އަންނަ މަހު ބާއްވާ ރިޔާސީ އިންތިޚާބުގައި ވާދަކުރައްވާ ކެނޑިޑޭޓުންގެ ނަންތައް ތަރުތީބު ކުރުން އަންނަ ބުދަ ދުވަހަށް ތާވަލުކޮށްފިއެވެ.

އިލެކްޝަންސް ކޮމިޝަނުގެ ނާއިބު ރައީސް އިސްމާއީލް ހަބީބު ހުކުރު ދުވަހު ކުރެއްވި ޓްވީޓެއްގައި ވިދާޅުވީ އިންތިޚާބަށް ކުރިމަތިލާ ބޭފުޅުންގެ ތެރެއިން ޝަރުތު ހަމަވާ ބޭފުޅުންގެ ނަންތައް ތަރުތީބު ކުރުމަށް ގުރުއަތުލުން އޮންނާނީ 9 އޮގަސްޓް 2023 ވަނަ ދުވަހުގެ ހަވީރު 4:30 ން 5:30 އަށް ދަރުބާރުގޭގެ ރަންނަބަނޑޭރި މާލަމުގައި ކަމަށެވެ.

މި ރަސްމިއްޔާތުގައި ކެނޑިޑޭޓުންނަށް އަމިއްލަފުޅަށް ބައިވެރިނުވެވޭ ހާލަތެއްގައި އެ ބޭފުޅެއްގެ މަންދޫބަކު ބައިވެރިކުރެވިދާނެ ކަމަށް ވެސް ހަބީބު ވިދާޅުވިއެވެ. މިކަމާ ގުޅޭ އިތުރު ތަފްސީލް ކެނޑިޑޭޓުންނަށް އަރުވާނެ ކަމަށް ވެސް އޭނާ ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ވާދަކުރަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާއިރު މިހާތަނަށް ފޯމު ހުށަހެޅުއްވީ ކުރީގެ ރައީސް އަބްދުﷲ ޔާމީން އެކަންޏެވެ. ނަމަވެސް ޝަރުތުހަމަނުވާތީ އެމަނިކުފާނުގެ ކެނޑިޑެންސީ ބަލައިނުގަތުމަށް އީސީން ވަނީ ނިންމާފައެވެ. އެ މައްސަލަ މިހާރު ވަނީ ސުޕްރީމް ކޯޓަށް ހުށަހަޅައިފައެވެ.

މިހާތަނަށް ރިޔާސީ އިންތިޚާބުގައި ވާދަކުރާނެ ކަން ރަސްމީކޮށް އިއުލާންކުރައްވާފައިވަނީ ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެނޑިޑޭޓު އިބްރާހީމް މުޙައްމަދު ޞާލިހާއި، އެންއެމްޕީގެ ކެނޑިޑޭޓު މުޙައްމަދު ނާޒިމާއި، ދަ ޑިމޮކްރެޓްސްގެ ކެނޑިޑޭޓް އިލްޔާސް ލަބީބު އާއި ޕީއެންސީގެ ކެނޑިޑޭޓު އަދި މާލޭގެ މޭޔަރު ޑރ. މުޙައްމަދު މުއިއްޒު އާއި ޖުމްހޫރީ ޕާޓީގެ ކެނޑިޑޭޓު ގާސިމް އިބްރާހިމް އާއި އެމްއާރުއެމްގެ ރައީސް އަހުމަދު ފާރިސްގެ އިތުރުން އަމިއްލަގޮތުން ކުރިމަތިއްލައްވާ ކެނޑިޑޭޓު އުމަރު ނަސީރެވެ.

ރިޔާސީ އިންތިޚާބުގައި ވާދަކުރުމަށް ފޯމު ހުށަހެޅުމުގެ މުއްދަތު ހަމަވާނީ އަންނަ ހޯމަ ދުވަހުގެ މެންދުރު 2:00 އާ ހަމައަށެވެ.

މިއަހަރުގެ ރިޔާސީ އިންތިޚާބު އަންނަ މަހުގެ 9 ވަނަ ދުވަހު ބާއްވާއިރު މި އިންތިޚާބުގައި 282،672 މީހުންނަށް ވޯޓުލުމުގެ ޙައްގު ލިބެއެވެ.