ދިވެހި ޕްރިމިއާ ލީގުގެ ފުރަތަމަ ބުރު ނިމޭއިރު، ސުޕަ ޔުނައިޓެޑު ސްޕޯޓްސް (ސަސް)ގެ އަމާޒަކީ ލީގު ތާވަލްގެ ތިން ވަނަ ނުވަތަ ހަތަރު ވަނައިގައި އޮތުން ކަމަށް އެ ކުލަބުގެ ކޯޗު އިސްމާއީލް މަހްފޫޒް (އިންމަ) ބުނެފި އެވެ.
ލީގު ތާވަލްގެ ތިން ވަނައިގައި އޮތް ސަސް އާއި ހަތަރު ވަނައިގައި އޮތް ބުރު ސްޕޯޓްސް ކުލަބަށް ލިބެނީ 12 ޕޮއިންޓެވެ. ނަމަވެސް ފައިދާ ލަނޑުން ކުރި ހޯދައިގެން ސަސް އޮތީ ތިން ވަނައިގަ އެވެ. ލީގުގައި ސަސް ދެން ނުކުންނާނީ ބުރު ސްޕޯޓްސް ކުލަބާ ދެކޮޅަށެވެ. އެ މެޗުން މޮޅުވާ ޓީމަކަށް ތިން ވަނައިގައި ލީޑު ނެގުމުގެ ފުރުސަތު އޮންނާނެ އެވެ.
ބުރު މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން އިންމަ ބުނީ، ސީޒަނަށް ކުރިމަތިލީ ސީޒަންގެ ރަނގަޅު ހިސާބެއްގައި ސަސް ބާއްވަން ކަމަށެވެ. އެގޮތުގެ މަތިން ފުރަތަމަ ބުރު ނިމޭއިރު ސަސްގެ އަމާޒަކީ ތިން ވަނަ ނުވަތަ ހަތަރު ވަނައިގައި އޮތުން ކަމަށް ވެސް އިންމަ ބުންޏެވެ. އެ ހިސާބުގައި ސަސް އަށް އޮވެވިއްޖެ ނަމަ، ފުރަތަމަ ބުރުގެ އަލީގައި ރަނގަޅު ހިސާބެއްގައި ސީޒަން ނިންމާލެވޭނެ ކަމަށް އިންމަ ދެކެ އެވެ. މީގެ އިތުރުން އިންމަ ދެކޭ ގޮތުގައި އެކަމުގެ ސަބަބުން ސަސް އަށް އިތުރު ހިތްވަރެއް ވެސް ލިބޭނެ އެވެ. އެހެންކަމުން ޓީމުގެ އަމާޒަށް ވާސިލްވެވޭނެ ކަމަށް އިންމަ ވަނީ ބުނެފަ އެވެ.
ސަސްގައި ހިމެނޭ ބައެއް ކުޅުންތެރިން ފުޓްސަލް ކުޅުމާ ގުޅޭ ގޮތުން އިންމަ ބުނީ، ސީޒަންގެ ތެރޭގައި ކުޅުމަކީ އެންމެ ރަނގަޅު ގޮތް ނޫން ކަމަށެވެ. އެހެން ނަމަވެސް، ކުޅުންތެރިންގެ ވަޒީފާގެ ކަންކަން ހުންނަ ގޮތުން އެކަން ހުއްޓުވޭނެ ކަމަށް އިންމަ ޤަބޫލެއް ވެސް ނުކުރެ އެވެ. އަދި އެކަމަށް ހުރަސް އަޅާފައި ނުވާނެ ކަމަށް ވެސް އޭނާ ވަނީ ބުނެފަ އެވެ. ސީޒަންގެ ތެރޭގައި ފުޓްސަލް ކުޅެން ޖެހުމުން ދިމާވާ ބައެއް ދަތިތަކުގެ ވާހަކަ ވެސް އިންމަ ވަނީ ހިއްސާކޮށްފަ އެވެ. އޭގެ ތެރޭގައި ބައެއް ކުޅުންތެރިން ގެންނަން ޖެހެނީ މެޗު ފެށެން ފަސް ވަރަކަށް މިނެޓަށްވެފައި ވަނިކޮށް ކަމަށެވެ.
މިކަހަލަ ހާލަތުގައި އަޅުގަނޑުމެން މެނޭޖު ކުރަމުން މި ދަނީ. ތިބުނުއްވިހެން ބައެއް ކުޅުންތެރިން އަޅުގަނޑުމެންގެ މެޗަށް އެބަ ގެންނަން މެޗު ފައްޓަން ފަސް ވަރަކަށް މިނެޓަށް ވާއިރަށް. އެއީ އަދި އެކޮޅު މެޗު ކުޅެފައި. މިކަހަލަ އުނދަގޫތަކެއް ވެސް އެބަ އުޅޭ.އިސްމާއީލް މަހްފޫޒް (އިންމަ) / ސަސްގެ ކޯޗު
އެގޮތަށް މެޗު ކުޅެން ޖެހުމުން ބައެއް ފަހަރު އަނިޔާގެ މައްސަލަ ދިމާވާ ހާލަތް އަންނަ ކަމަށް ވެސް އިންމަ ވަނީ ބުނެފަ އެވެ. އެގޮތަށް ދިމާވާ ހާލާތްތަކުގައި މުޅި ދުވަސް ހޭދަކުރަން ޖެހެނީ ކުޅުންތެރިންގެ ރިކަވަރީ އަށް ކަމަށް އޭނާ ވަނީ ބުނެފަ އެވެ. ނަމަވެސް އިންމަ ދެކޭ ގޮތުގައި ފުޓްސަލް އަކީ ޓެކްނިކަލީ ގޮތުން ފުޓުބޯޅަ ކުޅުންތެރިންނަށް ވަރަށް މުހިންމު އެއްޗެކެވެ. ނަމަވެސް ސީޒަންގެ ތެރެއިން އެކަމާ ދިމާވުމަކީ ވަރަށް އުނދަގޫ ކަމެއް ކަމަށް އޭނާ ވަނީ ބުނެފަ އެވެ.
ޕްރިމިއާ ލީގުގައި ސަސް އިން ބުރު ސްޕޯޓްސް ކުލަބާ ދެކޮޅަށް ނުކުންނާނީ ބުރާސްފަތި ދުވަހުގެ ހަވީރު އެވެ.
