އަހަރެން ހުރިއިރު ފައިސާއެއްނެތް، އާސެނަލް މިހާރު މުއްސަނދި: ވެންގާ

އާސެނަލް އަށް މިހާރު އިނގިރޭސި ޕްރެމިއާ ލީގު ކާމިޔާބު ކުރެވިދާނެ ކަމަށް އެ ޓީމުގެ ލެޖެންޑަރީ ކޯޗު އާސެން ވެންގާ ބުނެފި އެވެ.

އޭނާ މިހެން ބުނީ ވެސްޓްހޭމްގެ ކެޕްޓަން ޑިކްލަން ރައިސް ގަތުމަށް އާސެނަލް 100 މިލިއަން ޕައުންޑް ހޭދަކުރުމާ ބެހޭ ގޮތުން ސުވާލު ކުރުމުންނެވެ.

އާސެނަލްގެ މިހާރުގެ ކޯޗަކީ ވެންގާގެ އިރުޝާދުގެ ދަށުން ކުޅުނު މިކޭލް އާޓެޓާ އެވެ. ވެންގާ އަކީ 17 އަހަރު ވަންދެން އާސެނަލް އަށް ކޯޗުކޮށްދީ ތިން ފަހަރު ލީގު ކާމިޔާބުކޮށްދިން ކޯޗެވެ. އޭނާ މަޝްހޫރުވީ ކުޑައަގެއްގައި ކުޅުންތެރިން ގެނެސް ތަރިންނަށް ހަދައި ބޮޑު އަގުގައި ވިއްކައި އާސެނަލް އަށް މާލީ ނަފާ ހޯދައިދިން ކޯޗެއްގެ ގޮތުގަ އެވެ. އެކުލަބުން މިހާރު ބޭނުންކުރާ އެމިރޭޓްސް ސްޓޭޑިއަމް އެޅުމުގައި ވެސް ވެންގާގެ ޓްރާންސްފާ ޕޮލިސީ މުހިންމު ދައުރެއް އަދާކުރި އެވެ.