އާމްދަނީ ހޯދުމަށް މަސައްކަތް ކުރަނީ 64 އިންސައްތަ މީހުން، އަންހެނުންގެ އަދަދު މަދު
މަސައްކަތުގެ އުމުރުފުރާގެ އާބާދީގައި ހިމެނޭ މީހުންގެ ތެރެއިން 63 އިންސައްތަ އަކީ ފިރިހެނުން
އެމްޕީއެލް ބަނދަރުގައި އަންހެން މުވައްޒަފަކާއި ފިރިހެން މުވައްޒަފެއް މަސައްކަތް ކުރަނީ
ރާއްޖޭގައި މަސައްކަތް ކުރާ އުމުރުފުރާގެ އާބާދީގެ ތެރެއިން އާމްދަނީ ހޯދުމަށް މަސައްކަތް ކުރަނީ 64 އިންސައްތަ މީހުން ކަމަށް ތަފާސްހިސާބުތަކުން ދައްކައިފިއެވެ.
މިދިޔަ އަހަރު މުޅި ރާއްޖޭގައި ކުރިޔަށްގެންދިޔަ ބޯހިމެނުމުގެ ރިޕޯޓު އަންގާރަ ދުވަހު އާއްމުކޮށްފައިވާއިރު އެ ރިޕޯޓުން ދައްކާ ގޮތުގައި ރާއްޖޭގައި މަސައްކަތު އުމުރުފުރާގެ އާބާދީއަކީ މުޅި ޖުމްލަ އާބާދީގެ 80 އިންސައްތައެވެ. އެއީ 411،219 މީހުންނެވެ. މަސައްކަތް ކުރާ މީހުންގެ އުމުރުފުރާ ކަމުގައި ބަލަނީ އުމުރުން 15 އަހަރުން މަތީގެ ފަރާތްތަކެވެ.
ބޯހިމެނުމުގެ ރިޕޯޓުގައި ބުނެފައިވާ ގޮތުގައި މަސައްކަތުގެ އުމުރުފުރާގެ އާބާދީގައި ހިމެނޭ މީހުންގެ ތެރެއިން 63 އިންސައްތަ އަކީ ފިރިހެނުންނެވެ. އެއީ 259،068 ފިރިހެނުންނެވެ. އަދި އަންހެނުންގެ ނިސްބަތް 37 އިންސައްތައިގައި ހުރިއިރު އެއީ 152،151 އަންހެނުންނެވެ. އަދި މި އާބާދީގެ 68 އިންސައްތަ ދިވެހިން ހިއްސާކުރާއިރު 32 އިންސަައްތަ ހިއްސާ ކުރަނީ ބިދޭސީންނެވެ.
މަސައްކަތުގެ އުމުރުފުރާގެ އާބާދީގައި ހަތަރުލައްކައަށްވުރެ ގިނަ މީހުން ތިބި ނަމަވެސް އާމްދަނީ ހޯދުމަށް މަސައްކަތް ކުރާ މީހުންގެ ނިސްބަތަކީ ނުވަތަ ލޭބަރ ފޯސްގެ ޕާޓިސިޕޭޝަން ރޭޓަކީ 64 އިންސައްތައެވެ. މީގެ ތެރެއިން އަންހެނުންނާއި ފިރިހެނުންގެ ފަރަގު ވަރަށް ބޮޑު ކަމަށް ބޯހިމެނުމުން ދައްކައެވެ.
އާމްދަނީ ހޯދުމަށް މަސައްކަތް ކުރާ އުމުރުފުރާގައި ހިމެނޭ ފިރިހެނުންގެ ތެރެއިން އާމްދަނީ ހޯދުމަށް މަސައްކަތް ކުރަނީ 80 އިންސައްތަ މީހުންނެވެ. އަދި މި އުމުރުފުރާގައި ހިމެނޭ އަންހެނުންގެ ތެރެއިން މަސައްކަތް ކުރަނީ 49 އިންސައްތަ މީހުންނެވެ.
ރާއްޖޭގައި މަސައްކަތް ކުރާ އުމުރުފުރާގެ އާބާދީގައި ވަޒީފާއެއް ހޯދުމަށް މަސައްކަތް ކޮށް، ވަޒީފާ ނުލިބެނީ ފަސް އިންސައްތަ މީހުންނަށެވެ. މި އާބާދީގައިވެސް ފިރިހެނުންނަށް ވެސް އަންހެނުން ގިނައެވެ. އެގޮތުން ވަޒީފާ ނުލިބި ތިބި އަންހެނުންގެ އަދަދު ހަ އިންސައްތައަށް އަރާއިރު ފިރިހެނުން ހިއްސާ ކުރަނީ ފަސް އިންސައްތައެވެ.
ބޯހިމެނުމުގެ ނަތީޖާ ދައްކާ ގޮތުން މަސައްކަތް ކުރާ އާބާދީގެ ތެރެއިން ގިނަ މީހުން މަސައްކަތް ކުރަނީ އެކޮމޮޑޭޝަން އަދި ފުޑް އިންޑަސްޓްރީ އާއި ޕަބްލިކް އެޑްމިނިސްޓްރޭޝަނާއި ޑިފެންސް ދާއިރާގައެވެ. މި ދެ ދާއިރާގައި ވެސް އާބާދީގެ 15 އިންސައްތަ މީހުން މަސައްކަތް ކުރެއެވެ.
ރާއްޖޭގައި އެކި ދާއިރާތަކުން ވަޒީފާތަކަށް އަންހެނުން ނެރުމަށް ސަރުކާރުންނާއި ކުންފުނިތަކުން އަންނަނީ މަސައްކަތް ކުރަމުންނެވެ. އެގޮތުން ފަންނީ ދާއިރާތަކުން ވެސް އަންހެނުން ނެރުމަށް ގިނަ އަދަދެއްގެ ތަމްރީން ޕްރޮގްރާމްތައް ބައެއް ކުންފުނިތަކުން މިހާރު ހިންގައެވެ. ނަމަވެސް އަދިވެސް އެކަށީގެންވާވަރަށް ތަފާތު ދާއިރާތަކުން އަންހެނުން ނުފެންނަ ކަމަށް އެ ދާއިރާތަކުން ފާހަގަކުރެއެވެ.
ރާއްޖޭގައި އަންހެނުން އެންމެ ގިނައިން މަސައްކަތް ކުރާ ދާއިރާތަކުގެ ތެރޭގައި ހިމެނެނީ ތައުލީމާއި ސިއްހީ ދާއިރާއެވެ.
