ސައުދީގެ ހުށަހެޅުން ޤަބޫލު ނުކޮށް، މާކޯ ސިލްވާ ފުލަމްގައި މަޑުކުރަނީ

ފުލަމްގެ ކޯޗު މާކޯ ސިލްވާ ހޯދުމަށް ސައުދީ ޕްރޯ ލީގުގެ އަލް އަހްލީ އިން ހުށަހެޅި ހުށަހެޅުން ޤަބޫލުނުކޮށް، ފުލަމްގައި މަޑުކުރުމަށް އޭނާ ނިންމައިފި އެވެ.

އަލް އަހްލީ އިން ވަނީ އޭނާ އަށް ދެ އަހަރު ދުވަހުގެ އެއްބަސްވުމެއް ހުށަހަޅައިފަ އެވެ. އެއީ މުސާރަައިގެ ގޮތުގައި 40 މިލިއަން ޔޫރޯ ލިބޭ ހުށަހެޅުމެކެވެ. ނަމަވެސް ފުލަމްގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށް ފަހު ސިލްވާ ނިންމީ ކުލަބުގައި މަޑު ކުރުމަށެވެ. އޭނާ ބުނީ ފުލަމް އަށް އޮތީ ޚާއްސަ ލޯތްބެއް ކަމަށާއި، މިހާރު ހަވާލުކޮށްފައިވާ މަސައްކަތް ކާމިޔާބު ކަމާއެކު ނިންމަން ބޭނުންވާ ކަމަށެވެ. އެހެންކަމުން މިވަގުތު އެހެން އެއްވެސް ކުލަބަކަށް ބަދަލުވާން ބޭނުން ނުވާ ކަމަށް ވެސް ވަނީ ބުނެފަ އެވެ.

ޕޯޗުގަލަށް ނިސްބަތްވާ ސިލްވާ އޭނާގެ ކޯޗިން ކެރިއަރު ފެށީ 2011 ވަނަ އަހަރު އެވެ. އޭގެ ފަހުން މިހާތަނަށް އައިއިރު، ފުލަމް އަކީ އޭނާ އިރުޝާދު ދޭ ހަތް ވަނަ ކުލަބެވެ. އޭނާ އިރުޝާދު ދިން ކުލަބުތަކުގެ ތެރޭގައި ޕޯޗުގަލްގެ އެސްޓޮރިލް، ސްޕޯޓިން، ގްރީކްގެ އޮލިމްޕިއާކޯސް، އިންގްލެންޑުގެ ހަލް ސިޓީ، ވަޓްފޯޑު އަދި އެވަޓަން ހިމެނެ އެވެ. އެވަޓަންގެ ކޯޗުކަމުން އޭނާ ވަކިކޮށްފައި ވަނީ 2019 ވަނަ އަހަރު އެވެ. އޭގެ ފަހުން ފުލަމްއާ ހަވާލުވީ 2021 ވަނަ އަހަރު އެވެ. އޭނާގެ އިރުޝާދުގެ ދަށުން ފުލަމް ވަނީ މިހާތަނަށް 94 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 47 މެޗުން މޮޅުވެ، 29 މެޗުން ބަލިވެފަ އެވެ. 18 މެޗެއް ނިމުނީ އެއްވަރުވެގެންނެވެ.