ވ.އަތޮޅުގައި ޕިކްނިކް ދިއުމަށް ޚާއްސަ ރަށެއް ޤާއިމްކުރަނީ
ރައީސް ވަނީ ތިނަދޫ އާއި އެހެނިހެން ރަށްތަކަށް ކުރީ ސަރުކާރުތަކުން އަޅާނުލާ ކަމަށް ވެސް ވިދާޅުވެފަ
ރައީސް ތިނަދޫގައި ދެއްކެވި ވާހަކަފުޅު
ވ. އަތޮޅުގައި ޕިކްނިކް ދިއުމަށް ޚާއްސަ ރަށެއް ޤާއިމްކޮށްދެއްވުމަށް ރައީސް އިބްރާހިމް މުޙައްމަދު ޞާލިހް މިއަދު ވައުދުވެވަޑައިގެންފިއެވެ.
ވ.ތިނަދޫގައި ވާހަކަދައްކަވަމުން ރައީސް ވިދާޅުވީ އެ އަތޮޅުގެ ރަށްތަކުން ވެސް ޕިކްނިކް އައިލެންޑެއް ބޭނުންވާކަން އެމަނިކުފާނަށް އެނގިވަޑައިގަންނަވާ ކަމަށެވެ. އަދި ވަކި ރަށެއް ހިއްކައިގެން ޕިކްނިކް އައިލެންޑެއްގެ ގޮތުގައި އެ ރަށް ތަރައްގީ ކުރުމަށް އެދޭކަމަށް ވެސް ވިދާޅުވިއެވެ. އަދި އެތަން ޤާއިމްކުރާނެ ތަނަކާއި މެދު ޚިޔާލު ހުރި ގޮތް ތަފާތު ކަމަށް ރައީސް ވިދާޅުވިއެވެ. ރައީސް ވަނީ އެ ކަމަށް ހައްލު ހޯދާ ޕިކްނިކް އައިލެންޑް ޤާއިމްކުރާނެ ތަނެއް ނިންމުމަށް މަސައްކަތް ކުރުމަށް އެދިވަޑައިގެންފައެވެ.
އެމަނިކުފާނު ވިދާޅުވީ ސަރުކާރުން ތިބީ ހުރިހާ ރައްޔިތުންނާ މަޝްވަރާކުރުމަށް ފަހު ރައްޔިތުން ބޭނުންވާ ގޮތަކަށް އެކަން ހައްލުކޮށްދިނުމަށް ތައްޔާރަށް ކަމަށެވެ. އެ އަތޮޅަށް ބޭނުންވާ ޕިކްނިކް އައިލަންޑް ހޯދައި ދިނުމުގެ މަސައްކަތް ކުރައްވަން ތައްޔާރަށް ހުންނެވި ކަމަށާއި އެކަން ކުރައްވާނީ އާއްމުންގެ ޚިޔާލާއި އެކުގައި ކަމަށް ވެސް ރައީސް ވިދާޅުވިއެވެ. އަދި އެ މަސައްކަތް ކުރައްވާނީ ވީހާވެސް ގިނަ ބަޔަކަށް ފައިދާ ވާނެ ގޮތަށް ކަމަށް އެމަނިކުފާނު ވިދާޅުވިއެވެ.
ރައީސް ވަނީ ތިނަދޫ އާއި އެހެނިހެން ރަށްތަކަށް ކުރީ ސަރުކާރުތަކުން އަޅާނުލާ ކަމަށް ވެސް ވިދާޅުވެފައެވެ. ނަމަވެސް މި ސަރުކާރުން އެ ރަށްރަށަށް ބޭނުންވާ ޚިދުމަތްތައް ފޯރުކޮށްދޭނެ ކަމަށް ރައީސް ވިދާޅުވިއެވެ.
