ޗެލްސީގެ ފަސް ކުޅުންތެރިއަކު ޕްރީ ސީޒަން ސްކޮޑުން ބާކީކޮށްފި

ޗެލްސީގެ ސްކޮޑް ކުޑަކުރަން މަސައްކަތް ކުރަމުން ދާ ދަނޑިވަޅުގައި އެ ޓީމުގެ ފަސް ކުޅުންތެރިއަކު ޕްރީ ސީޒަން ޕްލޭންތަކުން ބާކީކޮށްފިއެވެ.

މިދިޔަ ސީޒަނުގައި ގިނަ ކުޅުންތެރިން ތިބި އިރު، ފުރަތަމަ ޓީމުގެ ޕްރެކްޓިހުގައި ރެގިއުލާކޮށް 33-40 އާ ދެމެދުގެ އަދަދަކަށް ކުޅުންތެރިން ތިބި އިރު، ޖެނުއަރީގައި ސޮއިކުރި ތިން ތަރިން ޗެމްޕިއަންސް ލީގުގެ ސްކޮޑުގައި ހިމެނިފައެއް ނުވެއެވެ.

ރިޕޯޓުތަކުން ބުނާ ގޮތުގައި ހަކީމް ޒިޔެކް، ޕިއޭ އެމެރިކް އޮބަމަޔަން އަދި އެނބުރި އަންނަ ރޮމެލޫ ލުކާކޫ ޕްރީ ސީޒަންގެ ސްކޮޑުގައި ހިމެނިފައެއް ނުވެއެވެ. މި ތިން ކުޅުންތެރިންނަކީ ޕޮޗެޓީނޯގެ ޕްލޭންގައި ނެތް ތިން ކުޅުންތެރިން ކަމަށާއި ޗެލްސީ އެމެރިކާއަށް ފުރިތާ އެއް ދުވަސް ފަހުން އަންގާރަ ދުވަހު ކޮބާމްގައި ޓްރެއިނިންއަށް ރިޕޯޓް ކުރަން އަންގާފައިވާ ކަމަށް ރިޕޯޓުތައް ބުނެއެވެ.

މިދިޔަ ސީޒަނުގައި ޗެލްސީއަށް އެންމެ ލަނޑެއް ޖަހައިދެވުނު އޮބަޔަން ހޯދުމަށް ފްރާންސްގެ މާސޭ އިން ވަނީ މަސައްކަތް ފަށާފައެވެ. އަދި މެޑިކަލް އިން ފާސްނުވުމުގެ ސަބަބުން ސައުދީ ޕްރޯ ލީގުގެ އަލް ނަސްރަށް ބަދަލުވުމަށް މަސައްކަތް ކުރި ޒިޔެކަށްވެސް އެ ޓީމަށް ދެވޭ ގޮތެއް ނުވިއެވެ.

ލޯނު އުސޫލުން ލުކާކޫ މިދިޔަ ސީޒަނުގައި ކުޅެފައިވަނީ އިންޓަ މިލާނަށެވެ. އޭނާ ވަނީ އިންޓަ އާއެކު ޗެމްޕިއަންސް ލީގު ފައިނަލް ކުޅެފައެވެ. ނަމަވެސް، އިންޓަ އިން ދާއިމީކޮށް އޭނާ ގެންދިޔުމުގެ ޝައުގުވެރިކަމެއް ނުގެންގުޅެއެވެ. އޭނާ ހޯދުމަށް އިންޓަގެ ވާދަވެރި ޔުވެންޓަސް އާއި ސައުދީ ޕްރޯ ލީގުގެ އަލް ހިލާލުން ދަނީ މަސައްކަތް ކުރަމުންނެވެ.

މި ތިން ކުޅުންތެރިންގެ އިތުރުން، ޗެލްސީގެ ޕްރީ ސީޒަން ސްކޮޑުން ޖާގަ ނުލިބުނީ ޒުވާން ދެ ކުޅުންތެރިން ކަމަށްވާ އޮމަރީ ހަޗިންސަން އާއި ހާވީ ވެލް އަށެވެ.

ސްކޮޑުގެ ސައިޒު ކުޑަ ކުރުމަށް ޗެލްސީން މިހާރުވެސް ވަނީ ގިނަ ކުޅުންތެރިންތަކެއް ދޫކޮށްލާފައެވެ. އޭގެތެރޭގައި ކައި ހަވާޓްޒް، މޭސަން މައުންޓް، އެޑުއާޑް މެންޑީ، ކަލިދޫ ކުލިބާލީ، ކްރިސްޓިއަން ޕުލިސިޗް، ރޫބެން ލޮފްޓަސް ޗީކް، މަޓެއޯ ކޮވަސިޗް، އެންގޯލޯ ކާންޓޭ އަދި ކުރީގެ ކެޕްޓަން އަޒްޕިލިކުއެޓާ ފާހަގަކޮށްލެވެއެވެ.

ޕްރީ ސީޒަންގައި ޗެލްސީން ބްރައިޓަން، ނިއުކާސަލް، ފުލަމް އަދި ބޮރޫޝިއާ ޑޯޓްމަންޑާ ދެކޮޅަށް ކުޅުމަށް ވަނީ ހަމަޖެހިފައެވެ.