އިހަވަންދޫ ބިން ހިއްކުމުގެ މަޝްރޫޢު އަލުން ފަށައިފި

ހއ. އިހަވަންދޫ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ ދަށުން ބިން ހިއްކުމުގެ މަސައްކަތް އަލުން ފަށާފައިވާކަމަށް އެމަސައްކަތްކުރަމުން އަންނަ އެމްޓީސީސީން ބުނެފިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި އިހަވަންދޫ ބިން ހިއްކުމުގެ މަސައްކަތް އެންމެ ފުރަތަމަ ފެށީ 2021 ވަނަ އަހަރު އެވެ. ނަމަވެސް މަޝްރޫއުގެ ވަކި ހިސާބަކުން އެ މަސައްކަތުގައި ބޭނުންކުރި އުޅަނދު އެހެން ތަނަކަށް ވަގުތީގޮތުން ގެންދިއުމާ ގުޅިގެން މިމަޝްރޫއު ހުއްޓުމަކަށް އައެވެ. އޭގެފަހުން އިހަވަންދޫ ބިން ހިއްކުމުގެ މަސައްކަތް އަލުން ފަށާފައިމިވަނީ ބެލްޖިއަމްގެ ކުންފުންފުންޏަކުން ރާއްޖެއަށް ކުއްޔަށް ގެނެސްފައިވާ ޑްރެޖު "ފިލީޕޯ ބްރޫނެލޭޝީ" ބޭނުންކޮށްގެންނެވެ. މިއީ ދުވާލެއްގެ މައްޗަށް ހެކްޓަރެއްގެ ބިން ހިއްކުމުގެ ގާބިލްކަން ލިބިފައިވާ އުޅަނދެކެވެ.

މިމަސައްކަތްތާއި ގުޅޭގޮތުން އެމްޓީސީސީން ބުނީ މިމަސައްކަތް އަލުން ޖުލައި 12 ވަނަ ދުވަހު ފަށާފައިވާކަމަށެވެ. އެގޮތުން ބަންޑަވޯލްޖެހުމުގެ މަސައްކަތުގެ %77 ފުރިހަމަކުރެވިފަވާއިރު، ރިވެޓްމަންޓް މަސައްކަތުގެ %53 ވަނީ ފުރިހަމަކުރެވިފައެވެ. ބިންހިއްކުމުގެ %54 ފުރިހަމަކުރެވިފައިވާއިރު، މުޅި ޕްރޮޖެކްޓްގެ %61 މަސައްކަތް ވަނީ މިހާރު ނިމިފައިކަމަށް އެމްޓީސީސީން ބުނެއެވެ.

މި މަޝްރޫޢުގެ ދަށުން 25 ހެކްޓަރުގެ ބިން ހިއްކުމާއި، 850 މީޓަރުގެ ބޮޑުހިލައިގެ ރިވެޓްމެންޓް ޖެހުމުގެ މަސައްކަތް ކުރާނެއެވެ. މި މަޝްރޫޢަކީ 116.94 މިލިއަން ރުފިޔާގެ މަޝްރޫޢެކެވެ.