ކުށުގެ ރެކޯޑާއި ކުށް ތަކުރާރުކޮށްފައިވުމުގެ މައްޗަށް ބަލައި، ބަންދަށް ލުޔެއް ނުދިން
މި މައްސަލައިގެ ދައުވާ ހުށައަޅާފައިވަނިކޮށް، އޭނާއާ ގުޅޭ މިފަދަ އެހެން މައްސަލައެއް ހުށައެޅިފައިވޭ
މި މައްސަލައިގައި ދައުލަތުން ދައުވާކޮށްފައިވަނީ ޅ ނައިފަރު ކަސްތޫރިމާގޭ ޔޫސުފް މުނީރުގެ މައްޗަށް
ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވާ މީހެއްގެ ކުށުގެ ރެކޯޑާއި ކުށް ތަކުރާރުކޮށްފައިވުމުގެ މައްޗަށް ބަލައި، ބަންދަށް ލުޔެއް ނުދިނުމަށް ކްރިމިނަލް ކޯޓުން ނިންމައިފިއެވެ.
މި މައްސަލައިގައި ދައުލަތުން ދައުވާކޮށްފައިވަނީ ޅ ނައިފަރު ކަސްތޫރިމާގޭ ޔޫސުފް މުނީރުގެ މައްޗަށެވެ. އޭނާގެ މައްޗަށް ދައުލަތުން ދެ ދައުވާއެއް އުފުލާފައިވެއެވެ. އެއީ ޑައިމޯފިން ޓްރެފިކް ކުރުމުގެ ކުށުގެ ދައުވާއާއި އަދުލު އިންސާފު ޤާއިމު ކުރުމަށް ހުރަސް އެޅުމުގެ ކުށުގެ ދައުވާއެވެ.
މި އަޑުއެހުމުގައި މިހާރު މައްސަލަ ބައްލަވާ ގާޒީ އިބްރާހީމް ޒިހުނީވަނީ ގާޒީ ބަދަލުވެފައިވާކަން އަންގަވައި، މައްސަލަ ގޮސްފައިވާ ހިސާބު ދައުލަތާއި ދިފާއުން އޮޅުންފިލުއްވާފައެވެ.
މި މައްސަލައިގައި މިހާރު ވަނީ ޝަރީއަތްވެސް ފަށައި، ބައެއް ހެކިންގެ ހެކިބަސްވެސް ނަގާފައެވެ.
ގާޒީ ވިދާޅުވީ، މި މައްސަލައިގެ ގާޒީ ބަދަލުވުމާމެދުވެސް ދިގު މުއްދަތެއް ހޭދަވެފައިވާ ކަމަށާއި އޭގެ ކުރިން ތާވަލު ކުރި އަޑުއެހުންތައްވެސް ހެކިން ހާޒިރުނުވެގެންނާއި އެކި ސަބަބުތަކާހުރެ ކެންސަލް ކުރަން ޖެހިފައިވާ ކަމަށެވެ.
ވުމާއެކު މި މައްސަލައިގައި ދައުލަތުން ހުށައަޅާފައިވާ ހެކިން ހާޒިރު ކުރުމަށް ދެން ފުރުސަތު ދެވޭނީ ކުރިއަށް ބާއްވަވާ ދެ އަޑުއެހުމެއްގައި ކަމަށް ގާޒީ ވިދާޅުވިއެވެ. ގާޒީ ވަނީ އެ އަޑުއެހުންތަކަށް ދައުލަތުގެ ހެކިން ހާޒިރު ކޮށްދިނުމަށް ދައުލަތަށް އަންގަވާފައެވެ.
މި މައްސަލައާ ގުޅިގެން ދައުލަތުން ހުށައަޅާފައިވާ 6 ހެއްކެއްގެ ހެކިބަސް އަދި ނެގިފައެއް ނުވެއެވެ.
މި މައްސަލައިގައި ދައުވާ ލިބޭ ފަރާތުން ވަނީ އޭނާގެ ބަންދު މުރާޖައާ ކޮށްދިނުން އެދި ކޯޓަށް ސިޓީއެއް ހުށައަޅާފައެވެ. ނަމަވެސް އޭނާގެ ކުށުގެ ރެކޯޑާއި ކުށް ތަކުރާރުކޮށްފައިވުމުގެ މައްޗަށް ބަލައި، ގާޒީ ވަނީ އެ ފުރުސަތު ނުދެއްވުމަށް ނިންމަވާފައެވެ. އެއީ ދައުލަތުންވެސް އެދޭ ގޮތެވެ.
ދައުލަތުގެ ވަކީލު ވިދާޅުވީ މި މައްސަލައިގެ ދައުވާ ހުށައަޅާފައިވަނިކޮށް، އޭނާއާ ގުޅޭ މިފަދަ އެހެން މައްސަލައެއް ހުށައެޅިފައިވާ ކަމަށެވެ.
ގާޒީ ވަނީ އޭނާގެ ބަލި ޙާލަތާއި ގުޅޭގޮތުން ހުށައަޅާފައިވާ ޝަކުވާތަކާއި ގުޅިގެން ބަލަންޖެހޭ ކަންކަން ބެލުމަށް ދައުލަތަށް އަންގަވާފައެވެ.
