އިހަވަންދޫގައި 50 ޓަނުގެ ބްރައިން ފްރީޒް ކުރެވޭ، 1000 މެޓްރިކްޓަންގެ ކޯލްޑް ސްޓޯރޭޖާއި އެކު މަސް ގަންނަ މަރުކަޒެއް ޤާއިމްކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ އިހަވަންދޫގެ އަމާން ރާއްޖެ ކެމްޕެއިން ޖަލްސާގައި ބުދަދުވަހުގެރޭ ވާހަކަދައްކަވަމުންނެވެ.
އިހަވަންދޫ އަކީ މަސްވެރި ރަށެއް ކަމަށާއި އެއީ މާލެއިން އުތުރުގައި މަސްވެރިކަން ކުރާ އުޅަނދުތައް އެންމެ ގިނަ ރަށް ކަމަށް ރައީސް ވިދާޅުވިއެވެ. ރައީސް ވަނީ މަސްވެރިންނަށް ދިމާވާ ގޮންޖެހުންތަކެއް ހުރިކަން ފާހަގަކުރައްވާފައެވެ. އެ ހިސާބަށް އެކަންކަން ދިޔައީ އެ ދާއިރާ އަށް އަޅާނުލުމުން ކަމަށް ރައީސް ވިދާޅުވިއެވެ. އެ ސިނާއަތް ޕްރައިވެޓް ސެކްޓަރ އަށް އެއްކޮށް ދޫކޮށްލުން ރަނގަޅު ނޫން ކަމަށް ވެސް ރައީސް ވަނީ ވިދާޅުވެފައެވެ. އިހަވަންދޫގެ މަސް މަރުކަޒުގެ މަސައްކަތް ލަސްވީ އެ ރަށުގެ ބިން އިތުރުކުރުމުގެ މަސައްކަތް ކުރިއަށް ދާތީ ކަމަށް ރައީސް ވިދާޅުވިއެވެ. އެއާއި އެކު މަސް ގަންނަ މަރުކަޒުގެ މަސައްކަތް ފެށި، ކުރިއަށް އޮތް ދެ ހަފްތާ ތެރޭގައި މަސް ގަންނަ ބަނދަރު ޤާއިމްކުރުމަށް އެމްޓީސީސީ އާއި ހަވާލުކުރައްވަނެ ކަމަށް ވިދާޅުވިއެވެ. އެ މަނިކުފާނު ވަނީ އެ މަސައްކަތް ނިމޭ އިރު އެތަނުގައި ސްލިޕްވޭ އަކާއި ދޯނި ފަހަރު އެހެލެވޭނެ އިންތިޒާމްގެ އިތުރުން އެމްޓީސީސީގެ ސޭލް ސެންޓަރެއް ޤާއިމްކުރައްވަނެ ކަމަށެވެ.
ރައީސް ވިދާޅުވީ އިހަވަންދިއްޕޮޅަކީ އެމަނިކުފާނުގެ ޗާޓުގައި ކުލަ ގަދަ ތަނެއް ކަމަށެވެ. ބޮޑުތިލަދުންމަތީގެ މާޒީ ހަނދާން ނުނެތޭނެ ކަމަށާއި އެ ސަރަހައްދަކީ ފުދުންތެރި ތަނަވަސް ބަޔަކު ދިރިއުޅުނު ސަރަހައްދެއް ކަމަށް ރައީސް ވިދާޅުވިއެވެ. އެ ސަރަހައްދުގެ ރައްޔިތުންގެ މަސައްކަތުން އަމިއްލަ އިގްތިސާދެއް ތަރައްޤީކުރިކަަމަށް އެމަނިކުފާނު ވިދާޅުވިއެވެ. މިހާރު އަނެއްކާވެސް ކުރާ މަސައްކަަތަކީ އެ މާޒީ ބޮޑުތިލަދުންމައްޗަށް ގެނެސްދިނުމުގެ މަސައްކަތް ކަމަށް އެމަނިކުފާނު ވިދާޅުވިއެވެ. ބޮޑުތިލަދުންމައްޗަށް ބޮޑު ބަދަލެއް ގެންނަވާނެ ކަމަށް ވެސް ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ގައްލަންދޫ ކަނޑު ހުރަސްކުރުމަކީ އިހަވަންދޫގެ ރައްޔިތުންނަށް ދިމާވި އެންމެ ބޮަޑު ދަތިކަން ކަމަށާއި ހޯރަފުށީގެ އެއާޕޯޓުގެ ސަބަބުން އެ މައްސަލަ ހައްލުވެފައިވާ ކަމަށެވެ. މިހާރު މާލެ ދާން ގައްލަންދޫ ކަނޑު ހުރަސްކުރަން ނުޖެހޭނެ ކަމަށް ވެސް ރައީސް ވިދާޅުވިއެވެ. ރައީސް އިތުރަށް ވިދާޅުވީ އަދިވެސް އިހަވަންދޫ އަށް ބޭނުންވާ ގިނަ ކަންތައްތަކެއް އެބަހުރިކަމަށާއި ސިއްހީ ޚިދުމަތް ހޯދުމަށް ގައްލަންދޫ ކަނޑު ހުރަސްކުރަން ނުޖެހޭނެ ގޮތެއް ހަދަން ޖެހޭ ކަމަށް އެމަނިކުފާނު ވިދާޅުވިއެވެ. އެ ރަށުގައި ހޮސްޕިޓަލެއް އެޅުމުގެ މަސައްކަތް ފެށީ އެ ވިސްނުމުގައި ކަމަށް ރައީސް ވިދާޅުވިއެވެ.
އެ ހޮސްޕިޓަލް އަށް ފައިސާ ހޯދާ ޓެންޑަރކުރި ކަމަށާއި އެ މަސައްކަތް ލަސްވަނީ ސަރުކާރުން ކޮށްދޭން ޖެހޭ ކަމެއް ކޮށް ނުދީ އޮވެގެން ނޫން ކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ ކޮންޓްރެކްޓް ބާތިލް ނުކޮަށް އެ މަސައްކަތް ކުރިއަށް ގެންދެވޭތޯ ބައްލަވާ ކަމަށެވެ. އެ ކޮންޓްރެކްޓް އުވާލައިފި ނަމަ މާ ބޮޑަށް ގެއްލުން ވާނެ ކަމަށާއި، މި ޖުލައި މަސް ނިމި އޮގަސްޓް މަހުގެ ތެރޭގައި އޮގަސްޓް މަހުގެ ތެރޭގައި އެ ހޮސްޕިޓަލްގެ އަމަލީ މަސައްކަތް ފަށާނެ ކަމުގެ ޔަގީންކަން ކޮންޓްރެކްޓަރުން ދީފައިވާ ކަމަށް ރައީސް ވިދާޅުވިއެވެ.
އެ ރަށަށް ކޮށްދެއްވަން ހުރި އިތުރުކަންކަމުގެ ތެރޭގައި ދިގުފަރުގައި ޓުއަރިޒަމްގެ މަސައްކަތް ކުރުމާއި، ހައުސިން މަޝްްރޫޢު އަކާޢި، މަސް ވެލޫ އެޑްކޮށްގެން ގަތުމާއި، މަސްވެރިން އެދޭ ގޮތަށް ފަސޭހައިން ވަދެ ނުކުމެ އުޅެވޭނެ ފަދަ ބަނދަރެއް ހެދުމަށްޓަކާ ނެރުގެ ޓެކްނިކަލް ސްރވޭ އެއް ހެދުމަށް ފަހު އެ މަސައްކަތް ކުރިއަށް ގެންދެވުމާއި، މަގުގެ މަސައްކަތްތައް ހުރި ކަަމަށް ރައީސް ވިދާޅުވިއެވެ.
