އަންސޫ ފާޓީގެ ލަނޑާއެކު ބާސެލޯނާ އިން 1-0 ގެ ނަތީޖާއަކުން އޭސީ މިލާން ބަލިކޮށްފިއެވެ.

ލަސް ވޭގަސްގައި އަންގާރަ ދުވަހު ކުޅުނު މެޗުގައި އަންސޫ ފާޓީ ކުޅެން ނިކުތީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައެވެ. ކުޅެން ނިކުތްތާ 10 މިނެޓުގެ ތެރޭގައި އޭނާ ވަނީ މެޗުގެ ހަމައެކަނި ލަނޑު ޖަހައިދީފައެވެ. އޭނާ ލަނޑު ޖެހުމަށްފަހު އުފާ ފާޅުކުރުމަށް ދިޔައީ ޓަޗްލައިންގައި ހުރި ޑެމްބެލޭ ގާތަށެވެ. ޕީއެސްޖީ އަށް ބަދަލުވުމާ ގާތްވެފައިވާ ޑެމްބެލޭ، ބާސެލޯނާގެ ސްކޮޑުގައި ނުހިމަނައެވެ.

މި މޮޅާއެކު ބާސެލޯނާ އިން ވަނީ އެމެރިކާ ޓުއާ ނިންމާލާފައެވެ. އާސެނަލް ކައިރިން ބަލިވެފައިވާއިރު، ވާދަވެރި ރެއާލް މެޑްރިޑް ކައިރިން ވަނީ މޮޅުވެފައެވެ. އޭސީ މިލާން ވަނީ ރެއާލް މެޑްރިޑް ކައިރިން ބަލިވެ، ޔުވެންޓަސް ކައިރިން އެއްވަރު ވެފައެވެ.

މި މެޗުގައި ދެ ޓީމުންވެސް މި ހޫނުމޫސުމުގައި ސޮއިކުރި ބައެއް ކުޅުންތެރިން ބޭނުން ކޮށްފައިވެއެވެ. އެގޮތުން ބާސެލޯނާގެ ފުރަތަމަ 11 ގައި އޮރިއެލް ރޮމޭއު ހިމަނާފައިވާއިރު، އޭސީ މިލާނުން ފެށީ ކްރިސްޓިއަން ޕިލިސިޗާއި ލޮފްޓަސް ޗީކް އާއެކުއެވެ.

އައު ސީޒަނުގެ ފުރަތަމަ މެޗުގައި ބާސެލޯނާ ނިކުންނާނީ ގެޓާފޭ އާ ދެކޮޅަށެވެ. އަދި އޭސީ މިލާން ނިކުންނާނީ ބޮލޯނިއާ އާ ދެކޮޅަށެވެ.