ރައުލް ހިމެނޭޒް ފުލަމް އަށް ސޮއިކޮށްފި

ވުލްވްސް އަށް ކުޅެމުން އައި މެކްސިކޯގެ ފޯވާޑް ރައުލް ހިމެނޭޒް ފުލަމް އަށް ސޮއިކޮށްފި އެވެ.

ވުލްވްސް ދޫކޮށް އޭނާ ފުލަމް އަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެ މުއްދަތު ހަަމަވުމުން އިތުރު އެއް އަހަރަށް އެއްބަސްވުން އައު ކުރުމުގެ ފުރުސަތު ފުލަމް އަށް ލިބެ އެވެ. އެނާ ހޯދުމަށް ފުލަމް އިން ވަނީ ވުލްވްސް އަށް 5.5 މިލިއަން ޕައުންޑު ދައްކައިފަ އެވެ.

މެކްސިކޯގެ ކުލަބު އެމެރިކާ އިން ސީނިއާ ކެރިއަރު ފެށި ހިމެނޭޒް އެންމެ ފުރަތަމަ 2018 ވަނަ އަހަރު ވުލްވްސް އަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެއް އަހަރަށް އެކުލަވާލި އެއްބަސްވުން 2019 ވަނަ އަހަރު ހަމަވުމުން، ވުލްވްސް އިން ވަނީ އޭނާއާއެކު ދާއިމީ އެއްބަސްވުމެއް އެކުލަވާލައިފަ އެވެ. ހިމެނޭޒް ވަނީ މިހާތަނަށް ވުލްވްސް އަށް ކުޅެދިން 166 މެޗުގައި 57 ލަނޑު ޖަހައިފަ އެވެ. ވުލްވްސް އަށް ބަދަލުވުމުގެ ކުރިން އޭނާ ވަނީ އެތުލެޓިކޯ މެޑްރިޑު އަދި ބެންފީކާ އަށް ވެސް ކުޅެފަ އެވެ.