2018 ވަނަ އަހަރުވެސް އެމްޑީއޭއިން ތިބީ އަޅުގަނޑާއެކު ކަމަށް ބުނި - ރައީސް
ކުރިއަށް އޮތް 5 އަހަރަކީ ރައްޔިތުން ބޭނުންވާ ކަންކަމުގައި ކުލަ ޖެހޭނެ ފަސް އަހަރުކަމާމެދު ޝައްކު ނުކުރައްވާކަމަށް ވިދާޅުވި
ރައީސް ވ. ފުލިދޫގައި ދެއްކެވި ވާހަކަފުޅުގެ ތެރެއިން
2018 ވަނަ އަހަރުވެސް އެމްޑީއޭއިން ތިބީ އެމަނިކުފާނާއެކު ކަމަށް އެ ޕާޓީން ބުނެފައިވާކަމަށް ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ވ އަތޮޅަށް ކުރެއްވި ދަތުރުފުޅުގެ ތެރެއިން ފުލިދޫ ކަންމަތީ ބައްދަލުވުމުގައި ވާހަކަދައްކަވަމުންނެވެ.
އެމަނިކުފާނު ވިދާޅުވީ 2018 ވަނަ އަހަރުވެސް އެމަނިކުފާނާ، އެމްޑީއޭގެ ލީޑަރާއި ނައިބު ލީޑަރު ސިންގަޕޫރުން ބައްދަލުވެވަޑައިގަތުމުން، އެމަނިކުފާނާއެކު ތިއްބެވިކަމަށް ވިދާޅުވެފައިވާކަމަށެވެ. އެހެންނަމަވެސް އޭރު ރަސްމީކޮށް ކޯލިޝަން ހަދައި އިއުލާންކޮށްފައި ވުމުން، ކޯލިޝަން އިއުލާން ނުކުރެވުނީ ކަމަށް އެމަނިކުފާނު ވިދާޅުވިއެވެ. މީގެ އިތުރުން، ކުރިއަށް އޮތް 5 އަހަރަކީ ރައްޔިތުން ބޭނުންވާ ކަންކަމުގައި ކުލަ ޖެހޭނެ ފަސް އަހަރުކަމާމެދު ޝައްކު ނުކުރައްވާ ކަމަށްވެސް ރައީސް ވިދާޅުވިއެވެ. އަދި އެމްޑީއޭއާއެކު ކޯލިޝަން ހެދީ، 2018 ވަނަ އަހަރު ރިޔާސީ އިންތިޚާބުގެ ތެރޭގައި އެއްބަސްވިގޮތަށް ކަމަށް ރައީސް ވިދާޅުވިއެވެ.
މި ފަހަރު ރިޔާސީ އިންތިޚާބުގެ ކެމްޕެއިން ފެށީ ރާއްޖޭގައި އޮތް އާބާދީ އެންމެ ކުޑަ ދެ އަތޮޅުން ކަމަށާއި، އެކަމުންވެސް ސަރުކާރުގެ ސިޔާސަތު ހާމަވާކަމަށް ރައީސް ވިދާޅުވިއެވެ. އެކަމުން ސަރުކާރުން ކުދި އާބާދީ އެއް އޮތް ރަށްތަކާމެދު ތަފާތުކުރުމެއް ނުގެންގުޅޭކަން އެނގިގެންދާ ކަމަށް ރައީސް ވިދާޅުވިއެވެ. މި ދަތުރު ނިންމާލާއިރު ރައްޔިތުން ބޭނުންވެފައިވާ ގިނަ މަސައްކަތްތަކެއް ކުރެވުނުކަން އިހުސާސްކުރެއްވޭ ކަމަށް ރައީސް ވިދާޅުވިއެވެ. ނަމަވެސް އަބަދުވެސް ތަރައްގީއަށްޓަކައި ކުރުން މުހިންމު ކަންކަން ހުންނާނެކަމަށާއި، އިތުރަށް ބޭނުންވާ ކަންކަންވެސް ހުންނާނެ ކަމަށް ރައީސް ވިދާޅުވިއެވެ.
މިހާރު 2023ގެ ރިޔާސީ އިންތިޚާބަށް މެނިފެސްޓޯ އެކުލަވާލައްވާއިރު އޭގައި ރައްޔިތުން އެދޭ ކަންކަމުގެ ވާހަކަ ހިމަނުއްވާނެ ކަމަށް ރައީސް ވިދާޅުވިއެވެ. އެމްޑީޕީގެ މެނިފެސްޓޯ އެކުލަވާލަނީ އެކަމަށް ބޭނުންވާ ދިރާސާތައް ކޮށްގެން، ކަންކަން ކުރާނެ ގޮތުގެ މައުލޫމާތު އެ މެނިފެސްޓޯގައި ހިމަނައިގެން ކަމަށް އެމަނިކުފާނު ވިދާޅުވިއެވެ. އެގޮތުން މެނިފެސްޓޯތަކުގައި ހިމަނާ ކަންކަމަކީ އެކަންކަން ކުރާނެ ގޮތުގެ ތަފްސީލާއި، އެކަމަށް ބޭނުންވާ ފައިސާވެސް ހޯދާނެ ގޮތް ނިންމައިގެން ކުރަމުންދާކަންކަން ކަަމަށް ރައީސް ވަނީ ވިދާޅުވެފައެވެ. ފާއިތުވި 5 އަހަރުވެސް މަސައްކަތް ކުރީ އެހެން ކަމަށް ރައީސް ވިދާޅުވިއެވެ.
