ކެމްޕޭން އިތުރު ގިޔަރަކަށް ލައިގެން، އިންތިޚާބު ރައީސް ސާލިޙަށް ކާމިޔާބު ކޮށްދެއްވާ: އިމްރާން
ކޮޅުފުއްޓަކީ ސުނާމީގައި ރާއްޖެއިން އެންމެ ބޮޑު ގެއްލުމެއްވި އެއް ރަށް
ކޯލިޝަން ޕާޓްނަރ، އަދާލަތު ޕާޓީގެ ރައީސް އިމްރާން އަބްދުﷲ
ކެމްޕޭން އިތުރު ގިޔަރަކަށް ލައިގެން، ކުރިއަށް އޮތް ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަށް ކާމިޔާބު ކޮށްދެއްވުމަށް މަސައްކަތް ކުރުމަށް ކޯލިޝަން ޕާޓްނަރ، އަދާލަތު ޕާޓީގެ ރައީސް އިމްރާން އަބްދުﷲ ގޮވާލައްވައިފިއެވެ.
ކޮޅުފުށީގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން މިނިސްޓަރ ވިދާޅުވީ، ކޮޅުފުއްޓަކީ ސުނާމީގައި ރާއްޖެއިން އެންމެ ބޮޑު ގެއްލުމެއްވި އެއް ރަށް ކަމަށެވެ. އެރަށަށް ލިބުނު ގެއްލުން ފޫބެއްދޭވަރުގެ ނަތީޖާއެއް ނެރެވޭ މަސައްކަތެއް ކުރެވިގެން ދިޔައީ މި ސަރުކާރުގައިކަމަށް އިމްރާން ވިދާޅުވިއެވެ.
މިނިސްޓަރ ވިދާޅުވީ، ރައީސް ވެވަޑައިގެންނެވި ވައުދުތަކަކީ ފުއްދަވާ ވައުދުތަކެއްކަން އެ ރަށުންވެސް އެނގިގެން ގޮސްފައިވާ ކަމަށާއި، ހަމައެކަނި އެ ރަށުންވެސް މަދުވެގެން 65 އިންސައްތައަށްވުރެ ގިނަ ވޯޓު ހޯދުމަށް މަސައްކަތް ކުރައްވަންޖެހޭ ކަމަށެވެ.
އިމްރާން ވަނީ ކެމްޕޭން އިތުރު ގިޔަރަކަށް ލައިގެން، ރައީސް ޞާލިޙަށް އިންތިޚާބު ކާމިޔާބު ކޮށްދެއްވުމަށް ހުރިހާ ފަރާތްތަކުންވެސް މަސައްކަތް ކޮށްދެއްވުމަށް އެދިވަޑައިގެންފައެވެ.
މި ދަތުރުފުޅުގައި ރައީސް ވަނީ ދެވަނަ ދައުރަކަށް ހޮވިވަޑައިގެންފިނަމަ ކުރައްވާނެ ކަންކަމުގެ ވައުދުފުޅުތަކެއް ވެވަޑައިގެންފައެވެ.
