ޑރ. އިޔާޒްގެ އަނބިކަނބަލުން ވަރިކުރާކަށް ނުބުނަން، އަނބިމީހާ ކޮންޓްރޯލް ނުވާ ކަމަށް ވިދާޅުވަނީ އިޔާޒް: ޑރ ޝަހީމް

ދީނީ އިލްމްވެރިޔާ ޑރ. މުހައްމަދު އިޔާޒްގެ އަނބިކަނބަލުން ވަރިކުރަން ވިދާޅުނުވާ ކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއެއްގެ ސުވާލަށް ޖަވާބު ދެއްވަމުން ޑރ. ޝަހީމް ވިދާޅުވީ، "ޑރ އިޔާޒަށް ސީދާކޮށް ނުގުޅާތާ ކިތަންމެ ދުވަހެއް ވެއްޖެ،" ކަމަށެވެ.

"އަޅުގަނޑަށްވެސް ނޫހުން މި ފެންނަނީ އަޅުގަނޑު ޑރ. އިޔާޒް އަށް ގުޅާފައި، އަޅުގަނޑު ބުންޏޭ،" ޝަހީމް ވިދާޅުވިއެވެ.

އަނބިކަނބަލުން ވަރިކުރަން ޑރ. އިޔާޒް އަށް ދަންނަވަންވީ ކީއްވެތޯ ސުވާލު ކުރައްވަމުން ޑރ. ޝަހީމް ވިދާޅުވީ، އަނބިމީހާ ކޮންޓްރޯލް ނުވާ ކަމަށާއި ބުނާބަސް ނާހާ ވާހަކަ މީސްމީހުންގެ ގާތުގައި ޑރ. އިޔާޒް ދައްކަވަމުން ވަޑައިގަންނަވާ ކަމަށެވެ.

"އެހެން ވެއްޖެއްޔާ ދެން މީހަކު ބުނެދާނެ، ޑރ. އިޔާޒް އަކީ ނުލާހިކު މާތް ބޭފުޅެއް، އެކަހަލަ ބަސްނާހާ ކުއްޖަކާ އެކީ އުޅޭކަށް ނުވާނޭ،" ޝަހީމް ވިދާޅުވިއެވެ.

ޝަހީމް ވިދާޅުވީ އޭގެ މާނައަކީ އަދި ސަރުކާރުގެ ފަރާތުން އޭނަ އަށް އަންހެނުން ވަރިކުރަން އެންގުން ނޫން ކަމުގައެވެ.

ޑރ. ޝަހީމް މިހެން ވިދާޅުވިއިރު ޑރ. އިޔާޒުގެ އަނބިކަނބަލުން އާއިޝަތު ޝާދިޔާ ރާއްޖެއެމްވީއަށް މައުލޫމާތުދެއްވަމުން "މިނިސްޓަރުންގެ ލެވެލްގައި ތިއްބެވި އިލްމްވެރިން" ފިރިކަލުންނަށް ގުޅާ ވަރިކުރަން ބުނެފައިވާ ކަން ވަނީ ހާމަކޮށްފައިވެއެވެ.

ޝަހީމް ދެއްކެވި ވާހަކަފުޅަށް ރައްދު ދެއްވަމުން ޑރ. އިޔާޒް ކުރެއްވި ޕޯސްޓެއްގައި ވިދާޅުވީ އޭނާގެ އަނބިކަނބަލުން ފުލުހުންގެ ހައްޔަރުގައި ހުރި އިރު އަދާލަތު ޕާޓީގެ ޖެނެރަލް ކައުންސިލް މެމްބަރު މުހައްމަދު ޝިފާން މެދުވެރިކޮށް މިނިސްޓަރ ޝަހީމް އޭނާގެ އަނބިކަނބަލުން ޝާދިޔާ ވަރިކުރަން އެންގެވި ކަމަށެވެ.

"އަޅުގަނޑު އަންހެނުން ބަސް ޤަބޫލު ނުކުރާ ވާހަކަ މީހުން ގާތު ދައްކާ ކަމަށް ބުނެވެސް ހެއްދެވީ ބޮޑު ބުހުތާނު ދޮގެއް. ﷲގެ ރަޙްމަތުން އަޅުގަޑު އަންހެނުންނަކީ ވަފާތެރި ކިޔަމަންތެރި އެއް،" ޑރ. އިޔާޒް ޝަހީމް ދެއްކެވި ވާހަކައަށް ރައްދުދެއްވަމުން ވިދާޅުވިއެވެ.