ތިނަދޫއަކީ ބޮޑު އިކޮނޮމީއެއް އޮތްތަނެއް، ތަރައްގީ މި ރަށުން އެބަ ފެނޭ - ރައީސް
ތިނަދޫގައި އާބާދީގައި 221 މީހުން ތިއްބަސް ރަށުގައި ތިބީ75 މީހުން
ރައީސް ތިނަދޫގައި ދެއްކެވި ވާހަކަފުޅު
ތިނަދޫއަކީ ބޮޑު އިކޮނަމީއެއް އޮތްތަނެއް ކަމަށާއި ތަރައްގީ އެރަށުން ފެންނަ ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ކެމްޕެއިން ދަތުރުފުޅުގައި ހޯމަ ދުވަހު ވ.ތިނަދޫ އަށް ވަޑައިގެން އެރަށުގައި ވާހަކަދައްކަވަމުންނެވެ.
ރައީސް ވިދާޅުވީ މ އަދި ވ އަތޮޅަކީ ކުރީ ސަރުކާރުތަކުން އަޅާނުލާ ދޫކޮށްލާފައި އޮތް ދެ އަތޮޅު ކަމަށެވެ. އަދި ރައްޔިތުންނަށް ބޭނުންވާ އަސާސީ ހިދުމަތްތައް ހުރީ ފޯރުކޮށްނުދެވި ކަމަށް ރައީސް ވަނީ ވިދާޅުވެފައެވެ. އެކަމުގެ ނަތީޖާއަކީ ރަށްރަށުގެ މީހުން ރަށް ދޫކޮށް އެހެންތަންތަނަށް ހިޖުރަކުރުން ކަމަށާއި ރަކީދޫ އާއި ތިނަދޫ އަކީ އެފަދަ ރަށްތައް ކަމަށް އެމަނިކުފާނު ވިދާޅުވިއެވެ. މިހިސާބުގެ ހުރިހާ ރަށަކީވެސް އެގޮތަށް ދިމާވެފައިވާ ރަށްތައް ކަމަށް ވީ ނަމަވެސް އެމްޑީޕީގެ މި ވެރިކަމުގައި އެކަން ބަދަލުކޮށްފައިވާ ކަމަށް ރައީސް ވަނީ ވިދާޅުވެފައެވެ. އަދި ވެވަޑައިގެންނެވި ވައުދުތަކާ އެއްގޮތަށް ކަންކުރައްވަމުން ގެންދަވާކަން ރައްޔިތުން ހެޔޮ ހިތުން ގަބޫލުކުރާނެ ކަމަށްވެސް އެމަނިކުފާނު ވިދާޅުވިއެވެ.
ތިނަދޫގެ އާބާދީގައި 221 މީހުން ތިއްބަސް ރަށުގައި ތިބީ75 މީހުން ކަމަށާއި ސަބަބަކީ އަސާސީ ހިދުމަތްތައް ރަށުގައި ލިބެން ނެތުން ކަމަށް އެމަނިކުފާނު ވިދާޅުވިއެވެެ. އެ ރަށުގައި ހުރި ޚިދުމަތްތައް ކުރިއަށް ގެންދިއުމަށް ފެނާ ނަރުދަމާގެ ހިދުމަތް ބޭނުންވާނެ ކަން ފާހަގަކުރައްވާ ރައީސް ވިދާޅުވީ އެ ރަށުގެ ފެނާއި ނަރުދަމާ މިހާރު އެ އޮތީ އެކަން ނިމުމަކާ ހަމައަށް އައިސްފައި ކަމަށެވެ. އަދި ވޯޓުގެ ކުރިން އެ ހިދުމަތް ދެވޭނެ ކަމަށް ރައީސް ވަނީ ވިދާޅުވެފައެވެ. އަދި މިފަދަ ތަނެއްގައި ސިއްހީ ހިދުމަތް ރަނގަޅަށް ލިބެންޖެހޭނެ ކަމަށާއި ބަލިވީމަ ބޭސްކޮށްލާ ޑޮކްޓަރަށް ދެއްކުމާއި، ބޭސް ލިބެން ޖެހޭ ކަމަށް ރައީސް ވިދާޅުވިއެވެ. އެ ރަށުގައި ވަރަށް އަވަހަށް ޑޮކްޓަރަށް ދައްކާ ދޭ ބޭސް ސިޓީއަށް ބޭސް ލިބޭނެ އިންތިޒާމް ހަމަޖައްސަވާނެ ކަމަށް ރައީސް ވިދާޅުވިއެވެ.
އެ ރަށުގެ ބަނދަރު ކުޑަވެފައިވާ ކަމަށް ވެސް ރައިސް ވިދާޅުވިއެވެ. އެހެންކަމުން ބަނދަރު ބޮޑުކުރުމުގެ މަސައްކަތް މި އަހަރުގެ ތެރޭގައި ކުރިއަށް ދާނެ ކަމަށް ވިދާޅުވިއެވެ. އަދި ރަށްގިރުމުގެ މައްސަލަ ހައްލުކުރައްވާނެ ކަމަށާއި އެކަން ޕްލޭން ކުރެވި ޓެކްނިކަލީ އެކަން ކުރެވޭނެ ގޮތަކަށް އެ މައްސަލަ ހައްލުކުރައްވާނެ ކަމަށް ވިދާޅުވިއެވެ.
