އޮންލައިންކޮށް ރީރެޖިސްޓަރ ވުމުގެ ފުރުސަތު އޮގަސްޓް 2 ވަނަ ދުވަހާ ހަމައަށް
31 ޖުލައި 2023 | ހޯމަ 15:46ހާޒިރުވެ ފޯމު ހުށަހަޅައިގެން ރީރެޖިސްޓަރ ވުމުގެ މުއްދަތު ހަމަވާނީ އަންނަ ހޮނިހިރު ދުވަހަށް
އިލެކްޝަންސް ކޮމިޝަންގެ އިންތިޚާބާބެހޭ މަރުކަޒު
ސެޕްޓެންބަރު 9 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމަށް އޮންލައިންކޮށް ފޯމު ހުށަހެޅުމުގެ ސުންގަޑި، އޮގަސްޓު 2 ވާ ބުދަ ދުވަހުގެ ނިޔަލަށް އިލެކްޝަންސް ކޮމިޝަނުން އިތުރުކޮށްފިއެވެ.
އޮންލައިންކޮށް ރީރެޖިސްޓަރ ކުރަން ކުރިން ހުޅުވާލި މުއްދަތު ހޯމަ ދުވަހުގެ ރޭ 12:00 ޖަހާއިރަށް ހަމަވެއެވެ. މުއްދަތު ހަމަވާން ކައިރިވެފައިވަނިކޮށް އީސީން ކުރި އިއުލާނެއްގައި ވަނީ، އޮންލައިންކޮށް ރީރެޖިސްޓަރ ކުރުމުގެ މުއްދަތު އޮގަސްޓް 2 ވާ ބުދަ ދުވަހުގެ ނިޔަލަށް އިތުރުކޮށްދީފައިވާ ކަމަށެވެ.
ރީރެޖިސްޓަރ ކުރުމަށް ކޮމިޝަނުން ހުޅުވާލާނީ ޖުލައި މަހުގެ 16، ވަނަ ދުވަހުއެވެ. އޮންލައިންކޮށް ރީރެޖިސްޓަރ ކުރާގޮތަށް ހަމަޖެހި، އެ ފުރުސަތު ބުދަ ދުވަހާ ހަމައަށް އޮތް ނަމަވެސް، ހާޒިރުވެ ފޯމު ހުށަހަޅައިގެން ރީރެޖިސްޓަރ ވުމުގެ މުއްދަތު ހަމަވާނީ އަންނަ ހޮނިހިރު ދުވަހަށެވެ.
އެންމެ ފަހުން ބޭއްވި ކައުންސިލް އިންތިޚާބުގައި މާލޭގައި ވޯޓުލާން ރަޖިސްޓަރީވި މީހުން ރިޔާސީ އިންތިޚާބުގައި ވެސް އޮޓޮމެޓިކުން އޮންނާނީ މާލޭގައި ވޯޓުލާގޮތަށް ރަޖިސްޓަރީކޮށްފައެވެ.
އެހެންކަމުން މި ފަހަރު މާލޭގައި ވޯޓުލާން ބޭނުންވާ އެހެން ރަށްރަށުގެ ރަށްވެހީން ރީރެޖިސްޓަރ ކުރާކަށް ނުޖެހޭނެއެވެ. ނަމަވެސް އޭރު މާލޭގައި ވޯޓުލާފައި މި ފަހަރު އެހެން ތަނެއްގައި ވޯޓުލާނަމަ ރީރެޖިސްޓަރ ކުރަން ޖެހޭނެއެވެ. އަދި އޭރު އެހެން ތަނެއްގައި ވޯޓުލާފައި މި ފަހަރު މާލޭގައި ވޯޓުލާނަމަ ރީރެޖިސްޓަރ ކުރަން ޖެހޭނެއެވެ.
އީސީން ބުނީ މިދިޔަ ހޮނިހިރު ދުވަހާ ހަމައަށް 9،000އްހާ މީހުން ރީރެޖިސްޓަރ ވެފައިވާކަމަށެވެ. އަދި ރީރެޖިސްޓްރޭޝަނަށް ލިބޭ ތަރުހީބު ކުޑަކަމަށް އީސީން ބުނެއެވެ.
މުޅި ރާއްޖޭގެ މީހުން ދިރިއުޅޭ ހުރިހާ ރަށަކާއި ރިސޯޓުތައް އަދި ސިނާއީ ރަށްތައް ހިމަނައިގެން ޖުމްލަ 604 ވޯޓު ފޮށި މިއަހަރު ބެހެއްޓުމަށް ނިންމާފައިވެއެވެ. މި އިންތިޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވެއެވެ.
