ލީޑަރެއްގައި ގައިގައި ހުންނަންޖެހޭ އެންމެ މުހިންމު ސިފަޔަކީ މުރާލިކަން، އެކަން ރައީސްގެ ކިބައިން ފެނިގެންދޭ: ޝާހިދު
ރައީސަކީ ހީވާގި، އަދި ކަންކަން ކުރެއްވުމުގައި އަޒުމު ވަރުގަދަ ބޭފުޅެއް ކަމަށް ވިދާޅުވި
އުފާވެރި އަމާން ރާއްޖެ ކެމްޕޭން ޖަލްސާގައި ޝާހިދު ވާހަކަފުޅުދައްކަވަނީ
ލީޑަރެއްގެ ގައިގައި ހުންނަން ބޭނުންވާ ސިފައަކީ މުރާލިކަން ކަމަށާއި، އެ ސިފަ ރައީސްގެ ކިބައިގައި އެބަހުރި ކަމަށް، ބޮޑުތިލަދުންމަތީ ކެމްޕޭން ކޯޑިނޭޓަރު އަދި ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ހއ. ދިއްދޫގައި ބުރާސްފަތި ދުވަހުގެ ރޭ އޮތް އުފާވެރި އަމާން ރާއްޖެ ކެމްޕޭން ޖަލްސާގައި ވާހަކަފުޅުދައްކަވަމުން ޝާހިދު ވަނީ، ރައީސަކީ ހީވާގި ބޭފުޅެއް ކަމަށާއި ކަންކަން ކުރެއްވުމުގައި އަޒުމު ވަރުގަދަ ބޭފުޅެއް ކަމަށް ވިދާޅުވެފައެވެ.
ބޮޑުތިލަދުންމަތި މިއަދު ދެކެމުންދަނީ އައު ސޮފުހާއެއް ކަމަށާއި، ކޮންމެ ރަށެއްގައިވެސް ތަރައްގީގެ ގިނަ މަޝްރޫއުތައް ސަރުކާރުން ކުރިއަށްގެންދާ ކަމަށް ޝާހިދު ވިދާޅުވިއެވެ. ބޮޑުތިލަދުންމަތި، ބޮޑުތިލަދުންމަތީގެ ގޮތުގައި ދެއްކެވުމަށް ރައީސް ކުރައްވާ މަސައްކަތްޕުޅަށް ތައުރީފުކުރައްވާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ސެޕްޓެމްބަރު 9 ވަނަ ދުވަހަކީ ހިބަރާއި ފެމުނަށް ނޫނެކޭ ބުނާ ދުވަސް ކަމަށެވެ. އަދި އެ ދުވަހު ނިކުމެ ވޯޓް އަޅާނީ އުފާވެރި އަމާން ރާއްޖެއަކަށް ކަމަށްވެސް ވިދާޅުވިއެވެ.
ޝާހިދު ވަނީ އެއްބުރުން ރައީސަށް މިފަހަރު ރިޔާސީ އިންތިޚާބު ކާމިޔާބުވެވަޑައިގަންނަވާނެ ކަމަށް ވިދާޅުވެފައެވެ. އަދި ރައީސަކީ ކަންތައްތައް ޕްލޭންކުރައްވައިގެން، ރާއްވަވައިގެން ހިންގަވަން ކެރިވަޑައިގަންނަވާ، ކަންތައްތަކުގެ ދުރާއި ގާތް ބައްލަވާ ބޭފުޅެއް ކަމަށް ވެސް ވިދާޅުވިއެވެ.
