މަސައްކަތް ކުރަނީ ކުރިނބީ ބަނދަރުގެ މަސައްކަތް ނިންމާ، ރައްޔިތުންނާއި ހަވާލުކުރުމަށް: އާޒިމް
މިބަނދަރުގެ މަޝްރޫއަށް 40 މިލިއަން ރުފިޔާ ހޭދަވާނެ
އެމްޓީސީސީގެ ސީއީއޯ އާދަމް އާޒިމް ވާހަކަދައްކަވަނީ
ހދ. ކުރިނބީ ބަނދަރު ބޮޑު ކުރުމުގެ މަސައްކަތްތައް ކުރިއަށްދާއިރު، އަވަހަށް ނިންމާލައި ރައްޔިތުންނާއި ހަވާލުކުރުމަށް މަސައްކަތް ކުރަމުންދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެރަށުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ، ކުރިނބީގެ ބަނދަރަށް ވަރަށް ބޮޑު ބައެއް އިތުރުވެގެންދާނެ ކަމަށާއި، މިމަސައްކަތްތައް ކުރިއަށްދާއިރު، މިހާރުގެ ބަނދަރު މަރާމާތުކުރުމުގެ މަސައްކަތް ވެސް ކުރިއަށްދާ ކަމަށެވެ.
އާޒިމް ވިދާޅުވީ މިހާރު އޮތް ބަނދަރުގެ ރިވެޓްމަންޓް އެއްކޮށް ނަގާ އެއަށް ވުރެ މާ ބޮޑު ރިވެޓްމަންޓެއް ޖެހިގެންދާނެ ކަމަށާއި، މިހާރު ކުރިއަށްދަނީ ބަނދަރަށް އިތުރުކުރާ ބައިގެ މަސައްކަތް ކަމަށެވެ.
އާޒިމް ވިދާޅުވީ މިބަނދަރުގެ މަޝްރޫއަށް 40 މިލިއަން ރުފިޔާ ހޭދަވާނެ ކަމަށެވެ. މިބަނދަރު ހެދިގެންދަނީ ވަރަށް ބޮޑަށް ރަށުގެ ތެރެއަށް ކަމަށާއި، މުޅި ބަނދަރު ނިމޭއިރު ބަނދަރު ވަރަށް ފުރިހަމަވާނެ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ މަސައްކަތް ކުރަމުން ދަނީ ބަނދަރުގެ މަސައްކަތް ވީހާ ވެސް އަވަހަށް ނިންމާލައި، ރައްޔިތުންނާއި ހަވާލުކުރުމަށް ކަމަށެވެ.
މި މަޝްރޫއުގެ ދަށުން 4،389 ކިއުބިކް މީޓަރަށް ކުރިނބީ ބަނދަރު ފުންކުރާނެ އެވެ. ބަނދަރަށް އިތުރުކުރެވޭ ބައި 30،172 ކިއުބިކް މީޓަރަށް ފުންކޮށް، ބަނދަރަށް ވަންނަ ނެރު 2،040 ކިއުބިކް މީޓަރަށް ފުންކުރާނެ އެވެ.
މީގެ އިތުރުން މި މަޝްރޫއުގައި 295 މީޓަރު ބޮޑު ހިލައިގެ ބޭރުތޮށި ޖެހުމާއި 70 މީޓަރު ރިވެޓްމަންޓު ޖެހުމާއި 314 މީޓަރު ސްކޯރިންގް އެޕްރޮން ޖެހުން އަދި ދެ ނެވިގޭޝަން ލައިޓު ހަރުކުރުން ހިމެނެ އެވެ.
