މާލެއަށް 264 ބަނގުރާ ފުޅި އެތެރެކުރި މީހަކު ކުށަށް އިއުތިރާފުވުމުން، އޭނާގެ ޖަލު އަދަބު ޖޫރިމަނާއަށް ބަދަލުކޮށް ކްރިމިނަލް ކޯޓުން ޙުކުމްކޮށްފިއެވެ.

މި މައްސަލައިގައި ދައުލަތުން ދައުވާ އުފުލާފައިވަނީ މުއާވިޔަތު އަހުމަދު ސަމީރު ނަމަކަށް ކިޔާ މީހެއްގެ މައްޗަށެވެ.

އޭނާގެ މައްޗަށް ދައުވާ ކޮށްފައިވަނީ މިދިޔަ އަހަރުގެ ޑިސެމްބަރު މަހު އޭނާ އިތުރު މީހަކާއެކު ހުޅުމާލޭ ފޭސް 2 ގެ ސަފާރީ ޖެޓީ ކައިރިން ކާރެއްގައި މާލެއަށް ބަނގުރާ އެތެރެކުރަން އުޅޭކަމަށް ތުހުމަތުކޮށް ބެލި މައްސަލައެއްގައެވެ.

އެކަމާ ގުޅޭ މައުލޫމާތު ދިވެހި ފުލުހުންގެ ޚިދުމަތުގެ އިންޓެލިޖެންސްއަށް ލިބިގެން ސިނަމާލެ ބްރިޖު ކައިރިން މާލެއަށް ފައިބާ ޓްރެފިކް ލައިޓު ކައިރީގައި ފުލުހުން ވަނީ ޙަރަކާތްތެރިވެފައެވެ. އަދި ކާރު އެހިސާބަށް އައުމުން ކާރު މަޑުކޮށް، ބަލައި ފާސްކުރިއިރު ކާރުގެ ޑިކީ ތެރެއިން ވަނީ 264 ފުޅި ބަނގުރާ ފެނިފައެވެ.

ވުމާއެކު، މި މައްސަލައިގައި އޭނާގެ މައްޗަށް ކޮށްފައިވަނީ ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާއެވެ.

މި މައްސަލައާ ގުޅިގެން ދައުވާއަށް ޖަވާބު ދިނުމުގެ މަރުޙަލާގައި އޭނާ ކުށަށް އިއުތިރާފުވެފައިވެއެވެ. އަދި އަވަސްނިޔާގެ ޝަރީއަތުގެ އަޑުއެހުމުގައިވެސް އިއުތިރާފު ދަމަހައްޓާފައިވާތީ ޝަރީއަތުން ވަނީ އޭނާގެ އިއުތިރާފަކީ ސައްޙަ އިއުތިރާފެއްކަމަށް ކަނޑައަޅާފައެވެ.

އޭގެ އިތުރުން، މިއީ އެކަށީގެންޥާ ޝައްކެއް ނެތް މިންވަރަށް އޭނާގެ މައްޗަށް ސާބިތުވާ މައްސަލައެއްކަމަށް ޝަރީއަތުން ވަނީ ކަނޑައަޅާފައެވެ.

އޭނާގެ މައްޗަށް ކަނޑައެޅުނު ޖަލު އަދަބު ޖޫރިމަނާގެ އަދަބަކަށް ބަދަލު ކުރުމާމެދު އިއުތިރާޒެއް ނެތްކަން ދައުލަތުން އަދަބާ ގުޅޭގޮތުން ފާހަގަކުރިއެވެ.

މި ކުށަށް ކަނޑައެޅިފައިވާ އަސާސީ އަދަބަކީ 2 މަހާއި 12 ދުވަހުގެ މުއްދަތަކަށް ޖަލަށް ލުމެވެ. އޭނާ އިއުތިރާފުވެފައިވާތީ އަދަބުގެ އަސާސީ މިންގަނޑު ދަށް ކުރުމުން ކަނޑައެޅޭ އަދަބަކީ 1 މަހާއި 13 ދުވަހުގެ ޖަލު ޙުކުމެކެވެ.

ޝަރީއަތުން ވަނީ އޭނާގެ މައްޗަށް ޖަލު އަދަބު ނޫން އަދަބެއް ކަނޑައެޅުމުގެ މަސްލަޙަތު މާ ބޮޑުކަމަށް ފާހަގަކޮށް، ދައުލަތުންވެސް އިއުތިރާޒު ނުކުރާތީ އޭނާގެ ޖަލު ޙުކުމް ޖޫރިމަނާގެ އަދަބަކަށް ބަދަލުކޮށްފައެވެ.

ވުމާއެކު، އޭނާގެ މައްޗަށް ކަނޑައަޅާފައިވަނީ 8600 ރުފިޔާގެ ޖޫރިމަނާގެ އަދަބެކެވެ. އެ ފައިސާ ދެމަސް ދުވަހުގެ ތެރޭގައި މީރާއަށް ދެއްކުމަށް ޙުކުމުގައިވެއެވެ.