މަސްތުވާތަކެތި ބޭނުންކުރުން ހުއްޓުވުމަށް އެޅި އެންމެ މުހިންމު ފިޔަވަޅަކީ ސިއްހީ ނަޒަރަކުން އެ މައްސަލައަށް ބެލުން - ނަސީމް
އަމާޒަކީ އަތޮޅުތެރޭގެ ސިއްހީ ފަރުވާ ދޭ ތަންތަނުގައި މަސްތުވާތަކެތި ބޭނުންކުރާ މީހުންނަށް ފަރުވާ ދިނުމަށް މަގުފަހިކުރުން ކަމަށް މިނިސްޓަރު ވިދާޅުވި
ހެލްތް މިނިސްޓަރު
މި ސަރުކާރުން މަސްތުވާތަކެތި ނައްތާލުމަށް އެޅި އެންމެ މުހިންމު ފިޔަވަޅަކީ މަސްތުވާތަކެތި ބޭނުންކުރުމުގެ މައްސަލައަށް ސިއްހީ ނަޒަރަކުން ބަލަން ފެށުން ކަަމަށް، ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ހޯމަ ދުވަހު ބޭއްވި އެންޑި ޑްރަގް ޑޭގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.
މަސްތުވާތަކެތީގެ މައްސަލަ ހައްލުކުރުމަށް މި ސަރުކާރުން މުހިންމު މަސައްކަތްތަކެއް ކޮށްދެއްވާފައިވާކަމަށް ވެސް އޭނާ ވިދާޅުވިއެވެ. އެގޮތުން އެންޑީސީސީގެ ފަރާތުން ދޭ މަޝްވަރާއާއި ލަފަޔަށް އިޖާބަދީފައި ވާކަމަށާއި ސިއްހީ ނަޒަރަކުން އެކަމާމެދު ބަލަން ފެށީ އެ މަގްސަދުގައި ކަމަށްވެސް މިނިސްޓަރު ވިދާޅުވިއެވެ. ހަމައެހެންމެ 5 މެއި 2021ގައި އެންޑީއޭގެ މަސައްކަތް ހެލްތު މިނިސްޓްރީގެ ދަށަށް ބަދަލުކުރުމަކީ ދުނިޔޭގެ މަގުން މަސްތުވާތަކެތީގެ މައްސަލަ ހައްލުކުރަން އެޅުނު މުހިންމު ފިޔަވަޅެއް ކަމަށްވެސް މިނިސްޓަރ ވިދާޅުވިއެވެ.
މީގެ އިތުރުން މަސްތުވާތަކެތި ބޭނުންކުރާ މީހުންނަށް ފަރުވާދިނުމުގެ މަސައްކަތްތައް ކުރުމަށް ގާނޫނީ ގޮތުން ގެންނަންޖެހޭ ބަދަލުތައް ގެނައުމަށް މަޖިލީހުގެ ތެރެއިން މިހާރުވެސް މަސައްކަތްތައް ކުރިއަށްދާކަމަށް އެމަނިކުފާނު ވިދާޅުވިއެވެ. އެހެންކަމުން މުޖުތަމައުއިން މަސްތުވާތަކެތި ބޭނުންކުރުމާމެދު ދެކޭ ގޮތް ބަދަލުވަމުންދާ ކަމަށާއި، އެއީ ރަނގަޅު ފާލެއްކަމަށް މިނިސްޓަރު ވިދާޅުވިއެވެ. އަމާޒަކީ އަތޮޅުތެރޭގެ ސިއްހީ ފަރުވާ ދޭ ތަންތަނުގައި މަސްތުވާތަކެތި ބޭނުންކުރާ މީހުންނަށް ފަރުވާ ދިނުން މަގުފަހިކުރުން ކަމަށް މިނިސްޓަރު ވިދާޅުވިއެވެ.
މަސްތުވާތަކެއްޗާ ދެކޮޅަށް ރާއްޖެއިން ކުރާ މަސައްކަތުގައި ޑަބްލިއުއެޗްއޯގެ ދައުރު ވަރަށް މުހިންމު ކަމަށްވެސް މިނިސްޓަރު ވަނީ ވިދާޅުވެފައެވެ. އަދި މަސްތުވާތަކެއްޗާ ދެކޮޅަށް މަސައްކަތްކުރުމަށް ކަންކަން ރޭވުމަށް ބޭނުންވާ ފަންނީ ލަފަޔާއި އެހީތެރިކަން ފޯރުކޮށްދިނުމުގައި ޑަބްލިިއުއެޗްއޯއިން އަދާކުރާ ދައުރު ފާހަގަކުރައްވައި އެމަނިކުފާނު ވަނީ ޑަބްލިއުއެޗްއޯއަށް ޝުކުރު އަދާކުރައްވާފައެވެ. އަދި ޔޫއެންއޯޑީސީން އެ ދާއިރާއިން މީހުން ބިނާކުރުމަށް އަދާކުރާ ދައުރަށްޓަކައި ޝުކުރު އަދާކުރެއްވިއެވެ.
