ކުރީގެ ސަރުކާރުތަކުން ކޮށްދޭންޖެހޭ ކަންކަން ކޮށްދިންނަމަ, ކެލާ ވާނީ ރާއްޖޭގެ އެންމެ ފުދުންތެރި އެއް ރަށަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރައީސް އެފަދައިން ވިދާޅުވީ ހއ. ކެލާގައި ބޭއްވެވި ބަނދަރު ބައްދަލުވުމުގައި ވާހަކަފުޅުދައްކަވަމުންނެވެ.

ރައީސް ވިދާޅުވީ ކެލަޔަކީ ބޮޑު، ރީތި ރަށެއް ކަމަށާއި އެ ރަށް އިގްތިސާދީ ގޮތުން ކުރި ނާރައި އޮޮތީ ކުރީގެ ސަރުކާރުތަކުން ކޮށްދޭންޖެހޭ ކަންކަން ކޮށްދީފައި ނުވާތީ ކަމަށެވެ. ކެލާގެ ތަރައްގީއަށް ކުރަން ހުރި ގިނަ ކަންކަން ކޮށްދެއްވަން ގިނަ ވައުދުފުޅުތަކެއް 2018 ވަނަ އަހަރު ވެވަޑައިގެންނެވިކަން ފާހަގަކުރައްވައި ރައީސް ވިދާޅުވީ، އޭގެ ތެރެއިން ގިނަ ކަންކަން ނިމިފައިވާކަމަށާއި، އަދިވެސް އިތުރު މަސައްކަތްތައް ކުރިއަށްދާ ކަމަށެވެ.

އެގޮތުން ކެލާގައި ޓުއަރިޒަމަށް ބިން ދޫކޮށް، ކުރަންޖެހޭ މަސައްކަތްތައް ކުރަމުންދާކަމަށް ރައީސް ވިދާޅުވިއެވެ. އަދި ކެލާގައި ފަތުރުވެރިކަން ކުރިއެރުވުމަށް ކުރިއަށް އޮތްތަނުގައި ވެސް މަސައްކަތް ކުރައްވާނެ ކަމަށް ރައީސް ވިދާޅުވިއެވެ. އަދި އެ ރަށުގެ ބަނދަރުގެ ފޭސް 2ގެ މަސައްކަތް ނިމުނުނަމަވެސް، އެ ބަނދަރުގެ ތޮށިގަނޑު އުސްކުރުމުގެ މަސައްކަތް ކުރަންޖެހޭ ކަމަށް ރައީސް ވިދާޅުވިއެވެ. މީގެ އިތުރުން މަސްމާރުކޭޓު ނިމިފައިވާ ކަމަށާއި، ދަނޑުވެރިކަމާއި، ފުޓްބޯޅަ ދަނޑުފަދަ މަސައްކަތްތައް ކުރިއަށް އެބަހުރި ކަމަށް އެމަނިކުފާނު ވިދާޅުވިއެވެ. މީގެ އިތުރުން މަލްޓިޕަރޕަސް ސްޕޯޓްސް ކޮމްޕްލެކްސްގެ މަސައްކަތް ކޮށްދެއްވާނެ ކަަމަށް ރައީސް ވައުދުވެވަޑައިގެންނެވިއެވެ.

ރައީސް ވިދާޅުވީ ތަރައްގީގެ ކަންކަން ކުރެވޭނީ އަމާން މާހައުލެއް އޮވެގެން ކަމަށެވެ. އަދި 2023ގެ ރިޔާސީ އިންތިޚާބު އަންނައިރު އެކަންކަމާމެފު ވިސްނަންޖެހޭ ކަމަށް ވިދާޅުވިއެވެ. ކެލާގެ ނިންމުން ކުރިއެކޭ އެއްގޮތަށް މި އަހަރުވެސް ރަނގަޅުވާނެ ކަމަށް ޔަގީންކުރައްވާ ކަމަށް ރައީސް ވިދާޅުވިއެވެ. ރައީސް ވަނީ، ބޮޑުތިލަދުންމައްޗަށް ތަރައްގީ ގެންނަވަނީ ރާއްޖޭގެ އިގްތިސާދު ދެގުނަ ކުރުމުގެ ވިސްނުންފުޅުގައި ކަމަށް ވިދާޅުވެފައެވެ.