އިސްލާމިކް މިނިސްޓަރ ޑރ މުހައްމަދު ޝަހީމް ދީނީ އިލްމުވެރިޔާ ޑރ އިޔާޒްގެ ޒާތީ ވާހަކަތަކެއް ދައްކާފައިވާތީ، އެކަން ރައީސް ޑރ މުޙައްމަދު މުއިއްޒުގެ ސަމާލުކަމަށް ގެނައުމުގެ ގޮތުން ޑރ އިޔާޒް ރައީސް ޑރ މުއިއްޒަށް ސިޓީއެއް ފޮނުއްވައިފިއެވެ.
ބުރާސްފަތި ދުވަހު ޑރ އިޔާޒް ރައީސް މުއިއްޒަށް ފޮނުއްވި ސިޓީގައި ވިދާޅުވެފައިވަނީ 18 ސެޕްޓެމްބަރު 2024 ގައި ރައީސުލް ޖުމްހޫރިއްޔާގެ އޮފީހުގައި އިސްލާމިކް މިނިސްޓްރީން ބޭއްވި ނޫސްކޮންފަރެންސެއްގައި، އިސްލާމިކް މިނިސްޓަރ ޝަހީމް، ދައުލަތުގެ ނިޝާން ޖެހި ޕޯޑިއަމްގައި ހުންނަވައިގެން ދެމަފިރިއެއްގެ ދިރިއުޅުމުގެ ތެރެއަށް ވަދެވަޑައިގަތްކަމަށް ބެލެވޭ ވާހަކަތަކެއް ދައްކާފައިވާ ކަމަށާއި، މިފަދަ އަމަލަކީ މިނިސްޓަރެއްގެ ހައިސިއްޔަތުން ކުރެއްވުން އެކަށީގެންނުވާ، އަދި އިސްލާމީ އަޚްލާޤާއި ދިވެހި މުޖުތަމަޢުގެ އާދަކާދައާ ޚިލާފް އަމަލެއް ކަމުގައި ދެކޭ ކަމަށެވެ.
ޤައުމީ ނިޝާންޖެހި ޕޯޑިއަމެއްގައި ވާހަކަފުޅު ދައްކަވަން ކޮންމެ ބޭފުޅަކަށްވެސް ލިބިވަޑައިގަންނަވަނީ ރަސްމީ ހައިސިއްޔަތަކުން ރަސްމީ ވާހަކަފުޅު ދެއްކެވުމަށް ކަމަށް ފާހަގަކުރައްވަމުން، މި ކަމަކީ އެންޓި ކޮރަޕްޝަން ކޮމިޝަނުން ތަހުޤީޤް ކުރަންޖެހޭ ބާވަތުގެ މައްސަލައެއް ކަމަށް ޑރ އިޔާޒްގެ ސިޓީގައި ވިދާޅުވެފައިވެއެވެ.
"ރަސްމީ ވާހަކަތަކުގެ ބޭރުން ތިމާ އާއި އަނެކާއާ ދެމެދު އޮތް ޒާތީކަމެއްގެ ކަންތައް ތަކެއްގައި، ދައުލަތުގެ ވަސީލަތްތައް ބޭނުންކޮށްގެން މީޑިއާ މެދުވެރިކޮށް ތިމާގެ ޒާތީ ޕީއާރު ރަނގަޅުކުރަން މަސައްކަތްކުރުމަކީ މަޤާމުގެ ނުފޫޒު ނަމަގޮތުގައި ބޭނުންކޮށްގެން ތިމާއަށް ފައިދާހޯދަށް އުޅުމުގެ ޖިނާއީ ކުށެއް. އެހެންކަމާއެކު، މިކަމަކީ އެންޓި ކޮރަޕްޝަން ކޮމިޝަނުންވެސް ތަހުޤީޤްކުރައްވަން ޖެހޭ ބާވަތުގެ ކަމެއް ކަމެއްކަން ފާހަގަކުރެވޭ،" ޑރ އިޔާޒް ރައީސް ފޮނުއްވި ސިޓީގައި ވިދާޅުވިއެވެ.
މިނިސްޓަރ ޝަހީމްގެ މިއަމަލު ކުށްވެރިކުރައްވައި، މުސްތަޤްބަލުގައިވެސް މިފަދަ އަމަލުތައް ތަކުރާރުވިޔަ ނުދިނުމަށްޓަކައި މިނިސްޓަރގެ މައްޗަށް އެކަށީގެންވާ ފިޔަވަޅު އަޅުއްވާ ދެއްވުމަށް ޑރ އިޔާޒް އިތުރަށް ވިދާޅުވެފައިވެއެވެ.
ޑރ އިޔާޒް ރައީސް މުއިއްޒަށް މިސިޓީ ފޮނުއްވާފައި މިވަނީ ބުދަ ދުވަހު އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ޑރ އިޔާޒްގެ އަނބިކަނބަލުންނަށް ކުޑައިމީސްވާ މޭރުމުން ވާހަކަފުޅު ދައްކަވާފައިވަނިކޮށެވެ.
ނޫސްވެރިއެއްގެ ސުވާލަށް ޖަވާބު ދެއްވަމުން މިނިސްޓަރ ޝަހީމް ވިދާޅުވެފައިވަނީ ޑރ އިޔާޒުގެ އަނބިކަނބަލުން ކޮންޓްރޯލް ނުވާ ކަމަށާއި ބުނާބަސް ނާހާ ވާހަކަ މީސްމީހުން ކައިރީގައި މީސްމީހުންގެ ގާތުގައި ޑރ. އިޔާޒް ދައްކަވަމުން ވަޑައިގަންނަވާ ކަމަށާއި، އެހެންކަމަށްވާނަމަ އެފަދަ ބަސްނާހާ ކުއްޖަކާ އެއްކޮށް ނޫޅެން މީހަކު ބުނެދާނެ ކަމަށެވެ.
އެހެންވެއްޖިއްޔާ ދެން މީހަކު ބުނެދާނެ ދޯ ޑރ. އިޔާޒަކީ ނުލާހިކު މާތް ބޭފުޅެއް, އެކަހަލަ ބަސްނާހާ ކުއްޖަކާ އެއްކޮށް އުޅޭކަށް ނުވާނޭ. އޭގެ މާނައަކީ ސަރުކާރުގެ ފަރާތުން އެންގީއެކޭ ނޫން އަންހެނުން ވަރިކުރަން," ނޫސްވެރިޔާއަށް ޖަވާބުދެއްވަމުން މިނިސްޓަރ ޝަހީމް ވިދާޅުވިއެވެ.
މިނިސްޓަރ ޝަހީމްގެ އެ ވާހަކަތަކަކީ ވަރަށް ދަށު ދަރަޖައިގެ އަމަލެއް ކަމަށް ބުނެ ސޯޝަލް މީޑިއާގައިވެސް ގިނަ ބަޔަކު ދަނީ މިނިސްޓަރަށް ފާޑުކިޔާ ނުރުހުން ފާޅުކުރަމުންނެވެ.
