2013 އިން 2018 އަށް ގައުމުގައި އާއްމުވި އަނިޔާވެރިކަމުން ގައުމު މިންޖުކޮށްދެއްވީ ރައީސް ސާލީހު: ޑރ.އިޔާޒު
ކޮންމެ ކަމަކަށް ފާޅުގައި ބަހެއް ނުބުނުން އެއީ އެކަމަށް އެއްބަސްވުމެއް ނޫން
އަދާލަތު ޕާޓީގެ އިލްމުވެރިންގެ މަޖިލީހުގެ ނައިބު ރައީސް އަދި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް
2013 އިން 2018 އަށް ގައުމުގައި އާއްމުވި އަނިޔާވެރިކަމާއި ނާމާންކަމުން ގައުމު މިންޖުކޮށް، އަމާންކަމާއި އުފާވެރިކަމުގެ މިސްރާބަކަށް ރާއްޖެ ގެންގޮސްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކަމަށް އަދާލަތު ޕާޓީގެ އިލްމުވެރިންގެ މަޖިލީހުގެ ނައިބު ރައީސް އަދި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުލްލަތީފް ވިދާޅުވެއްޖެއެވެ.
ބައެއް ފާޑުކިޔުންތަކަށް ރައްދުދެއްވައި ޑރ.އިޔާޒު ވިދާޅުވީ ގައުމުގަައި ހިނގާ ހުރިހާކަމެއް އެނގުން ލާޒިމެއް ނޫން ކަމަށާއި، ކޮންމެ ކަމަކަށް ފާޅުގައި ބަހެއް ނުބުނުން އެއީ އެކަމަށް އެއްބަސްވުމެއް ނޫން ކަމަށެވެ. އަދި ކޮންމެ މީހަކު ކުރިނަމަވެސް ރަގަޅުކަމެއްނަމަ އެކަން ބަލައިގަންނަ ކަމަށާއި، ގޯސްކަމެއްނަމަ އެކަން ކުއްވެރި ކުރާ ކަމަށް ޑރ.އިޔާޒު ވިދާޅުވިއެވެ.
2013 އިން 2018 އަށް ގައުމުގައި އާއްމުވި އިންތިހާ ދަރަޖައިގެ އަނިޔާވެރިކަމާއި ނާމާންކަމުން ގައުމު މިންޖުކޮށް، އަމާންކަމާއި އުފާވެރިކަމުގެ މިސްރާބަކަށް ރައީސް ސާލިހުގެ ޤިޔާދަތުގެ ދަށުން ގައުމު ދަތުރުކޮށްފައިވާކަން ފާހަގަކުރައްވައި ޑރ. އިޔާޒު ވިދާޅުވީ މިއަދު ނޫސްވެރިންނަށް ޖެހިލުމެއްނެތި ބޭނުން ސުވާލެއް ސީދާ ރައީސް އާއި ކުރުމުގެ ފުރުސަތު ފަހިވެފައިވާ ކަމަށެވެ. އެއްވެސް ނިއުސްކޮންފަރެންސެއްގައި ޖަވާބުނުދެއްވި ކޯފާ އިސްކުރައްވާތަން ނުފެންނަ ކަމަށް ޑރ އިޔާޒު ވިދާޅުވިއެވެ. ޑރ. އިޔާޒު ވިދާޅުވީ ފެންނަނީ ވަރަށް ހަމަޖެހިވަޑައިގެން ހާސްކަމެއްނެތި ޖަވާބުދެއްވާ މަންޒަރު ކަމަށާއި، ނިމިގެން ހުރިހާ ނޫސްވެރިންނާއި ސަލާމްކޮށްލައްވާ ސެލްފީ ނަންގަވާތަން ކަމަށެވެ. އަދި ވިދާޅުވީ މިއީ ކުރީގެ ރައީސުން ފަރާތުން ނުފެންނަ ކަމެއް ކަމަށެވެ.
މީގެ އިތުރުން ޑރ.އިޔާޒު ވިދާޅުވީ މާތްﷲގެ އިރާދަފުޅާއެކު މިއަހަރުގެ ރިޔާސީ އިންތިޚާބު ރައީސް ސާލިހު އެއްބުރުން ކާމިޔާބު ކުރައްވާނެ ކަމަށާއި، އަދި ދެވަނަ ދައުރުގައި އުފާވެރި އަމާން ރާއްޖެއެއް ގާއިމްކުރެވޭނެ ކަމަށެވެ. އަދި އަދާލަތު ޕާޓީ އަކީ އިސްލާހަށް މަސައްކަތްކުރާ ޕާޓީއެއް ކަމަށާއި، އިސްލާހު ކުރަަންހުރި ކަމެއްނަމަ އެކަމަށްޓަކައި ކުރަންޖެހުނު މަސައްކަތްތައް ކުރައްވާނެ ކަމަށް ޑރ. އިޔާޒު ވިދާޅުވިއެވެ.
