ފެއިލްވެ އިސްތިއުފާ ދޭން ޖެހޭ ކަމަށް ބައްސާމް ޤަބޫލެއް ނުކުރައްވާ!

ދިވެހި ފުޓުބޯޅަ އަށް ކުރަމުން އަންނަ މަސައްކަތުގައި ފެއިލްވެ، އިސްތިއުފާ ދޭން ޖެހޭ ހާލަތެއް އޮތް ކަމަށް ޤަބޫލުނުކުރައްވާ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.

ބައްސާމް މިހެން ވިދާޅުވީ ގަލޮޅު ރަސްމީ ދަނޑުގައި އަންގާރަ ދުވަހުގެ މެންދުރު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަށް ޖަވާބު ދެއްވަމުންނެވެ. އެގޮތުން ފުޓުބޯޅައިގެ ނަތީޖާ ދަށްވެ، ބައްސާމް އެފްއޭއެމާ ދުރަށް ވަޑައިގަންނަވަން ޖެހޭ ކަމަށް ގިނަ ބަޔަކު ބުނަމުން އަންނަ ކަމަށާއި، އެކަމުގައި ދެކިވަޑައިގަންނަވާ ގޮތަކީ ކޮބައިތޯ ނޫސްވެރިޔާ ވަނީ ސުވާލުކޮށްފަ އެވެ. އެ ސުވާލަށް ޖަވާބު ދެއްވަމުން ބައްސާމް ވިދާޅުވީ، ފުޓުބޯޅައިގެ ކަންކަން ފާއިތުވި ދެ އަހަރު ދުވަހަށް ބަަލައިގެން ނުވާނެ ކަމަށެވެ. އެހެންކަމުން ފުޓުބޯޅައިގެ ކަންކަން ބައްލަވަން ވާނީ އެފްއޭއެމްގެ ރައީސްކަމަށް އޭނާ އެންމެ ފުރަތަމަ އިންތިޚާބުވީ އަހަރުން ފެށިގެން ކަމަށް ބައްސާމް ވަނީ ވިދާޅުވެފަ އެވެ.

އެފްއޭއެމްގެ ރައީސްކަމުގައި ހޭދަކުރެއްވި ފުރަތަމަ ދައުރުގައި ކުރެވުނު ކާމިޔާބު ކަންކަމަށް ބައްސާމް ވަނީ އަލިއަޅުވާލައްވާފަ އެވެ. އެގޮތުން 2018 ވަނަ އަހަރުގެ ސާފް ޗެމްޕިއަންޝިޕް ފުޓުބޯޅަ މުބާރާތް ދިވެހިރާއްޖެ އިން ކާމިޔާބު ކުރުމާއި، ފުރަތަމަ ފަހަރަށް ޤައުމީ އަންހެން ޓީމުން މެޑަލެއް ހާސިލް ކުރުމުގެ އިތުރުން، ފުރަތަމަ ފަހަރަށް ޒުވާން ޤައުމީ ޓީމު މެޑަލެއް ހާސިލްކުރި ކަމަށް އޭނާ ވިދާޅުވި އެވެ. އޭގެ ފަހުން ދެ ވަނަ ދައުރުގައި ކުރިމަތިވި އެންމެ ބޮޑު އެއް ގޮންޖެހުމަކީ، ކޯވިޑް-19 ގެ ބަލިމަޑުކަމުގެ ސަބަބުން ކުރިމަތިވި ގޮންޖެހުން ކަމަށް ފާހަގަ ކުރެއްވި އެވެ. އެގޮތުން އެ ދުވަސްވަރު ވެސް އެފްއޭއެމުން ކުލަބުތަކަށް ބަރާބަރަށް ފައިސާ ފޯރުކޮށްދެމުން އައި ކަމަށާއި، ހަމައެހެންމެ މުވައްޒަފުން މަދު ނުކޮށް ބަރާބަރަށް ފައިސާ ދެމުން އައި ކަމަށް ވިދާޅުވި އެވެ. އެ ދުވަހު އެ ކުރި ކަންކަމަކީ މިއަދު މާލީ ގޮތުން ދަތިކަމަކާ ކުރިމަތިލާން ޖެހުނު ސަބަބެއްގެ ގޮތުގައި ބައްސާމް ވަނީ ސިފަކުރައްވާފަ އެވެ.

އުންމީދު ކުރި ގޮތަށް ބައެއް ކަންކަން ކުރިއަށް ނުދިޔަ ނަމަވެސް، އޭނާގެ މުޅި ދައުރަށް ބަލާނަމަ، އެއީ ނާކާމިޔާބެއްގެ ގޮތުގައި ބައްސާމް ދެވިވަޑައިނުގަންނަވައެވެ. މާލީ ގޮތުން ހުރި މައްސަލަތާ، ވަށައިގެން ހުރި މައްސަލަތަކާއެކު ދަތިތަކެއް ހުރި ކަމަށާއި، އެހެން ނަމަވެސް އެކަމުން އަރައި ގަނެވިއްޖެ ނަމަ މުސްތަޤުބަލު އުޖާލާވާނެ ކަމަށް ބައްސާމް ވަނީ ވިދާޅުވެފަ އެވެ.

އިތުރުން ވާހަކަ ދައްކަމުން ބައްސާމް ވިދާޅުވީ، ފުޓުބޯޅައިގެ އެކި ކަންކަމުގައި ގެންނަން ޖެހޭ ބަދަލުތަކުގެ މަޝްވަރާތައް މިހާރު ކުރަމުން އަންނަ ކަމަށެވެ. އެގޮތުން ޓެކްނިކަލީ ގެންނަން ޖެހޭ ބައްދަލުތަކާމެދު މަޝްވަރާ ކުރަމުން އަންނަ ކަމަށާއި، ކުރިއަށް އޮތް ދުވަސްތަކުގައި އެކަން ހިއްސާ ކުރައްވާނެ ކަމަށް ވެސް ވިދާޅުވި އެވެ. އެހެންކަމުން އެކަންކަމާއެކު ކުރިއަށް އޮތް ތަނުގައި ފުޓުބޯޅަ އަށް ހެޔޮ ބަދަލެއް އަންނާނެ ކަމަށް އުންމީދު ކުރައްވާކަން ފާހަގަކުރައްވާ އޭނާ ވިދާޅުވީ، އެއްވެސް މީހަކަށް "ޖާދުލެއް" ނުހެދޭނެ ކަމަށެވެ. އެހެންނަމަވެސް އެކަންކަމާއެކުވެސް ކުރިއަށް އޮތް ދެ އަހަރެއްގެ ތެރޭގައި ފުޓުބޯޅައިގެ ފެންވަރު ރަނގަޅުވެގެން ދާނެ ކަމަށް ބައްސާމް ވަނީ ވިދާޅުވެފަ އެވެ.

އެފްއޭއެމްގެ ރައީސްކަމުގައި ހުންނަވަނީ ކުލަބުތަކުން ބޭނުންވެގެން ކަމަށާއި، އޭނާ އަށް ކުލަބުތަކުގެ އިތުބާރު ނެތް ކަމަށް ކުލަބުތަކުން ބުނެފި ނަމަ، މަގާމުގައި ހުންނަން ބޭނުންނުވާ ކަމަށް ވެސް ބައްސާމް ވަނީ ވިދާޅުވެފަ އެވެ.