އޮގަސްޓް މަހުވެސް އިންތިހާ ދަރަޖައިގެ ހޫނުމިން އިހުސާސްކުރަންޖެހޭނެ: ޑަބްލިޔުއެމްއޯ

އޮގަސްޓް މަހުވެސް ދުނިޔޭގެ ބޮޑު ސަރަހައްދަކަށް އިންތިހާ ދަރަޖައިގެ ހޫނުމިން އިހުސާސް ކުރަންޖެހޭނެކަމަށް ވޯރލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިޔުއެމްއޯ)އިން ބުނެފިއެވެ.

ފާއިތުވި ހަފުތާތަކުގައި ދުނިޔޭގެ އެކި ކަންކޮޅުތަކުގައި ވަނީ ހޫނުމިން ރިކޯޑް މިންވަރަކަށް މައްޗަށް ގޮސްފައެވެ. އެގޮތުން މިހަފުތާގެ ކުރީކޮޅު؛ އުތުރު އެމެރިކާ، އޭޝިޔާ، އުތުރު އެފްރިކާ އަދި މެޑިޓެރޭނިއަންގައި ހޫނުމިން ހުރީ 40 ޑިގްރީ ސެލްސިއަސްއަށްވުރެ މަތީގައެވެ. އަދި މިގޮތަށް ގިނަ ދުވަސްތަކެއްވަންދެން ހޫނު މިން މަތީގައި ހުންނާނެކަމަށް ޑަބްލިޔުއެމްއޯއިން ބުނެއެވެ.

ޑަބްލިޔުއެމްއޯގެ ސީނިއަރ އެކްސްޓްރީމް ހީޓް އެޑްވައިޒަރ، ޖޯން ނައިން ވިދާޅުވީ އޮގަސްޓް މަހުގެ ތެރޭގައިވެސް މިގޮތަށް ހޫނުމިން މަތިވާނެކަމަށް ބަލަންޖެހޭކަމަށެވެ.

ދެކުނު ޔޫރަޕްގައި އަންނަނީ ރިކޯޑް މިންވަރަކަށް ހޫނު މިން މަތިވަމުންނެވެ. ކަމާބެހޭ އިދާރާތަކުން ވަނީ، ހޫނު މިން މައްޗަށް ދިޔުމުގެ ސަބަބުން ދިމާވާނެ ސިއްހީ މައްސަލަތައް އިތުރުވެ، ހޫނުގެ ސަބަބުން މީހުން މަރުވުން އިތުރުވެދާނެކަން ހާމަކޮށްފައެވެ.

އެމެރިކާގައި އިންތިހާއަށް ހޫނުމިން މައްޗަށް ގޮސްފައިވާއިރު، މެދުއިރުމަތީގެ ގައުމުތަކުން ވެސް އަންނަނީ އިންތިހާ ދަރަޖައިގެ ހޫނުމިން އިހުސާސްކުރަމުންނެވެ.

ނައިން ވިދާޅުވީ މޫސުމަށް އަންނަ ބަދަލުތަކުގެ ސަބަބުން ހީޓްވޭވް އިތުރުވާނެކަމަށާއި، ހީޓްވޭވް އަންނަލެއްވެސް އަވަސްވަމުން ދާނެކަމަށެވެ. މުޅި ދުނިޔޭގެ ފިނިހޫނުމިން މައްޗަށް ދާކަމަށާއި އެހެންކަމުން އޭގެ ސަބަބުން ހީޓްވޭވް އިތުރުވެގެން ދާނެކަމަށް ނައިން ވިދާޅުވިއެވެ.