ރައީސް މުރައިދޫ ރައްޔިތުންނަށް: މިފަހަރު އެމްޑީޕީއަށް އަޣުލަބިއްޔަތު ދެއްވާ! އެއީ ގެއްލިގެންދާނެ ވޯޓެއް ނޫން!
2 އޯގަސްޓު 2023 | ބުދަ 10:12ޕީޕީއެމުން މުރައިދޫގައި 3 މަޝްރޫއު، މި ސަރުކާރުން 7 މަޝްރޫއު ނިންމާލައިފި
ރައީސް މުރައިދޫ ރައްޔިތުންނާ ބައްދަލުކުރައްވަނީ
ކުރިއަށް އޮތް ރިޔާސީ އިންތިޚާބުގައި އެމްޑީޕީއަށް ދޭ ވޯޓަކީ ގެއްލިގެންދާނެ ވޯޓެއް ނޫންކަމަށާއި، އަގުލަބިއްޔަތު އެ ޕާޓީއެއް ދިނުމަށް ހއ. މުރައިދޫ ރައްޔިތުންގެ ފަރާތުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އެދިވަޑައިގެންފިއެވެ.
ހއ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ މުރައިދޫއަށް ވަޑައިގެން ރައީސް ވަނީ، ޚިޔާލުތަފާތުވުންތައް އޮތްނަމަވެސް ގައުމުގެ އަމާންކަމާއި ހަމަޖެހުން ގެނުވައިދިނުމަށް އެމަނިކުފާނަށް ވޯޓު ދިނުމަށް އެދިވަޑައިގެންފައެވެ. އަދި މުރައިދޫއަކީ 2018 ވަނަ އަހަރުގެ ރިޔާސީ އިންތިޚާބުގައި ޕީޕީއެމަށް އަޣުލަބިއްޔަތު ލިބުނު ރަށަކަށް ވީނަމަވެސް މިފަހަރު އެމްޑީޕީއަށް އެ ތާއީދު ދިނުމަށް އެދިވަޑައިގެންނެވިއެވެ.
ރައީސް ވަނީ އެމަނިކުފާނަށް މިފަހަރު ތާއީދުކުރަންވީ ސަބަބުތައްވެސް ހާމަކުރައްވާފައެވެ. އެގޮތުން އަޣުލަބިއްޔަތު ދިން ޕާޓީ (ޕީޕީއެމް)ގެ ސަރުކާރުގައި އެ ރަށުގައި އެންމެ 3 މަޝްރޫއު ހިންގިއިރު، މި ސަރުކާރުން ހަތް ޕްރޮޖެކްޓުގެ މަސައްކަތް ނިންމާފައިވާކަމަށް ވިދާޅުވިއެވެ. އަދި ކުރިއަށްވެސް އެ ރަށުގެ ޕްރޮޖެކްޓުތައް ހުރިކަން ރައީސް ފާހަގަކުރެއްވިއެވެ.
ދެ ސަރުކާރުގެ ތަޖުރިބާވެސް ރައްޔިތުން ކޮށްފައިވާނެކަން ފާހަގަކުރައްވައި ރައީސް ވިދާޅުވީ، ދެ ސަރުކާރުގެ ތަފާތު ރައްޔިތުންނަށް އެނގޭނެ ކަމަށެވެ. އެހެންކަމުން ވެރިޔަކު ހޮވާއިރު ވިސްނަންވީ ރައްޔިތުންނާއި ގައުމަށް އެންމެ ފައިދާހުރި ގޮތަކާމެދު ކަމަށް އެމަނިކުފާނު ވިދާޅުވިއެވެ.
ރައީސް ވަނީ މުރައިދޫއަށް ކޮށްދެއްވާނެ ކަންކަންވެސް ހާމަކުރައްވާފައެވެ. އެގޮތުން, ރަށުގެ މަގުތައް, ފެންހިންދާ ނިޒާމާއެކު ތަރައްގީކޮށްދެއްވާނެ ކަމަށާއި، ރަށުގެ ގިރާ ސަރަހައްދު ހިމާޔަތް ކުރައްވާނެ ކަމަށްވެސް ވިދާޅުވިއެވެ. އަދި ރަށުގެ އަންހެނުން އެދޭ ގޮތަށް ވޮލީ ކޯޓެއްވެސް ތަރައްގީ ކުރައްވާނެ ކަމުގެ ޔަގީންކަން ރައީސް ދެއްވިއެވެ.
