3.8 މިލިއަން ރުފިޔާގެ މައްސަލައެއްގައި ހިންގި މާރާމާރީއަކާ ގުޅިގެން ބަންދުކޮށްފައި ތިބި ދެމީހުންގެ ތެރެއިން އެކަކު ދޫކޮށްލައިފިއެވެ.

މި މައްސަލައިގައި އުމުރުން 34 އަހަރުގެ ފިރިހެނަކާއި، 27 އަހަރުގެ ފިރިހެނަކު ހައްޔަރުކޮށްފައިވެއެވެ.

އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން ވަނީ 34 އަހަރުގެ މީހާ ޝަރުތުތަކާއެކު ބަންދުން ދޫކޮށްލުމަށް އަމުރުކޮށްފައެވެ. އޭނާ ބަންދުގައި ހުންނަތާ 55 ދުވަސް ވަނީ ވެފައެވެ.

މި ޙާދިސާ ހިނގާފައިވަނީ އޭނާއާއި އަނިޔާ ލިބުނު ފަރާތާ ދެމެދު ހިނގާފައިވާ މަދަނީ މުއާމަލާތަކާއި ގުޅިގެން ކަމަށާއި، އޭނާގެ މައްޗަށް ތޫނު ހަތިޔާރު ޤާނޫނާއި، ޖިންސީ ކުށުގެ ޤާނޫނުގެ ދަށުން ތުހުމަތުކޮށްފައިވާއިރު، ހުށަހެޅިފައިވާ ހެކިތަކުން އޭނާއާއި ކުށާ ގުޅުވާލެވޭ ހެކި ބަލިކަށިކަމަށް ކޯޓު އަމުރުގައި ބުނެއެވެ.

ކޯޓު އަމުރުގައި ބުނެފައިވަނީ އަނިޔާ ލިބުނު ފަރާތް ބުނާ ބުނުން ފިޔަވައި ދެން ހުރި ހެކިތަކަކީ ކުށާއި ގުޅުވާލެވޭ ސީދާ ހެކިތަކެއް ނޫން ކަމަށެވެ.

އޭގެ އިތުރުން، އޭނާގެ އަތުން 3.8 މިލިއަން ރުފިޔާ އަނިޔާ ލިބުނު ފަރާތް ނަގާފައިވާކަމަށް ބުނެފައިވާއިރު، އެ މައްސަލަ ސިވިލް ކޯޓަށް ހުށައެޅިފައިވާކަމަށް އެ ފަރާތުން ބުނެއެވެ. އަދި އެ މައްސަލަ ސިވިލް ކޯޓަށް ހުށައެޅުމުން އަނިޔާ ލިބުނު ފަރާތް ގުޅައި އިންޒާރު ދީފައިވާކަންވެސް އޭނާ ވަނީ ތަހުގީގުގައި ބުނެފައެވެ.

އޭނާ ދޫކޮށްލާފައިވަނީ ހެކިންނަށް ނުފޫޒު ފޯރުވުމުގެ ގޮތުން އެއްވެސް ކަމެއް ނުކުރުމަށް ޝަރުތުކޮށެވެ.

މި މައްސަލައިގައި ހައްޔަރު ކުރި 27 އަހަރުގެ މީހާ 7 ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފައެވެ. އޭނާ ބަންދުގައި ހުންނަތާ 70 ދުވަސްވެފައިވާއިރު، މި މައްސަލަ ހަފްތާއެއްގެ ތެރޭގައި ޕްރޮސެކިއުޓަރ ޖެނެރަލް އޮފީހަށް ދައުވާކޮށްދިނުމަށް އެދި ހުށަހަޅާނެކަމަށް މައްސަލައިގެ ތަހުގީގު އޮފިސަރު ވިދާޅުވެފައިވެއެވެ.