ކުރީގެ ރައީސް އަބްދުﷲ ޔާމީނުގެ ކެނޑިޑެސީ ފޯމު ފުރުމަށް މޯލްޑިވްސް ކަރެކްޝަނަލް ސަރވިސްގެ އެހީތެރިކަމަށް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން އެދިއްޖެއެވެ.

އާދިއްތަ ދުވަހު ކަރެކްޝަންސްއިން ވަނީ ލިއެކިއުންތައް ނުދެއްކުމުން، ޔާމީނުގެ ވަކީލުން އަނބުރާ ފޮނުވާލާފައެވެ. ޔާމީނުގެ ވަކީލުން ވަޑައިގެންނެވީ ކެނޑިޑެސީ ފޯމު ހިފައިގެންކަމަށް ބައެއް ނޫސްތަކުން ރިޕޯޓު ކޮށްފައިވީނަމަވެސް، ވަކީލުން އެކަން ދޮގު ކުރައްވައެވެ.

ޖަލުތަކާއި ޕެރޯލް ޤާނޫނުގެ 86 ވަނަ މާއްދާގައި ބަޔާންކޮށްފައިވަނީ ޤައިދީންނާއި ބަންދު މީހުންނަށް ލިބޭ، ނުވަތަ އެމީހުން ފޮނުވާ ސިޓީ ފަދަ ތަކެތި ކިޔައި، އަޑުއަހައި، ރެކޯޑުކޮށް، ބަލައި ފާސް ކުރުމުގެ އިހުތިޔާރު ޑައިރެކްޓަރ އޮފް ޕްރިޒަންސްއަށް ލިބިގެންވާކަމަށެވެ. ޤައިދީންނަށް ޤާނޫނީ ވަކީލާއި، ކޯޓުތަކާއި، ސަރުކާރުގެ އިދާރާތަކާމެދު ސިޓީ ބަދަލު ކުރެވިދާނެއެވެ. ނަމަވެސް އެގޮތުން ފޮނުވޭ ލިއެކިއުންތައް ބެލުމުގެ ބާރު ޑައިރެކްޓަރ އޮފް ޕްރިޒަންސްއަށް ލިބިގެންވެއެވެ.

ރާއްޖެއެމްވީއާ ވާހަކަ ދައްކަވަމުން ކަރެކްޝަންސްގެ އޮފިޝަލަކު ވިދާޅުވީ، އިންތިހާބުގެ ކެންޑިޑެސީ ފޯމު ފުރުމުގެ ކަންކަމުގައި ޕީޕީއެމްއިން އެ އިދާރާގެ އެހީތެރިކަމަށް އެދިފައިވާ ކަމަށާއި، އެކަމުގައި އެ ޕާޓީއަށް ބޭނުންވާ އެއްބާރުލުން ދޭނެ ކަމަށެވެ.

އެހެންނަމަވެސް، ޔާމީނުގެ ވެރިކަމުގައި ޖަލުތަކާއި ޕެރޯލް ޤާނޫނަށް ގެނައި އިސްލާޙުގައިވާ ގޮތުން، ސިޔާސީ ޕާޓީތަކާއި ޖަމިއްޔާތަކަށް އާންމު މެމްބަރެއްގެ ޙައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ޙަރަކާތްތަކުގައި ބައިވެރިވުމުގެ ޙައްޤުވެސް ޙުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެން ނުވާކަމަށް ވަނީ ބަޔާންކޮށްފައެވެ.

ވީއިރު، ޔާމީނުގެ ކެނޑިޑެސީ ފޯމު ފުރުމަށް ޕީޕީއެމްއަށް ކަރެކްޝަންސްއިން އެހީވަނީ ކޮން އަސާސެއްގެ ދަށުންތޯ ރާއްޖެއެމްވީން ސުވާލު ކުރުމުން، އެކަމަށް ކަރެކްޝަންސްއިން ވަކި ޖަވާބެއް ދީފައެއް ނުވެއެވެ.

ޔާމީނުގެ ވެރިކަމުގައި އޭރު ޖަލުތަކާއި ޕެރޯލްގެ ޤާނޫނަށް މި އިސްލާޙު ގެނައީ ކުރީގެ ރައީސް މުޙައްމަދު ނަޝީދަށް 2018 ވަނަ އަހަރުގެ އިންތިޚާބުގައި ވާދަ ކުރުމުގެ ފުރުސަތުތައް ބަންދުކޮށްލުމުގެ ގޮތުންކަމަށް ތުހުމަތު ކުރެވިފައިވެއެވެ.