އިންޓަނެޓަށް ހެޔޮ ބަދަލެއް، ޚިދުމަތުގެ ތެރެއަށް ވަންނަން ބޭނުންވާ ފަރާތްތަކަށް އެ ފުރުސަތު ހުޅުވާލަނީ

ރާއްޖެއަށް އެތެރެކުރާ ސަބްމެރިން ކޭބަލްއާއެކު އިންޓަނެޓްގެ އަގުހެޔޮވާނެ ކަމަށާއި، މި ޚިދުމަތުގެ ތެރެއަށް ވަންނަން ބޭނުންވާ ފަރާތްތަކަށް އެފުރުސަތު ހުޅުވާލާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ވ.ރަކީދޫ ކަންމަތީ ޖަލްސާގައި ރައީސް ސާލިހު ވިދާޅުވީ ޒަމާނީ ޓެކްނޮލޮޖީއާއެކު ފައިހަމަ ކުރަންޖެހޭ ކަމަށާއި، ސަރުކާރުގެ ޚިދުމަތްތައް ޑިޖިޓަލައިޒްކޮށް ހަރުދަނާ ކުރަންޖެހޭ ކަމަށެވެ. އެގޮތުން މިހާރު އެމަސައްކަތް ކުރަމުންދާ ކަމަށާއި، ފަސޭހައިން އެމީހަކު ހުރިތަނަކުން ޚިދުމަތް ލިބޭނެ ގޮތްތައް ހޯދަމުންދާ ކަމަށް އެމަނިކުފާނު ވިދާޅުވިއެވެ.

ރައީސް ސާލިހު ވިދާޅުވީ 2018 ވަނަ އަހަރު ވީ ވައުދާ އެއްގޮތަށް އިންޓަނެޓްގެ ޚިދުމަތް އަގުހެޔޮ ކުރެވިފައިވާ ކަމަށާއި، ކުރިއަށް އޮތްތަނުގައި މިހާރަށް ވުރެ ބޮޑަށް އިންޓަނެޓްގެ ޚިދުމަތް އަގުހެޔޮކުރާނެ ކަމަށެވެ. އަދި ހަލުވި ޚިދުމަތެއް ފޯރުކޮށްދޭނެ ކަމުގެ ޔަގީންކަން ރައީސް ސާލިހު ދެއްވިއެވެ.

މީގެ އިތުރުން ރައީސް ސާލިހު ވިދާޅުވީ ރާއްޖެއަށް އެތެރެކުރެވޭ ސަބްމެރިން ކޭބަލްއާއެކު އިންޓަނެޓްގެ ޚިދުމަތްވެ އަވަސްވެ އަގުހެޔޮވާނެ ކަމަށާއި، މި ޚިދުމަތް ރައްޔިތުންނަށް ދޭން ބޭނުންވާ ފަރާތްތަކަށް އެފުރުސަތު ހުޅުވާލާނެ ކަމަށެވެ.

ރައީސް ސާލިހު ވިދާޅުވީ މިއީ ފަސޭހައިން އަގުހެޔޮކޮށް ދުނިޔެއާއި ގުޅުވާލާނެ ނިޒާމެއް ކަމަށެވެ. މީގެ ސަބަބުން ކުދި ރަށްތަކަށް ޚިދުމަތް ހޯދުމަށް ފަސޭހަވެ ލުއި ލިބޭނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ކޮވިޑް-19އަށް އިޝާރާތް ކުރައްވައި ރައީސް ސާލިހު ވިދާޅުވީ ބައެއް ގޮންޖެހުންތަކާއި ކުރިމަތިލާން ޖެހުނު ނަމަވެސް ކާމިޔާބު ގިނަ މަސައްކަތްތައް ކުރެވިފައިވާ ކަމަށެވެ. އެދުވަސްވަރު އެޅުނު ހަރުދަނާ ފިޔަވަޅުތަކާއެކު މިއަދު 2019 ވަނަ އަހަރު ރާއްޖޭގެ އިގްތިސާދު އޮތް ހިސާބަށް އާދެވިފައިވާކަން އެމަނިކުފާނު ފާހަގަކުރެއްވިއެވެ.