ދިއްދޫ ބިން ހިއްކައި ނިމޭއިރު، އެއާޕޯޓަކާއި ޕިކްނިކް އައިލެންޑެއް އެޅިގެން ދާނެ - ރައީސް
ރައީސް ވިދާޅުވީ ރާއްޖެއަށް ބަދަލުތަކެއް ގެނައުމަށް ކުރި މަސައްކަތުގެ އެންމެ ކުރީގައި ދިއްދޫ މީހުން ހަރަކާތްތެރިވި ކަމަށް
އުފާވެރި އަމާން ރާއްޖެ ކެމްޕޭން ޖަލްސާގައި ރައީސް ވާހަކަފުޅު ދައްކަވަނީ
ދިއްދޫ ބިން ހިއްކައި ނިމޭއިރު، އެއާޕޯޓަކާއި ޕިކްނިކް އައިލެންޑް އެޅިގެން ދާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް އެފަދައިން ވިދާޅުވީ ހއ. ދިއްދޫގައި ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަފުޅުދައްކަވަމުންނެވެ.
ރައީސް ވަނީ ދިއްދޫގައި އަޅާ ޖޫނިއަރ ކޮލެޖުގެ މަސައްކަތް ނިމެމުންދާކަމަށް ވިދާޅުވެފައެވެ. ދިއްދޫގައި ދެވަނަ ފުޓުބޯޅަ ދަނޑެއް އެޅުމުގެ މަސައްކަތް ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ފަށާނެ ކަމަށްވެސް ރައީސް ވިދާޅުވިއެވެ. ރައީސް ވިދާޅުވީ އެ ރަށުގެ ބަނދަރު ބޮޑުކުރުމުގެ މަސައްކަތް ކުރިއަށްދާކަމަށާއި، ބިން ހިއްކުމުގެ މަސައްކަތް އަންނަ އޮގަސްޓް މަހުގެ ތެރޭގައި ފަށާނެ ކަމަށެވެ. އަދި އެ ރަށަށް ވަރަށް އަވަހަށް އާރްޓީއެލްގެ ޚިދުމަތް ތައާރަފްކޮށްދެއްވާނެ ކަމަށާއި، އަދި އެ ރަށުގައި ފަތުރުވެރިކަން ކުރިއެރުވުމުގެ ޕްލޭނެއް އެބައޮތްކަން ފާހަގަކުރައްވައި ރައީސް ވަނީ، އުންމީދު ކަނޑާނުލުމަށް އެދިވަޑައިގެންފައެވެ.
2018 ވަނަ އަހަރު ކެމްޕެއިން ދަތުރުތައް ކުރިއިރު ރަށްތަކުން އިވުނު ވާހަކަތައް ވަރަށް ރަނގަޅަށް ހަނދުމަފުޅު ހުރިކަމަށް ރައީސް ވިދާޅުވިއެވެ. ރަށްރަށުގައި ޒުވާނުން ކުޅެލާނެ ދަނޑެއް ނެތް ވާހަކައާއި، ލަފައި ފުރުން ދަތިވުމާއި، ބިމުގެ މައްސަލަތަކާއި، ސާފު ފެން ނެތް ވާހަކައާއި، ކަރަންޓު ނުލިބޭ ވާހަކައާއި، ގޭގެ ހުންނަ ސަރަހައްދުގައި އިންޖީނުގެތައް ހުރުމާއި، މަލްޓިޕަރޕަސް ހޯލްގެ ވާހަކަ ތަކުރާރުކޮށް އިވިވަޑައިގަތް ކަމަށް ރައީސް ވިދާޅުވިއެވެ. ނަމަވެސް މިއަދު ރިޔާސީ އިންތިޚާބެއްގެ ކެމްޕެއިންގައި ރަށްރަށް ވަޑައިގައިގަންނަވާއިރު، ފެނާއި ނަރުދަމާގެ ވާހަކައާއި ކަރަންޓުގެ ދަތިކަމުގެ ވާހަކަ އެއްވެސް ރަށަކުން އިވިވަޑައިނުގަންނަވާ ކަމަށާއި، އިންޖީނުގެތައް ބަދަލުކުރުމުގެ ވާހަކަވެސް އިވިވަޑައިނުގަންނަވާ ކަމަށް ވިދާޅުވިއެވެ.
ރައީސް ވިދާޅުވީ މި ސަރުކާރުން ވަމުންދާ ވައުދުތައް ފުއްދާކަމަށާއި، އެފަދަ އަޑުތައް މިއަދު އިވިވަޑައިނުގަންނަވަނީ އެހެންވެގެން ކަމަށެވެ. އެގޮތުން ރާއްޖޭގެ 141 ރަށެއްގައި ފެނާއި ނަރުދަމާގެ މަޝްރޫއު ކުރިއަށް ގެންދާކަމަށް ރައީސް ވިދާޅުވިއެވެ. 150 ރަށުގެ އިންޖީނުގެ ބަދަލުކޮށް، އާ އިންޖީނުގެތައް ބަހައްޓައި، ނެޓްވޯރކް އަޅަމުންދާކަމަށް ރައީސް ވިދާޅުވިއެވެ. މިއަދު ސްކޫލް ކްލާސްރޫމާއި މަލްޓި ޕަރޕަސް ހޯލްގެ ވާހަކަ އިވެނީ މަދު ރަށަކުން ކަމަށް ރައީސް ވަނީ ވިދާޅުވެފައެވެ. މި ސަރުކާރުން 1578 ކްލާސްރޫމާއި 85 މަލްޓިޕަރަސް ހޯލް އަޅައި ނިންމާފައިވާކަމަށް ރައީސް ވަނީ ވިދާޅުވެފައެވެ. ދަރިންނަށް މަތީ ތައުލީމް ނުލިބުމުގެ ޝަކުވާވެސް މިހާރު އިވިވަޑައިނުގަންނަވާ ކަމަށާއި، 18000 ދަރިވަރުން މަތީ ތައުލީމު ހާސިލުކުރަމުން ދާކަމަށް ރައީސް ވިދާޅުވިއެވެ.
ރައީސް ވިދާޅުވީ ރާއްޖެއަށް ބަދަލުތަކެއް ގެނައުމަށް ކުރި މަސައްކަތުގެ އެންމެ ކުރީގައި ދިއްދޫ މީހުން ހަރަކާތްތެރިވި ކަމަށެވެ. މިއަދުވެސް ދިއްދޫ ޒުވާނުންގެ ކިބައިން ފެންނަނީ އެ ރޫހުކަމަށް ވިދާޅުވިއެވެ. އެ ވިންދާއި މަންޒަރު ދިއްދޫއިން ފެންނަކަމަށާއި، އެކަމާ އުފާކުރައްވާ ކަމަށް ރައީސް ވިދާޅުވިއެވެ. ވާދަވެރި ސިޔާސީ ހަރަކާތްތަކަކީ އެމްޑީޕީން ވަކާލާތުކުރި ކަމެއް ކަމަށްވެސް ރައީސް ވިދާޅުވިއެވެ.
