އިންޑިޔާގައި ކުނި ނެގުމުގެ މަސައްކަތް ކުރާ 11 އަންހެނަކަށް ނަސީބު ލޮޓަރީ ދިމާވެއްޖެ

އިންޑިޔާގެ ކެރަލާ ސްތޭޓްގައި ލާރި އެއްކޮށްގެން ނަސީބު ލޮޓަރީ ޓިކެޓެއް ގަތް 11 އަންހެނުންނަށް ނަސީބު ދިމާވެއްޖެއެވެ. ސަތޭކަ މިލިއަން ރުޕީސް ލިބުނު މި މީހުންނަކީ ގޭގެއިން ކުނި ނެގުމުގެ މަސައްކަތުގައި އުޅޭ ބައެއް ކަމަށް ވެއެވެ. މި މަސައްކަތުން އެމީހުންނަށް ލިބެނީ ދުވާލަކު 250 ރުޕީސްވަރު ކަމަށް ވެއެވެ. މިއަދަދަކީ އެކަކުގެވެސް އާއިލާގެ ޚަރަދުތަކަށް ފުދޭ މިންވަރެއް ނޫނެވެ.  

ޖޫން 11 ވަނަ ދުވަހު މި މީހުން ގުޅިގެން ގަނެފައިވަނީ 250 ރުޕީސްއަށް ދޭ ލޮޓަރީ ޓިކެޓެކެވެ. މިކަމުގައި އިސްކޮށް އުޅުނު ރާދާ، މީހެއްގެ އަތުން 25 ރުޕީސް ނަގަމުން ހިނގިއިރު، އެކަމުގައި ބައިވެރިވާހިތުން އިން އެކަކު އަތުގައި ލާރިނެތިގެން އެވާހަކަ ބުނިކަމަށް ވެއެވެ. އެއާއެކު އެހެން މީހަކު އަތުގައި އޮތް 25 ރުޕީސް އޭނާއާ "ޝެއަރ" ކުރި ކަމަށް ވެއެވެ. 12.5 ރުޕީސް ފަހުން ދޭގޮތަށެވެ. އަދި ލޮޓަރީ ލިބިއްޖެނަމަ ދެ މީހުންނަށް ބައި އަޅާގޮތަށްވެސް އެއްބަސްވިއެވެ. އެއީ އެ ދެމީހުންގެ މައްޗަށް އެބައި ބަހާ ގޮތަށެވެ.

ލޮޓަރީ ދިމާވެއްޖެކަން މި މީހުންނަށް އެނގުނީވެސް އެކަން އިއުލާންކުރި ދުވަހުގެ ފަހު ދުވަހުއެވެ. އެއީ އޭގެ ތެރެއިން އެކަކުގެ ފިރިމީހާ ގާތުގައި ބުނެގެން ބެލި ބެލުމުންނެވެ.

ނަސީބު ދިމާވި އެންމެންނަކީވެސް އިންތިހާ ދަރަޖައިގެ ފަގީރުކަމުގައި އުޅެމުންދާ މީހުންނެވެ. އެކަކުގެ ފިރިމީހާ ވަނީ ކިޑްނީ ފެއިލްވުމުގެ ސަބަބުން މިދިޔަ އަހަރު ނިޔާވެފައެވެ. އޭނަބުނިގޮތުގައި ޑަޔަލަސިސް ހެދުމަށް އެއްކުރާ ފައިސާއިންވެސް ފިރިމީހާ ނަސީބު ލޮޓަރީ ގަނެއެވެ. ދެމަފިރިން އަޅަން މަސައްކަތްފެށި ގެވެސް ހުރީ ނުނިންމިފައި ކަމަށް އޭނާ ބުންޏެވެ.

އެކަކުގެ ގެ މޫސުމީ ވިއްސާރާގައި މުޅިން ފަނާވެފައިވާއިރު، އޭނާހުރީ އައު ހިޔާވައްސެއް އެޅޭނެ ފަދަވެސް ނެތި، މަގުމަތިވެފައެވެ.

އެހާލުގައިވެސް ގިނަ މީހުން ވަނީ ކުދިންނަށް ކިޔަވައިދިނުމަށްޓަކައި، ނުވަތަ ދިމާވާ ބޮޑެތި ކަންކަމާ ގުޅިގެން ލޯނުވެސް ނަގާފައެވެ.

ނަސީބު ލޮޓަރީ ދިމާވުމަށްފަހު އެންމެންވެސް ތިބީ ވަރަށް އުފަލުންނެވެ. ޓެކްސްއަށް ކެނޑުމަށްފަހު ގްރޫޕަށް 63 މިލިއަން ރުޕީސް ލިބެއެވެ. އެއީ ޓިކެޓް ލާރި ޝެއަރކުރި ދެމީހުން ފިޔަވައި ކޮންމެ މީހަކަށް 6.3 މިލިއަން ރުޕީސްއެވެ.

ފައިސާ ލިބުނުކަން އެނގުނު ދުވަހުގެ ފަހު ދުވަހުވެސް އެމީހުން މަސައްކަތު ނިކުތް ކަމަށް ވެއެވެ. އެމީހުން ބުނިގޮތުގައި އެފަދަ ނަސީބު އެމީހުންނަށް ލިބުނީ އެމަސައްކަތުގެ ތެރެއިންނެވެ. އެހެންކަމުން އެ މަސައްކަތް ދޫކޮށްނުލުމަށް އެންމެންވެސް އެއްބަސްވެފައިވާކަމަށް ރާދާ ބުނެފައިވެއެވެ.