މާލޭގައިނަމަ، އިންތިޚާބާ ބެހޭ މަރުކަޒު ކަމަށްވާ ދަރުބާރުގެ އިން ފޯމުތައް ބަލައިގަންނާނެއެވެ. ރީ ރަޖިސްޓަރީވުމަށް އެދޭ ފޯމު އީސީގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ.

ރާއްޖެއިން ބޭރުގައި ދިރިއުޅޭ ދިވެހިން ރީ ރަޖިސްޓްރީ ކުރުމަށް ފޯމު ހުށަހަޅަން ޖެހޭނީ އެ ޤައުމުތަކުގައި ހުންނަ ދިވެހި އެމްބަސީ އާއި ހައިކޮމިޝަން އަދި ކޮންސުލޭޓް މެދުވެރިކޮށެވެ.

މިއަހަރުގެ ރިޔާސީ އިންތިޚާބުގައި ވޯޓުލުމުގެ ޙައްޤު 282،672 މީހަކަށް ލިބޭއިރު މިހާތަނަށް ރީ ރަޖިސްޓްރީ ކުރުމަށް އެދިފައިވަނީ 29،951 މީހެއް ކަމަށް އީސީން ވަނީ ބުނެފައެވެ.