ގުޅި އަށް ރައީސް ދެއްވީ ހެޔޮ ޚަބަރުތަކެއް - ބިން ހިއްކުމާއި އޭޓީއެމްގެ ޚިދުމަތް އަދި ސިއްޙީ މަރުކަޒުގެ މަސައްކަތުގެ ހެޔޮ ފާލު

ގުރައިދޫ ދާއިރާގެ ރައްޔިތުން އެދޭ ކަންކަން ކޮށްދެއްވާނެ ކަމަށާއި މީގެ ކުރިން ވެސް އެ ދާއިރާގެ ރަށްރަށުގެ ރައްޔިތުން އެދުނު ކަންކަން ކޮށްދެއްވުމަށް ވަރަށް ބޮޑު އިސްކަމެއް ދެއްވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ކ.ގުޅި ކަންމަތީ ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ އެ ރަށުގެ ބިން ހިއްކުމުގެ މަސައްކަތަކީ އެ ރަށުން އެންމެ ބޮޑަށް އެދެމުން އައި މަސައްކަތް ކަމަށެވެ. އެ މަސައްކަތަށް އިސްކަން ދެއްވާކަން ފާހަގަކުރައްވާ އެމަނިކުފާނު ވިދާޅުވީ ގުޅީގެ ބިންހިއްކުމުގެ އަމަލީ މަސައްކަތް އަންނަ ސެޕްޓެމްބަރު މަހު ފަށާނެ ކަމަށެވެ.

މީގެ އިތުރުން އޭޓީއެމް ގާއިމްކުރަން ހަމަޖެހިފައިވާ ރަށްތަކުގެ ލިސްޓުގެ ކުރީގައި ކ.ގުޅި އޮތް ކަމަށް ވިދާޅުވިއެވެ. އެ ރަށުގެ ސިއްހީ މަރުކަޒުގެ ލެބޯޓްރީ ޤާއިމްކުރުމުގެ މަސައްކަތްވެސް ކުރިއަށް ރޭވިފައި ހުރި މަސައްކަތްތަކުގެ ތެރޭގައިވާ ކަމަށް ރައީސް ވިދާޅުވިއެވެ.

އޭޓީއެމްގެ ޚިދުމަތަކީ ގުޅީގެ ރައްޔިތުން އެންމެ ބޮޑަށް ބޭނުންވެފައިވާ ޚިދުމަތް ކަމަށް އެ ރަށުގެ އާއްމުން ބުނެއެވެ. އަދި ރަށުގެ ޒަމާންވީ ބިމުގެ ދަތިކަމުގެ މައްސަލަ އަށް ސަރުކާރުން ހައްލު ހޯދައި ދިނުމަކީ ނުހަނު އުފާ ކުރާ ކަމެއް ކަމަށް އާއްމުން ވަނީ ބުނެފައެވެ.

މާލެ އަތޮޅު (ކ. އަތޮޅު) ގުޅިއަކީ ރާއްޖޭގެ އާންމު ރަށްރަށުގެ ސައިޒާ އަޅާބަލާއިރު އެތައް ގުނައެއް ކުޑަ ރަށެކެވެ. ކުޑަކުޑަ ގުޅީގެ ޖުމްލަ ބޮޑުމިނުގައި ހުރީ އެންމެ 9.19 ހެކްޓަރެވެ.

ރަށްވެހިންގެ ރަޖިސްޓްރީއަށް ބަލާއިރު، ގުޅީގެ ރަޖިސްޓްރީކޮށްފައިވާ އާބާދީގައި ހާހެއް ހަމައެއް ނުވެ އެވެ.

މި ދަތުރުފުޅުގެ ތެރެއިން ރައީސް ވަނީ ގުޅީގެ އެމްޑީޕީގެ ޖަގަހަ ހުޅުވާދެއްވާފައެވެ.