އޭޝިއަން ސާފިންގ ޗެމްޕިއަންޝިޕް: އިބޫއަށް ބޮޑު ކާމިޔާބެއް، ދެވަނަ ފަހަރަށް ބްރޯންޒް މެޑަލް

އޭޝިއަން ސާފިންގ ޗެމްޕިއަންޝިޕުގައި ރާއްޖޭގެ އެއްވަނަ ރާޅާ އެޅުންތެރިޔާ އަދި ގައުމީ ސާފިންގ ޓީމުގެ ކެޕްޓަން، ހުސައިން އަރީފް (އިބޫ) ލޯ މެޑަލް ހޯދައިފިއެވެ.

މިއީ އޭޝިއާގެ މި މުބާރާތުން އިބޫ ލޯ މެޑަލް ހޯދި ދެވަނަ ފަހަރެވެ. މީގެ ކުރިން އޭނާ ވަނީ 2019 ވަނަ އަހަރު ޗައިނާގައި ކުރިޔަށް ދިޔަ މުބާރާތުން ލޯ މެޑަލް ހޯދާފައެވެ.

މިއަދު ކުރިޔަށްދިޔަ ފައިނަލްގެ ކުރިން އިބޫ ވަނީ ރެޕެޗާޖުގެ ދެ ބުރުގައި ވާދަކޮށްފައެވެ. އެންމެ ފުރަތަމަ އޭނާ ވާދަކޮށްފައިވަނީ ރެޕެޗާޖުގެ ހަވަަނަ ބުރުގައެވެ. 14.90ގެ ނަތީޖާއަކާއެކު އިބޫ ވަނީ އެ ބުރު ކާމިޔާބުކޮށް، ރެޕެޗާޖުގެ ހަތްވަނަ ބުރުން ޖާގަ ހޯދާފައެވެ. އިބޫއާއެކު ރާއްޖޭގެ އިސްމާއިލް މިގްލާލް (ކުޑަ އިއްސެ) ވެސް ރެޕެޗާޖް ހައެއްގައި ވާދަކުރިއެވެ. ކުޑަ އިއްސެއަށް ލިބުނީ 8.40ވެ.

ރެޕެޗާޖު ހަތެއްގައި ވާދަކޮށްފައިވަނީ އިބޫގެ އިތުރުން ޖަޕާނުގެ ތިން ސާފަރުންނެވެ. މި ބުރުން 13.84 ގެ ނަތީޖާއަކާއެކު ދެވަނަ ހޯދައި، އިބޫ ވަނީ ފައިނަލުގެ ޖާގަ ކަށަވަރުކޮށްފައެވެ.

ފައިނަލުގައި އިބޫގެ އިތުރުން ޗާދަކޮށްފައިވަނީ އިންޑޮނޭޝިއާގެ ދަނީ ވިޑިއަންޓޯއާއި ޖަޕާނުގެ ދެ ސާފަރުން ކަމަށްވާ ރިކީ ސަޓޯއާއި އިއްކޮ ވަޓަނަބޭއެވެ. މި ބައިގެ ޗެމްޕިއަންކަން ހޯދީ ދަނީއެވެ. އޭނާ ވަނީ ފައިނަލުގައި 17.83 ސްކޯކޮށްފައެވެ. ދެވަނަ ހޯދި ރިކީއަށް ލިބުނީ 13.90 ޕޮއިންޓެވެ. އިބޫ ތިންވަނަ ހޯދާފައިވަނީ 10.87ގެ ނަތީޖާއަކާއެކުއެވެ.

މިއަހަރުގެ މުބާރާތަކީ ރާއްޖެއަށް ކާމިޔާބު މުބާރާތެކެވެ. ފިރިހެން ބައިން އިބޫ ލޯ މެޑަލް ހޯދިއިރު، މުބާރާތުގެ މިކްސްޑް ޓީމް އިވެންޓް ކަމަށްވާ އަލޯހާ ކަޕުންވެސް ގައުމީ ޓީމު ވަނީ ލޯ މެޑަލް ހޯދާފައެވެ.