ނ. މާފަރު ބިން ހިއްކުމުގެ މަޝްރޫއު އެމްޓީސީސީއާ ހަވާލުކޮށްފި
އެ އެއްބަސްވުމުގައި އެމްޓީސީސީގެ ފަރާތުން ސޮއިކުރައްވާފައިވަނީ ޗީފް އެގްޒެކެޓިވް އޮފިސަރު، އާދަމް އާޒިމް
ނ. މާފަރު ބިން ހިއްކުމުގެ މަޝްރޫއު އެމްޓީސީސީއާ ހަވާލުކުރުން
ޕްލޭނިން މިނިސްޓްރީން، ނ. މާފަރު ބިން ހިއްކުމުގެ މަޝްރޫއު އެމްޓީސީސީއާ ހަވާލުކޮށްފިއެވެ.
މި މަޝްރޫއު ހަވާލުކުރުމަށް މިއަދު ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރައްވާފައިވަނީ ޗީފް އެގްޒެކެޓިވް އޮފިސަރު، އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް، ފާތުމަތު ޝާނާ ފާރޫގެވެ.
މި މަޝްރޫއުގެ ދަށުން، ސޭންޑް ސަރޗް ސަރވޭއެއް ހެދުމާއި 20.40 ހެކްޓަރުގެ ސަރަހައްދެއްގެ ބިން ހިއްކުމުގެ މަސައްކަތް ކުރުމަށް ވަނީ ހަމަޖެހިފައެވެ. މި މަޝްރޫއަކީ 84.68 މިލިއަން ރުފިޔާއަށް، 300 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫއެކެވެ. މި މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓް އެސެސްމަންޓެއް ހެދުމަށްފަހުގައެވެ.
1,200 މީހުންގެ އާބާދީއެއް އޮންނަ މާފަރު ރައްޔިތުން އާމްދަނީ ހޯދުމަށްޓަކައި މައިގަނޑުގޮތެއްގައި މަސައްކަތްކުރަނީ ފަތުރުވެރިކަމުގެ ދާއިރާގައެވެ. މިހާރުވެސް މަތީ ފަންތީގައި ހިންގަމުންދާ 7 ރިސޯޓެއް އެ އަތޮޅުގައި އޮތުމާއެކު، ގިނަ ރައްޔިތުންތަކެއް ވަޒީފާ އަދާކުރަމުން ދަނީ މި ރިސޯޓްތަކުގައިކަން ފާހަގަކޮށްލެވެއެވެ. އަދި މާފަރުގައި އެއަރޕޯޓުވެސް އޮތުމާއެކު، ގެސްޓްހައުސް ވިޔަފާރި ކުރިއެރުވުމަކީ އެރަށު ރައްޔިތުންގެ ބޮޑު އުންމީދެކެވެ. އެރަށު ރައްޔިތުންނަށް އެންމެ ފަހުން ގޯތި ދޫކޮށްފައިވަނީ މީގެ 5 އަހަރު ކުރިން ކަމަށް ކައުންސިލުން މައުލޫމާތުދީފައިވެއެވެ.
މީގެ އިތުރުން މި ރަށް އުފެދިފައި އޮތްގޮތުން، ރަށުގެ ދެބައިކުޅަ އެއްބައި އެއަރޕޯޓްގެ އިޚްތިސާސްތެރޭގައި އޮތުމާއެކު، ރަށުގެ މުސްތަގުބަލަށާއި އިޖްތިމާއީ އަދި އިގްތިސާދީ ކުރިއެރުމަށްޓަކައި ރަށަށް ބިން އިތުރުވުމަކީ މުހިންމު ކަމެއް ކަމަށް ރަށުގެ ރައްޔިތުން ދަނީ ބުނަމުންނެވެ. އެހެންކަމުން، ބުރާސްފަތި ދުވަހު ސޮއިކުރި މާފަރު ބިން ހިއްކުމުގެ މަޝްރޫއުގެ މަސައްކަތް ނިމުމުން މާފަރުގެ މުސްތަގުބަލު އިތުރަށް އުޖާލާކޮށް ދިރުވުމަށްޓަކައި، ރަށު ރައްޔިތުންނަށް ފަހި ފުރުސަތުތަކެއް މުސްތަގުބަލުގައި ލިބިގެންދާނެއެވެ.
ވޭތުވެދިޔަ 42 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި އުމްރާނީ ތަރައްގީގެ ގިނަ މަޝްރޫއުތަކެއް ހިންގައި، ކާމިޔާބުކަމާއެކު ނިންމާލާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްގީގެ ދަތުރުގެ މުހިންމު މަރުހަލާއެއްގައި ކަމަށް ވާއިރު، އެ ކުންފުނި އުފެދުނީއްސުރެ ރާއްޖޭގެ އުމްރާނީ ތަރައްގީއާއި އިޖުތިމާއީ ވަސީލަތްތައް ބިނާކުރުމުގައި އެމްޓީސީސީން ވަނީ މުހިންމު ދައުރެއް އަދާކޮށްފައެވެ.
