ތިނަދޫ އިންޑަސްޓްރިއަލް ޒޯންގެ ފުރަތަމަ ފިޔަވަހި ސެޕްޓެމްބަރަށް ނިންމާލެވޭނެ: އާޒިމް
އިންޑަސްޓްރިއަލް ޒޯނަކީ ރައްޔިތުންނަށް މުހިންމު މަޝްރޫއެއް
ތިނަދޫ އިންޑަސްޓްރިއަލް ޒޯންގެ މަސައްކަތް ކުރިއަށްދަނީ
ގދ. ތިނަދޫގައި ހަދަމުން އަންނަ އިންޑަސްޓްރިއަލް ޒޯންގެ ފުރަތަމަ ފިޔަވަހީގެ މަސައްކަތް އަންނަ ސެޕްޓެމްބަރު މަހަށް ނިންމާލެވޭނެ ކަމަށް އެ މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ހުވަދު އަތޮޅުގައި އެމްޓީސީސީން ކުރިއަށްގެންދާ މަޝްރޫއުތައް ބައްލަވާލެއްވުމަށް ކުރެއްވި ދަތުރުފުޅުގައި ތިނަދޫއަށް ވަޑައިގެން މީޑިއާތަކަށް މައުލޫމާތު ދެއްވަމުންނެވެ. އެގޮތުން، އެ ރަށުގައި ހަދާ އިންޑަސްޓްރިއަލް ޒޯނަކީ ރައްޔިތުންނަށް މުހިންމު މަޝްރޫއެއް ކަމަށާއި އެ މަޝްރޫއުގެ މަސައްކަތް އެމްޓީސީސީން ކުރަނީ ވަރަށް ބޮޑު އިސްކަމެއް ދީގެން ކަމަށް އޭނާ ވިދާޅުވިއެވެ.
ތިނަދޫ އިންޑަސްޓްރިއަލް ޒޯނުގެ މަސައްކަތް ކުރަމުންދަނީ ދެ ފިޔަވައްސަކަށް ބަހާލައިގެންކަން ފާހަގަކޮށް އާޒިމް ވިދާޅުވީ ފުރަތަމަ ފިޔަވަހީގެ ދަށުން ހިއްކަން ޖެހޭ ބިމުގެ ބޮޑުބައި ހިއްކައި، ރިވެޓްމަންޓު ޖެހުމަށްފަހު ޑޮމެސްޓިކް އަދި ކީވޯލްގެ ބޮޑުބައެއްގެ މަސައްކަތް ނިމިފައިވާކަމަށެވެ. އަދި އިންޓަނޭޝަނަލް ކީވޯލް ޖެހުމަށް ބޭނުންވާ ޝީޓްޕައިލް ތިނަދޫއަށް ގެނެސް މި މަހުގެ ތެރޭގައި އިންޓަރނޭޝަނަލް ޕޯޓުގެ މަސައްކަތް ފެށިގެންދާނެ ކަމަށާއި އިންޑަސްޓްރިއަލް ޒޯން ބޮޑުކުރުމަށް ހިއްކަން ޖެހޭ ބައި ވެސް ވަރަށް އަވަހަށް ހިއްކައި ނިމޭނެ ކަމަށް ވެސް އޭނާ ވިދާޅުވިއެވެ.
އާޒިމް ވިދާޅުވި ގޮތުގައި އެމްޓީސީސީއާ މިފްކޯއިން ފަހުން ހަވާލުކުރި އިމާރާތްތަކުގެ މަސައްކަތް ވެސް އެ ކުންފުނިން ހަވާލުކޮށްފައިވާ ތާރީހަށް ނިންމުމަށް މަސައްކަތް ކުރާނެއެވެ.
ތިނަދޫ އިންޑަސްޓްރިއަލް ޒޯނާ ގުޅޭގޮތުން ތިނަދޫ އުތުރު ދާއިރާގެ މެމްބަރު އަބްދުލް މުޣުނީ ވިދާޅުވީ އިންޑަސްޓްރިއަލް ޒޯނެއް ހަދަން ނިންމީ ހުޅަނގު މޫސުމުގައި އެ ރަށަށް އުދަ އަރައި ޖެޓީގައި ހުންނަ އޮޑިދޯނި ފަހަރަށް ބޮޑެތި ގެއްލުންވާތީ އެކަމަށް ހައްލެއް ހޯދައިދިނުމަށް ކުރެވުނު މަސައްކަތުގެ ތެރެއިން ކަމަށެވެ. މި މަޝްރޫއަކީ ތިނަދޫގެ އިގްތިސާދަށް ވަރަށް މުހިންމު މަޝްރޫއެއް ކަމަށް ވެސް އޭނާ ވިދާޅުވިއެވެ.
މި މަޝްރޫއުގެ ދެވަނަ ފިޔަވަހީގެ މަސައްކަތް ވެސް ވަރަށް އަވަހަށް ފަށަން ނިންމާފައިވާކަން ފާހަގަކުރައްވައި އާޒިމް ވިދާޅުވީ ރަށުގެ ރައްޔިތުން ޕިކްނިކް އައިލެންޑެއް ބޭނުންވާ ކަމަށެވެ. އެ އައިލެންޑް ހެދުމުގެ މަސައްކަތް ކުރުމުގެ ކުރިން އީއައިއޭގެ މަސައްކަތް ކުރަން ޖެހޭއިރު އެކަމަށް ދެތިން މަސް ދުވަސް ނަގާނެ ކަމަށާއި އެ މަސައްކަތް އަވަސް ކުރުމަށް ހާއްސަ އިސްކަމެއް ދެއްވާ ކަމަށް ވެސް އޭނާ ވިދާޅުވިއެވެ.
