ބުރުގާ އަޅައިގެން ވޯލްޑް ކަޕުގައި ކުޅުނު ފުރަތަމަ ކުޅުންތެރިޔަކަށް މޮރޮކޯގެ ބެންޒީނާ

ވޯލްޑް ކަޕެއްގައި ބުރުގާ އަޅައިގެން ކުޅުނު ފުރަތަމަ ކުޅުންތެރިޔާގެ ޝަރަފު، މޮރޮކޯގެ ޑިފެންޑަރު ނުހައިލާ ބެންޒީނާ ހޯދައިފިއެވެ.

ދެކުނު ކޮރެއާ އަތުން 1-0ން މޮޅުވި މެޗުގައި ފުރަތަމަ ފަހަރަށް މުބާރާތުގައި ކުޅުނުއިރު، އުމުރުން 25 އަހަރުގެ ކުޅުންތެރިޔާ ކުޅެފައިވަނީ ބުރުގާ އަޅައިގެންނެވެ. މިއާއެކު ގިނަ ބައެއްގެ ސަމާލުކަން ވަނީ އޭނާއަށް ލިބިފައެވެ.

ސިއްހަތާއި ސަލާމަތީ ސަބަބުތަކަށްޓަކައި ކަމަށް ބުނެ ފީފާއިން މީގެކުރިން ވަނީ ބުރުގާ އަޅައިގެން ކުޅުން މަނާކޮށްފައެވެ. ނަމަވެސް، އެ ގަވައިދު އުވާލައި، 2014 ވަނަ އަހަރު ވަނީ ބުރުގާ އަޅައިގެން ކުޅުން ހުއްދަކޮށްފައެވެ.

މޮރޮކޯއަކީ އަލަށް ވޯލްޑް ކަޕުގައި ކުޅޭ 8 ޓީމުގެ ތެރެއިން އެއް ޓީމެވެ. އަދި އެއީ އަންހެނުންގެ ވޯލްޑް ކަޕަށް ކޮލިފައިވި އަރަބި ނުވަތަ އުތުރު އެފްރިކާގެ ފުރަތަމަ ގައުމެވެ.

އަންހެނުންގެ ވޯލްޑް ކަޕުގައި ޖަރުމަނު އަތުން 6-0ން ބަލިވި މެޗުގައި ބެންޒީނާއަށް ކުޅުމުގެ ފުރުސަތެއް ނުލިބެއެވެ.