ބައްސާމް ދެއްވަނީ ޚިޔާނާތެއް ނުވަތަ ކޮރަޕްޝަންގެ އަމަލެއް ނުހިނގާ ކަމުގެ ޔަގީންކަން!

ފުޓުބޯޅަ އެސޯސިއޭޭޝަން އޮޕް މޯލްޑިވްސް (އެފްއޭއެމް)ގައި ޚިޔާނާތެއް ނުވަތަ ކޮރަޕްޝަންގެ އެއްވެސް އަމަލެއް ނުހިނގާނެ ކަމުގެ ޔަގީންކަން އެ އިދާރާގެ ރައީސް ބައްސާމް އަދީލް ޖަލީލް ދެއްވައިފިއެވެ.

އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިން ވަނީ ބައްސާމަށް ތުހުމަތު ކުރަމުން އަންނަ ކަންކަމާ ގުޅޭގޮތުން ވެސް ސުވާލު ކޮށްފައެވެ. އެގޮތުން ދުނިޔޭގެ ފުޓުބޯޅައިގެ މައި އިދާރާ ކަމަށްވާ ފީފާއާއި އޭއެފްސީއާއި ސަރުކާރުންވެސް އެފްއޭއެމަށް މާލީ ގޮތުން އެހީތެރިކަން ފޯރުކޮށްދެމުން އަންނައިރު، އެއިން އެއްވެސް ކަމަކަށް ޚިޔާނާތެއް ވެފައިވާނެތޯ ނޫސްވެރިން ސުވާލުކުރިއެވެ. ޖަވާބު ދެއްވަމުން ބައްސާމް ވިދާޅުވީ އެ ޒާތުގެ އެއްވެސް ކަމެއް ނުހިނގާނެ ކަމުގެ ޔަގީންކަން ދެއްވާކަމަށެވެ. އެކަން އެފްއޭއެމްގެ އޯޑިޓް ރިޕޯޓުތަކުން ފެންނަން ހުންނާނެ ކަމުގައިވެސް އޭނާ ވިދާޅުވިއެވެ. ނަމަވެސް ބައްސާމް މަގާމާ ހަވާލުވުމުގެ ކުރިން އެފްއޭއެމްގައި އެފަދަ ކަންކަން ހިނގާފައި އޮތް ގޮތެއް ނޭންގޭ ކަމަށް ވެސް ވަނީ ވިދާޅުވެފައެވެ.

އިތުރަށް އޭނާ ވިދާޅުވީ އިދާރާތަކުން ހަދަމުން އަންނަ އޯޑިޓުތަކުން މައްސަލައެއް ފެންމަތިވެފައިވާނަމަ، މިއަހަރު އެފްއޭއެމަށް ބެޖެޓު ނުދޭނެ ކަމަށެވެ. ނަމަވެސް އެފަދަ އެއްވެސް ކަމެއް އެއިން އެއްވެސް އޯޑިޓަކުން ފެންނަން ނެތް ކަމަށް އޭނާ ވިދާޅުވިއެވެ. އެފްއޭއެމަކީ ގަވާއިދުން ބަރާބަރަށް އޯޑިޓު ކުރަމުން އަންނަ އިދާރާއެއްކަން ފާހަގަކުރައްވައި ބައްސާމް ވިދާޅުވީ، ފީފާއިން އޯޑިޓުކުރުން ކުރިއަށް ގެންދަނީ އެފްއޭއެމަށް އެންގުމަށްފަހު ނޫން ކަމަށެވެ. އެގޮތުން އެ އިދާރާއިން "ސަޕްރައިޒް" އޯޑިޓުތަކެއް ކުރިއަށް ގެންދާ ކަމަށާއި، ދާދި ފަހުންވެސް އެކަން ކުރިއަށް ގެންދިޔަ ކަމަށް ވިދާޅުވިއެވެ. އެހެންކަމުން ފީފާއާއި އޭއެފްސީން އެފްއޭއެމަށް ދެމުން އަންނަ ފައިސާތައް ޚަރަދު ކުރަމުން އަންނަ ގޮތް ބަރާބަރަށް އެ ފަރާތްތަކަށް ފެންނަން އޮންނާނެ ކަމަށް ވެސް ވިދާޅުވިއެވެ.

ފުޓުބޯޅައިގެ ބައެއް ކަންކަން ގޯސްވެފައި ވީނަމަވެސް، އަދިވެސް ރާއްޖޭގެ އެއްވަނަ ކުޅިވަރަކީ ފުޓުބޯޅަ ކަމަށް ބައްސާމް ވިދާޅުވިއެވެ. އެހެންކަމުން އެހެން ކުޅިވަރުތަކާ ޚިލާފަށް ފުޓުބޯޅައިގެ ނަތީޖާ ދަށްވުމުން އެކަމުގެ ވާހަކަ އެންމެންވެސް ވަރަށް ގަދަޔަށް ދައްކާނެ ކަމުގައި އޭނާ ވިދާޅުވިއެވެ. މީގެ އިތުރުން، ދާދި ފަހުން ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތުގައި ދިވެހި ޓީމުގެ ފަރާތުން ފެނުނީ އެންމެ އެދެވޭ ކުޅުން ނޫން ކަމަށްވެސް ބައްސާމް ޤަބޫލު ކުރައްވައެވެ. އެހެންކަމުން އެކަންކަން ބަދަލު ކުރުމަށް މަސައްކަތް ކުރަމުން އަންނަ ކަމަށް ވަނީ ވިދާޅުވެފައެވެ.