މީގެ ފަސް ވަރަކަށް އަހަރު ކުރިން، 17 ނޮވެމްބަރު 2018 ގައި ވުޖޫދުވި ރައީސް އިބްރާހީމް މުޙައްމަދު ޞާލިހުގެ ސަރުކާރުގެ އެންމެ މުހިންމު އެއް ސިޔާސަތަކީ، ސްކޫލް ކުދިންނަށް ހެނދުނުގެ ނާސްތާ ދިނުމުގެ ޕްރޮގްރާމް ކުރިއަށް ގެންދިޔުމެވެ. ސަރުކާރު ވުޖޫދުވެ، މަދު ދުވަސްކޮޅެއްގެ ތެރޭގައި ރާއްޖޭގެ ސްކޫލް ތަކުގައި ރަސްމީކޮށް އެ ޕްރޮގްރާމް ފެށި އެވެ. މިއީ ސްކޫލްތަކުގައި ތައުލީމު ހާސިލްކުރަމުންދާ ދަރިވަރުންނަށް އަމާޒުކޮށްގެން ސަރުކާރުން ފެށި ވަރަށް ބޭނުންތެރިކަމެއް ކަމަށް ގިނަ ބެލެނިވެރިން ދެކެ އެވެ.

ފަސް އަހަރުގެ ދައުރު ހަމަވާން ކައިރިވެފައިވާއިރު، ރައީސް ޞާލިޙު މިހާރު ގެންދަވަނީ ކުރިއަށް އޮތް އިންތިޚާބަށް ކެމްޕެއިން ކުރައްވަމުންނެވެ. އެގޮތުން މިހާރު އެމަނިކުފާނު ގެންދަވަނީ ބޮޑުތިލަދުންމައްޗަށް ދަތުރު ކުރައްވަމުންނެވެ. ބޮޑުތިލަދުންމައްޗަށް ކުރައްވަމުން ގެންދަވާ ދަތުރުގައި ބުދަ ދުވަހު އެމަނިކުފާނު އެންމެ ފުރަތަމަ ވަޑައިގެންނެވީ ބާރަށެވެ. އެރަށުން އެމަނިކުފާނަށް މަރުޙަބާ ދެންނެވުމަށް ގިނަ ރައްޔިތުން ނުކުމެތިބިއިރު، އެތަނުން އެންމެ ފާހަގަކޮށްލެވުނީ އައިޝަތު މިޝްޔާ އެވެ. ރަތް ލިބާހެއްގައި ހުރި ތުއްތު މިޝްޔާގެ އަތުގައި އޮތީ ރީނދޫ ކުލައިގެ ގަނޑެކެވެ. އެ ގަނޑުގައި ރަތް ކުލައިން ލިޔެފައި ވަނީ "އިބޫ ރައީސް" މިފަދައިންނެވެ.

ސަލާމް ކުރުމުގެ ތެރެއިން ރައީސް ޞާލިޙު މިޝްޔާއާ އަރާ ހަމަވުމާއެކު، މިޝްޔާ ރައީސަށް އެ ސިޓީ ކިޔައިދިނެވެ. އެ ސިޓީ މެދުވެރިކޮށް މިޝްޔާ ރައީސް ޝުކުރު އަދާކުރީ ނާސްތާ ޕްރޮގްރާމާ ގުޅޭ ގޮތުންނެވެ. މިޝްޔާގެ ސިޓީގައި ބުނީ، ނާސްްތާ ޕްރޮގްރާމް ފޯރުކޮށްދޭތީ ވަރަށް އުފާވާ ކަމަށެވެ. ސްކޫލަށް ތައުލީމު ހާސިލްކުރުމަށް ކޮންމެ ދުވަހަކު ދާއިރު، ކިރު ޕެކެޓު ބޯ ވާހަކަ މިޝްޔާ ހިއްސާކުރީ ނުހަނު ހިނިތުންވުމާއެކު އެވެ. އެއަށްފަހު މިޝްޔާ ބުނީ ކިރު ޕެކެޓު ވަރަށް މީރު ކަމަށާއި، ރައީސަށް ޝުކުރު އަދާ ކުރާ ކަމަށެވެ. އެއަށްފަހު މިޝްޔާ ރައީސަށް ކުރީ ސުވާލެކެވެ. އެއީ މިޝްޔާ ގްރޭޑު ދޭކަށް ދިޔުމުން ވެސް ނާސްތާ ޕްރިގްރާމް ލިބޭނެތޯއެވެ؟ އެއަށްފަހު މިޝްޔާ ބުނީ، އެ ނާސްތާ ލިބެން ވަރަށް ބޭނުންވާ ކަމަށެވެ. މިޝްޔާ ސިޓީ ކިޔަމުންދިޔައިރު، ރައީސް ޞާލިޙު ހުންނެވީ އަޑުއައްސަވާށެވެ. ސިޓީ ކިޔައި ނިމުމަށްފަހު މިޝްޔާ ވަނީ ރައީސަށް ސިޓީ އަރުވައިފަ އެވެ.

ރައީސް ޞާލިހުގެ މި ފަސް އަހަރުގައި ނާސްތާ ޕްރޮގްރާމް ހިމެނެހޭން ތައުލީމީ ދާއިރާ އަށް ވަނީ ބޮޑު ބަދަލެއް ގެންނަވައިފަ އެވެ. ނާސްތާ ޕްރޮގްރާމްގެ އިތުރުން މުދައްރިސުންގެ މުސާރަ ވެސް ރައީސް ޞާލިހުގެ މި ފަސް އަހަރުގައި ވަނީ ބޮޑު ކޮށްދެއްވައިފަ އެވެ. މިހާރު ރައީސް ޞާލިޙު ކުރައްވަމުން ގެންދަވާ ކެމްޕެއިން ދަތުރުގައި ވެސް އަންނަނީ ތައުލީމީ ދާއިރާގެ އިތުރުން ހުރިހާ ދާއިރާ އަކަށް އަމާޒުކޮށް ގިނަ ކަންތައްތަކެއް ކޮށްދެއްވާނެ ކަމަށް ވިދާޅުވަމުންނެވެ.