އަންހެނުންގެ ވޯލްޑްކަޕް ފުޓްބޯޅަ މުބާރާތް އަންނަ ބުރާސްފަތި ދުވަހު ފަށާނެ އެވެ. އޮސްޓްރޭލިޔާ އާއި ނިއުޒީލޭންޑްގައި 32 ގައުމު ވާދަކުރާ މުބާރާތުގައި މިފަހަރު ތައްޓަށް ވާދަކުރާ ގިނަ ޓީމުތަކެއް ފެނިގެންދާނެ އެވެ.

އެމެރިކާ އަކީ އަންހެނުންގެ ވޯލްޑްކަޕުގެ އެންމެ ކާމިޔާބު ޓީމެވެ. މިހާތަނަށް އެ ގައުމު ވަނީ ފަސް ފަހަރު މި މުބާރާތް ކާމިޔާބުކޮށްފަ އެވެ. މިވަގުތު ދުނިޔޭގެ ރޭންކިންގެ އެއްވަނަ ގައުމަކީ ވެސް އެމެރިކާ އެވެ. މުބާރާތުގެ ހޮޓް ފެވަރިޓުންނަކީ އެމީހުންނެވެ.

ނަމަވެސް ޔޫރަޕުގެ ގައުމުތަކުން މިފަހަރު ކުރިއަށްވުރެ ވަރުގަދަ ވާދައެއް ކުރާނެ ކަމަށް ވަނީ ބެލެވިފައެވެ. މި ގޮތުން އެންމެ ވަރުގަދަ ޓީމަކަށް ޔޫރަޕުގައި އޮތީ 2022ގެ ޔޫރޯ ފައިނަލް ކުޅުނު ޖަރުމަނުވިލާތެވެ. އެމީހުންނަނީ ޔޫރަޕުގެ ގައުމަކަށް ވޯލްޑްކަޕް އެއްފަހަރަކަށްވުރެ ގިނައިން ހޯދުނު ހަމައެކަނި ގައުމެވެ. ޖުމުލަ ދެ ފަހަރު ވަނީ މުބާރާތް ކާމިޔާބުކޮށްފަ އެވެ.

އިނގިރޭސިންގެ ގިނަ ތަރިންނަށް ހާނިއްކަވެފައިވީ ނަމަވެސް އެމީހުންނަކީ ވެސް ތައްޓަށް ވާދަކުރާނެ ޓީމެއް ކަމަށް ބެލެވެ އެވެ. ކެނެޑާ ޓީމަކީ 2021ގެ އޮލިމްޕިކް ގޯލްޑް މެޑަލް ދުނިޔޭގެ ރޭންކިންގެ ތިން ވަނަ ސްވިޑްން ބަލިކޮށް ހޯދި ޓީމެވެ. މިހެންވެ ހައިރާންކުރުވަނިވި ޓީމަކަށް ކެނެޑާ ވާނެ ކަމަށް ގިނަބަޔަކު އުއްމީދުކުރެ އެވެ.

ސްޕޭން ޓީމުގައި ގިނައިން ތިބީ ޗެމްޕިއަންސް ލީގު ކާމިޔާބުކުރި ބާސެލޯނާގެ ކުޅުންތެރިންނެވެ. މީގެ ތެރޭގައި ފާއިތުވެދިޔަ ދެ އަހަރު ދުނިޔޭގެ މޮޅު ކުޅުންތެރިޔާގެ މަގާމު ހޯދި އެލެޒިއާ ޕުޓެޔާސް ހިމެނެ އެވެ. މުބާރާތުގެ ކުރިން ކޯޗާ މައްސަލަޖެހި ބައެއް ކުޅުންތެރިން ޓީމުން ބާކީކުރި ނަމަވެސް ސްޕޭން މިފަހަރު ތައްޓަށްވާދަކުރާނެ ކަމަށް ބެލެވެ އެވެ.

ފްރާންސް ޓީމަކީ މުޅިން އައު ކޯޗަކާއެކު ޒުވާން ކުޅުންތެރިން ގިނަ ޓީމެކެވެ. އެމީހުން ވަނީ މުބާރާތަށް ތައްޔާރުވާން ކުޅުނު މެޗުތަކުގައި ވަރުގަދަ ޓީމުތަކާ ކުޅެ ގިނަ މެޗުތަކެއް ކާމިޔާބުކޮށްފަ އެވެ.

ބްރެޒިލް އަކީ ދުނިޔޭގެ ރޭންކިންގެ ނުވަވަނަ ޓީމެކެވެ. ނަމަވެސް އެމީހުން ހީނުކުރާފަދަ ނަތީޖާއެއް ނެރެފާނެކަމަށް ބަލަންޖެހެ އެވެ. ޓީމުގައި ފަސް ފަހަރު ދުނިޔޭގެ މޮޅު ކުޅުންތެރިޔާގެ މަގާމު ހޯދާފައިވާ މާޓާ ވެސް ވަނީ ފަހ ވަގުތ ހިމަނައިފަ އެވެ. އޮސްޓްރޭލިޔާ ޓީމުގެ ވިދުމަކީ ޗެލްސީގެ ތަރި ސޭމް ކާ އެވެ.