މިތިބީ ރަނގަޅު ކައްޕިއަކާއެކު، އިންތިޚާބު އެއްބުރުން ކާމިޔާބު ކުރާނަން: އަލީ ޝިޔާމް
އިދިކޮޅުގައި ތިއްބަވާ ކައުންސިލަރުން ވެސް، ރަށްތަކުގައި މަޝްރޫއުތައް މި ސަރުކާރުން ކުރިއަށްގެންދާ ވާހަކަ ދައްކާ
މ. މުލަކުގައި އޮތް އުފާވެރި އަމާން ރާއްޖެ ކެމްޕޭން ޖަލްސާގައި އަލީ ޝިޔާމް ވާހަކަފުޅުދައްކަވަނީ
މިއަދު ތިބީ ރަނގަޅު ކައްޕިއަކާއެކު ކަމަށާއި, އިންތިޚާބު ކާމިޔާބުކުރާނީ އެއްބުރުން ކަމަށް، މ އަތޮޅުގެ ކޯޑިނޭޓަރު އަދި ރައީސް އޮފީހުގެ މިނިސްޓަރު އަލީ ޝިޔާމް ވިދާޅުވެއްޖެއެވެ.
މ. މުލަކުގައި ހޮނިހިރު ދުވަހުގެ ރޭ އޮތް "އުފާވެރި އަމާން ރާއްޖެ" ކެމްޕޭން ޖަލްސާގައި އަލީ ޝިޔާމް ވިދާޅުވީ، އިދިކޮޅުގައި ތިއްބަވާ ކައުންސިލަރުން ވެސް، ރަށްތަކުގައި މަޝްރޫއުތައް މި ސަރުކާރުން ކުރިއަށް ގެންދާ ވާހަކަ ދައްކާ ކަމަށެވެ. މުއްޔަށް، މުލަކަށް ނުވަތަ ނާލާފުއްޓަށް ބެލިޔަސް އެކަން އޮތީ އެހެންކަމަށް އަލީ ޝިޔާމް ވިދާޅުވިއެވެ.
ކޮވިޑުގެ ހާލަތުގައި ރާއްޖޭގެ ރައްޔިތުން ހާލުގައި ނުޖެހުނީ ރައީސް ސާލިހުގެ ވިސްނުންފުޅުގެ ސަބަބުން ކަމަށް ވެސް އޭނާ ވިދާޅުވިއެވެ. ރައީސަކީ އިކޮނޮމިސްޓެއްކަމަށް ސަރުކާރަށް ތާއިދުކުރާ މީހުން ނުކިޔާކަމަށާއި، ރައީސް އަމަލުން އެކަން ސާބިތުކޮށްދެއްވައިފިކަމަށް ވިދާޅުވިއެވެ.
ޝިޔާމް އިތުރަށް ވިދާޅުވީ ރާއްޖޭގެ އެންމެން ގޮވައިގެން އުޅުއްވުމަށް، ރައީސަކީ ލީޑަރެއް ކަމަށެވެ. ކޮވިޑުގެ ހާލަތުގައި ހުރިހާ އެންމެންގެ ވާހަކަ އަޑުއަހައިގެން ރައީސް ކުރިއަށް ގެންދެވިކަމަށް ވިދާޅުވިއެވެ.
އާރްޓީއެލްގެ ފެރީގެ ނިޒާމާއެކު އިގްތިސާދަށް ރަނގަޅު އަސަރުތަކެއް ކުރާނެ ކަމަށްވެސް އޭނާ ވިދާޅުވިއެވެ.
