ރަތަފަންދޫ ގޮނޑުދޮށް ހިމާޔަތް ކުރުމުގެ މަސައްކަތް ނޮވެމްބަރު ނިމުމުގެ ކުރިން ނިންމާލެވޭނެ: އާޒިމް
15 ޖުލައި 2023 | ހޮނިހިރު 07:47މިހާރުވެސް ބޮޑުބައެއް ވަނީ ހިމާޔަތް ކުރެވިފައި
ރަތަފަންދޫ ގޮނޑުދޮށް ހިމާޔަތް ކުރުމުގެ މަސައްކަތް ކުރަނީ
ގދ. ރަތަފަންދޫ ގޮނޑުދޮށް ހިމާޔަތް ކުރުމުގެ މަސައްކަތް އަންނަ ނޮވެމްބަރު މަސް ނިމުމުގެ ކުރިން ނިންމާލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ހުވަދު އަތޮޅުގައި އެމްޓީސީސީން ކުރިއަށްގެންދާ މަޝްރޫއުތައް ބައްލާލެއްވުމަށް ވަޑައިގެން، މީޑިއާތަކަށް މައުލޫމާތު ދެއްވަމުންނެވެ. އެގޮތުން، ރަތަފަންދޫއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ، އުދަ އެރުމާއި ރަށް ގިރުމުގެ މައްސަލަ ހައްލުކުރުމަށް ގޮނޑުދޮށް ހިމާޔާތް ކުރުމުގެ މަސައްކަތް ކުރިއަށްދާއިރު މިހާރުވެސް ބޮޑުބައެއް ހިމާޔަތް ކުރެވިފައިވާކަން އޭނާ ފާހަގަކުރެއްވިއެވެ.
އާޒިމް ވިދާޅުވީ ސެޕްޓެމްބަރު މަހަށް މި މަޝްރޫއު ނިންމުމަށް މަސައްކަތް ކުރި ނަމަވެސް ކަނޑުގަދަވެ، މޫސުމަށް އައި ބަދަލުތަކުގެ ސަބަބުން މުދާ ގެނައުމުގައި ދަތިތަކާ ދިމާވުމުން މަސައްކަތް މަޑުޖެހުނު ކަމަށެވެ. އެމްޓީސީސީން އަބަދުވެސް މަސައްކަތް ކުރާނީ މިފަދަ މަޝްރޫއުތައް ވީހާވެސް އަވަހަށް ނިންމުމަށް ކަމަށާއި ނޮވެމްބަރު މަސް ނިމުމުގެ ކުރިން މަޝްރޫއު ނިންމައި ހަވާލުކުރައްވާނެ ކަމަށް ވެސް އޭނާ ވިދާޅުވިއެވެ.
ރަތަފަންދޫ ކައުންސިލްގެ ރައީސް މުޙައްމަދު އަބްދުﷲ ވިދާޅުވީ އެރަށުގެ ގޮނޑުދޮށް ހިމާޔަތް ކުރުމުގެ މަސައްކަތަކީ ރައްޔިތުންގެ 40 އަހަރުވީ ދިގު އިންތިޒާރެއް ކަމަށެވެ. ކުރީ ސަރުކާރުތަކުން ވެސް މި މަޝްރޫއު ހިންގާނެކަމަށް ވައުދުވި ނަމަވެސް އެކަން ކޮށްދީފައި ނުވާ ކަމަށާއި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މި މަޝްރޫއު ފެއްޓެވުން އެނގެނީ އެމަނިކުފާނުގެ އިހުލާސްތެރިކަން ހުރިވަރު ކަމަށް އޭނާ ވިދާޅުވިއެވެ.
މީގެ އިތުރުން ސަރުކާރުން ރަތަފަންދޫގެ ތަރައްގީއަށް ކުރަމުން އަންނަ ކަންކަން އެ ރަށުގެ ރައްޔިތުން ބަލައިގަންނަކަން ވެސް މުޙައްމަދު ފާހަގަކުރެއްވިއެވެ.
ރަތަފަންދޫ ގޮނޑުދޮށް ޚިމާޔަތް ކުރުމުގެ މަޝްރޫޢުގެ ތެރޭގައި 461 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 240 މީޓަރުގެ ސަރަހައްދެއްގައި ބޭރުތޮށި ލުމާއި، 6600 އަކަމީޓަރުގެ ވެލި ގޮނޑުދޮށަށް އެޅުމުގެ މަސައްކަތް ހިމެނެއެވެ.
ޕްލޭނިންގ މިނިސްޓްރީން މި މަސައްކަތް އެމްޓީސީސީއާ ހަވާލުކޮށްފައިވަނީ 27.8 މިލިއަން ރުފިޔާއެވެ.
