ސިޔާސީ ޕޯޑިއަމްތަކުން އެންމެ ބާރަށް އިވޭ އަޑަކަށް ވެފައި އޮންނަނީ ގައުމު ދަރަނިވެރިވެފައި ވާ ވާހަކައެވެ. ގައުމު ދަރަނިވެރި ކުރަނީ ވެރިކަމުގައި އޮތް ބާރެއްގެ ނާގާބިލުކަން ސާބިތުކޮށްދިނުމަށް އިދިކޮޅުން މަސައްކަތް ކުރާއިރު، އެކަމުގެ ދިފާއަށް ވެރިކަމުގެ ބާރުންވެސް ވާހަކަދައްކައެވެ. މިއީ އަދުގެ ދުނިޔެއަށް ބަލާއިރު ވަކި އެވެނި މިވެނި ގައުމަކަށް ޚާއްޞަ ކަމެއް ނޫނެވެ. ދުނިޔޭގެ ކޮންމެ ހިސާބަކަށް ބަލައިލިކަމުގައި ވީނަމަވެސް މިކަން އޮތީ މިހެންނެވެ. ދަރަނީގެ ތަކުލީފު އުފުލަންނުޖެހޭ ގައުމެއް މަދެވެ. އދ.ން އެންމެ ފަހުން އާންމުކުރި ރިޕޯޓްވެސް އެކަމަށް ހެކިދެއެވެ.

އދ.ގެ ރިޕޯޓް ބުނާގޮތުގައި، މުޅި ދުނިޔޭގެ ނިސްބަތުން ބަލާއިރުވެސް 2022 ވަނަ އަހަރަކީ ޕަބްލިކް ޑެބްޓް، ރެކޯޑް މިންވަރަކަށް އުފުލިގެން ދިޔަ އަހަރެކެވެ. ޕަބްލިކް ޑެޓްގެ މާނައަކީ ތަރައްގީގެ ފަންޑު ހިންގުމަށްޓަކައި ސަރުކާރުތަކުން އެ ގައުމެއްގެ އާންމު ރައްޔިތުންނަށް ދަރާފައިވާ ދަރަންޏެވެ. ނުވަތަ ފައިސާގެ މިންވަރެވެ. 2022 ވަނަ އަހަރު، ދުނިޔޭގެ ޕަބްލިކް ޑެބްޓް ވަނީ 92 ޓްރިލިއަން ޑޮލަރަށް އަރާފައެވެ. މިއީ ކޮރޯނާވައިރަސް ޑިޒީޒް (ކޮވިޑް-19) މގެ ބަލިމަޑުކަން ފަދަ ކާރިސާތަކުން އަރައިގަތުމަށް ގައުމުތަކުން ދަރަންޏަށް ނެގި ފައިސާގެ ސަބަބުން ވެގެން އުޅޭ ގޮތެއް ކަން އދ.ން ފާހަގަކުރެއެވެ. މި ކަމުގެ ތަކުލީފު އެންމެ ބޮޑަށް އުފުލަމުންދާ ބަޔަކީ ތަރައްގީވަމުން އަންނަ ގައުމުތައްކަންވެސް އދ.ން ފާހަގަކުރެއެވެ.

ޖުލައި 14އިން ޖުލައި 18ގެ ނިޔަލަށް ކުރިއަށް ގެންދާ ޖީ-20 މެންބަރު ގައުމުތަކުގެ މާލީ ވަޒީރުންނާއި މަރުކަޒީ ބޭންކުތަކުގެ ގަވަރުނަރުންގެ ބައްދަލުވުމާ ދިމާކޮށް އދ.ން ޖުލައި 12 ވަނަ ދުވަހު އާންމުކުރި ރިޕޯޓްގައި ވާގޮތުން، ދޭސީ އަދި ބިދޭސީ ފަރާތްތަކަށް ގައުމުތަކުން ދަރާފައިވާ ދަރަނި ވަނީ މިދިޔަ ވިއްސަކަށް އަހަރު ދުވަހުގެ ތެރޭގައި 5 ގުނައަށްވުރެ ބޮޑުތަނުން އިތުރުވެފައެވެ. މިއީ ހޯދުނު އިގްތިސާދީ ކުރިއެރުމާ އަޅައިބަލާއިރު ނުބައްދަލު، ބޮޑު މިންވަރެކެވެ.

ނޫސްވެރިންނާ ވާހަކަދައްކަވަމުން އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް ވަނީ، މައްސަލައެއް އުޅޭކަން ބާޒާރުމަތިން ފާހަގަ ނުވެދާނެ ކަމަށާއި، ނަމަވެސް އެންމެ ފަގީރު ގައުމުތަކަށް ބަލައިލުމުން، އެ ގައުމުތަކަށް އޮތީ ދަރަނި ޚަލާސް ކުރުމާއި ރައްޔިތުންނަށް ޚިދުމަތްކުރުމާމެދު ގޮތެއް އިޚުތިޔާރުކުރަން މަޖުބޫރުވެފައިކަން ފާހަގަކުރައްވާފައެވެ.

ތަފާސް ހިސާބުތައް ދައްކާގޮތުން، ސަރުކާރުތަކުން އާންމު ރައްޔިތުންނަށް ދަރާފައިވާ ދަރަނީގެ ގާތްގަނޑަކަށް 30 ޕަސެންޓް ހިއްސާކުރަނީ ތަރައްގީވަމުން އަންނަ ގައުމުތަކުންނެވެ. އޭގެ 70 ޕަސެންޓް ހިއްސާކުރަނީ ޗައިނާ، އިންޑިއާ އަދި ބްރެޒިލެވެ. ތަރައްގީވަމުން އަންނަ ގައުމުތަކުގެ ލިސްޓުގައި ހިމެނޭ ގައުމުތަކުގެ ތެރެއިން 59 ގައުމަކީ، އެ ގައުމެއްގެ އުފެއްދުންތެރިކަމުގެ ނިސްބަތް (ޖީޑީޕީ) ރޭޝިއޯއަށް ބަލާއިރު، 60 ޕަސެންޓް ދަރަނި ބޮޑުވެފައިވާ ގައުމެކެވެ. މިއީ ދަރަނިވެރިވެއްޖެކަމަށް ބަލާ މިންގަނޑަށްވުރެ މަތީ އަދަދެކެވެ.

ދުނިޔޭގެ މާލީ ނިޒާމު މި ވަގުތު ފަރުމާކޮށްފައި އޮތް ގޮތަށް ބަލާއިރު، މާލީ އެހީ ހޯދުމަކީ ތަރައްގީވަމުން އަންނަ ގައުމުތަކަށް އަތްފޯރާ ހިސާބެއްގައި އޮތް ފުރުސަތެއް ނޫންކަމަށް އދ.ން ބުނެއެވެ. ހަލުއިކަމާއެކު ކުރިއަރަމުން އަންނަ 50 އިޤްތިޞާދަކަށް ބަލާއިރު، އިންޓްރެސްޓްގެ ގޮތުގައި އެ ގައުމުތަކުން ދައްކަންޖެހޭ މިންވަރަކީ، އާމްދަނީއަށްވުރެ 10 ޕަސެންޓް ބޮޑު މިންވަރެއްކަންވެސް އދ.ން ވަނީ ފާހަގަކޮށްފައެވެ.

ބައިނަލްއަގުވާމީ ފެންވަރުގައި ފައިސާ ދޫކުރުމުގެ ކަންކަން ކުރިއަށްގެންދާ އިދާރާތަކުން މިހާރު އަމަލު ކުރަމުންދާ އުސޫލުތަކަށް ބަދަލުތަކެއް ގެނެސް، މާލީ ނިޒާމުގެ ފުރުސަތުތައް ވީހާވެސް ފަހިކުރުމަށް އދ.ން ވަނީ ގޮވާލާފައެވެ.